Read Falam Chin EZEKIEL 45 Bible Online

EZEKIEL 45 - Falam Chin bible

EZEKIEL 45

¹Hi ram cu Israel miphun pawl hrangih zem a si tikah ṭhenkhat cu BAWIPA ih hrangah pek a si pei. Peng riat sau le peng ruk kau a si pei. A ram pumpi in ram thianghlim a si pei.

²Cuih ram sungah tungvang can aw mi hmun, Biakinn hrangah zuah a si pei ih dong za-nga a saumi le a kaumi a si pei; a kimvel in dong sawmnga kau hmunlawng in a kulh pei.

³Hi hmunih a hrek, peng hra sau le peng riat kaumi hmun ih hrek, cu a dangte in ret a si pei; Biakinn umnak, hmun thianghlimbik a si pei.

⁴Hi ram sungih hmun thianghlim, Biakinn sungih BAWIPA ih hna a ṭuantu puithiam pawl hrangih retmi a si pei. Puithiam pawl ih inn le Biakinn saknak hmun a si pei.

⁵Cuih tlunih hmun hrek a taang hrihmi cu Levi mi pawl, Biakinn sungih hna a ṭuanmi hrangah ret sak a si pei. Cutawk cu Levi mi pawl umnak khua a si pei.

⁶Cuih hmun thianghlim sangtu ram, peng riat sau le peng hnih kau ih tahmi ram cu Israel mi zokhal an umnak ding khawpi hrangah ret a si pei.

⁷Mi-uk bawi hrang khalah ram retsak a si pei. Hmun thianghlim ih nitlaknak lam ramri ihsin nitlaknak lamah Mediterranean Tifinriat tiang a thleng ding. Nisuahnak lamah cun hmun thianghlim ih nisuahnak lam ramri ihsin rampi a netnak tiang a si ding; cuticun a saulam cu Israel miphun phunkhat hrangih ṭhenmi ram can in a sau ding.

⁸Cuih hmun le cuih ram cu Israel ram sungah mi-uk bawi ih a comi ram a si ve ding ih cuticun misenpi pawl cu hnaihnok nawn loin ram ṭhen dangdang pawl cu Israel miphun pawl ih comi ram a si, tiah a upat ve ding.

⁹Cungnungbik BAWIPA, in, “Maw Israel mi-uk bawi pawl, nan sualnak hi a reituk zo! Mi nan hmuhsuamnak le mi nan ramnak pawl hi baang thlang uh! A dikmi le a felmi lawng tuah thlang uh. Ka minung pawl cu an ram ihsin nan dawihlo nawn lo ding. Cungnungbik BAWIPA keimah in ka lo sim a si.

¹⁰“Zokhal in a dikmi tahnak le thlainak an hmang pei:

¹¹“Thil a romi tahnak ephah pakhat cu a tii-mi tahnak bath pakhat thawn an bang aw. Homer cu mi zapi hman bikmi tahnak a si. A hman daan cu a tanglam vekin a si: Homer pakhat cu ephah pahra le bath pahra thawn an bang aw.

¹²“Nan thil thlainak cu a thuailam vekin a si pei: Gerah kul cu shekel pakhat thawn a bang aw. Shekel sawmruk cu mina pakhat thawn a bang aw.

¹³“Thawinak nan pek tikah a tanglam vekin nan pek pei: Sangvut cu nan lo in a suakmi ṭhen sawmruk ih ṭhenkhat, Barli sangvut cu nan lo in a suak mi ṭhen sawmruk ih ṭhenkhat, Olif hriak cu nan thingkung in a suakmi sungin ṭhen zakhat ih ṭhen khat a si ding. Bath in tah tikah: bath pahra cu homer pakhat thawn an bang aw; homer pakhat cu kor pakhat thawn an bang aw a si. Tuu a si ahcun Israel ram sungih tuu zahnih sungah tuu pakhat a si ding. “Sangphut thawinak, mei-ur thawinak le pawlkom