Read Falam Chin EZEKIEL 44 Bible Online

EZEKIEL 44 - Falam Chin bible

EZEKIEL 44

¹Cupa cun Biakinn ihsin nisuahnak lam kapih a ummi a lenglam kotka ah i hruai. Cuih kotka cu kharmi a si.

²Cule BAWIPA in ka hnenah, “Hi kotka cu khar a si ringring ding, ziangtik hmanah on a si dah lo ding. Zovek milai hman in an hmang lo ding, ziangahtile Israel ih Pathian, BAWIPA keimah a sungin ka feh zo. Khar a si ringring ding.

³Mi-uk bawi lawnglawng ka umnak hmunih rawl thianghlim ei dingah a feh thei ding. Cuih kotka cun a lut pei ih a sunglam ih khaan tumpi ihsin a suak sal pei,” a ti.

⁴Cule cupa cun Biakinn hmailam ih a ummi saklam kotka ah i fehpi. Khua ka vun zoh ih BAWIPA ih Biakinn cu a nasa zetmi BAWIPA ih sunlawi tleunak in a khat kha ka hmu. Leilung ah bokkhup in ka hlon aw;

⁵cule BAWIPA cu ka hnenah, “Milaipa, na hmuhmi le na theihmi hmuahhmuah hi ṭhatein hminsin aw. Biakinn hrangah daan le daanterek pawl ka lo sim thluh ding. Zopawl so Biakinn sungah luh a thiang ih zoso a thiang lo, ti kha feltein hminsin aw.

⁶“Raltho phun Israel mipawl cu sim aw; fihnungza thil an tuah ringringmi hi Cungnungbik BAWIPA keimah in ka zawi thei nawn lo ding a si.

⁷Ka hnenih thawinak sa a thi le a thau pawl pek a si laiah, serhtan lo ramdangmi, ka thu a ngai duh lomi pawl cu Israel mipawl in Biakinn sungah an luhter ruangah ka Biakinn an borhhlawh ter zo a si. Cule ka minung pawl in thil fihnungza tuah tahrat in ka thukam an balsiat zo a si.

⁸Ka biakinn sungih biaknak hrang thil thianghlim tuahmi pawl cu anmah ih ṭuanvo ah an la duh lo, ramdangmi ih ṭuanvo sawn ah an tuah a si.

⁹“Cungnungbik BAWIPA keimah in ka sim: serhtan lo ramdangmi le ka thu a ngai duh lomi pawl cu Israel mi lakih a ummi ramdangmi an si hmanah ka Biakinn sungah an lut thei lo pei,” tiah a ti.

¹⁰BAWIPA in ka hnenah, “Levi mi pawl cu Israel misenpi pawl thawn keimah in tlansan ih milem a biatu an si ruangah ka hrem hai ding.

¹¹Biakinn kotka kil tahrat in le Biakinn sung hnaṭuan ṭuannak in keimah in rian thei ding. Mipi in mei-ur thawinak hrang le thawinak dang hrangih an pekmi ṭilva pawl an that ding ih mipi riantu si dingah ṭuanvo an nei ding.

¹²Sikhalsehla milem biaknak tuah tahratin Israel mipawl an hruaisual ruangah Cungnungbik BAWIPA keimah in siatcam in ka sim: ka hrem tengteng hai ding.

¹³Ka puithiam hna an ṭuan lo pei; ka hrangih thilri thianghlim kiangkap khalah an feh lo pei ih Hmun Thianghlim Bik sung khalah an lut lo pei. Thil borhhlawh an tuah ruangah hi bangtuk in hremnak an tuar a si.

¹⁴Biakinn sungih hnaṭuan tenau pawl ṭuan dingah ṭuanvo ka pek a si,” tiah a ti.

¹⁵Cungnungbik BAWIPA in, “Zadok hrin Levi mi puithiam pawl cu, Israel misenpi pawl in in dungtun lai hmanah, rintlak zetin Biakinn sungah ka hna an ṭuan a si. Curuangah atu khalah annih pawl cu ka umnak ah a rami le keimah i riantu an si ding ih thawinak pekmi sathau le sathi pawl ka hnenih a petu an si ding.

¹⁶Anmah lawnglawng ka Biakinn sungah an lut thei ding, ka biakṭheng ah hna an ṭuan thei ding ih Biakinn sung biaknak hrangih thiltuahmi pawl cu an tuah thei ding.

¹⁷Biakinn laifang tualrawn ah kotka ihsin an lut tikah pat femte ih tahmi hnipuan an hruk ding. Biakinn tualrawn ah siseh, Biakinn sungah siseh ṭuanvo nei in hna an ṭuan tikah tuuhmul in tahmi hnipuan zianghman an hruk lo pei.

¹⁸Cuticun thaw sa lo le thlan suak loin an um ding; pat ih tahmi lupawng le pat ih tahmi bawngbi an hruk pei, a sinan taikhap cu an khap lo pei.

¹⁹Misenpi umnak a lenglam tual ih an va suah hlanah Biakinn sung hnaṭuannak ih an hrukmi hnipuan cu an hlitta pei ih khaan thianghlim sungah an retta pei. A zarhmi an hnipuan pawl cu misenpi tuahmawhtu ih an can lonak dingah hnipuan dang an hruk pei.

²⁰“Puithiam pawl cu an lu an meet lo pei, an sam khal saupi in an zuah lo pei. A mawitawk in an sam cu an zuah pei.

²¹Puithiam pawl in a sunglam tualrawn ih an luh hlanah sabitti an in hrimhrim lo pei.

²²Midang ih maakmi nunau cu puithiam pawl in an ṭhi lo pei. Puithiam cun Israel mi fala him a si lole puithiam dangih thihsanmi nuhmei lawng an ṭhi pei.

²³“Puithiam pawl cu a thianghlim le thianghlim lo thu ah siseh, a thiangfai le thiangfai lo thu ah siseh, ka minung pawl a zirhtu an si pei.

²⁴Thu el awknak le thuneitu an um tikah ka daan bangtuk in puithiam pawl in thu an relcat pei. Ka thupekmi le ka daan bangtuk in biaknak puai pawl cu an ul pei ih Sabbath ni pawl khal thianghlimte in an ul pei.

²⁵“Puithiam in miruak tham tahratin mithianglo ah a cangter aw lo pei; a nu le a pa ih ruak, amah ih faate ruak, a unau a si lole pasal nei lo a farnu ruak dah ti lo ahcun miruak a tham hrimhrim lo pei.

²⁶Mithiang a si sal hnuah ni sarih sung a hngak hrih pei ih,

²⁷cuih hnuah a thianfai theinak dingin Biakinn sunglam tualrawn ah feh in thawinak a pek pei. Cuticun Biakinn sungah hna a ṭuan thei sal ding. Cungnungbik BAWIPA keimah in ka sim zo.

²⁸“Puithiam pawl in puithiam an sinak cu Israel mi pawl hnenih ka pekmi lakah an covo a si ding ih san khat hnu san khat an roh aw vivo ding. Israel ram sungah zianghman covo dang an nei lo pei. Keimah hi an ṭulmi an covo ka si.

²⁹Sangphut thawinak, sualthlah thawinak le kuansal thawinak ih pekmi pawl cu puithiam pawl ih rawl a si ding ih, ka hrangih Israel ram sungih a hleice in an retmi hmuahhmuah khal anmah in an ngah thluh ding.

³⁰Puithiam pawl in thlaithar ih pekmi a ṭha bik le ka hnenih an pekmi thil hmuahhmuah an co ding. Mipi pawl in sang an rawh tin in an rawh hmaisa bik sang cu puithiam hnenah an pek pei ih cuticun an innsang ah ka thlawsuah a thleng ding a si.

³¹Puithiam pawl in vate le ramsa pawl anmahte a thimi siseh, ramsa dang ih dehmi sa siseh an ei lo pei,” tiah a ti.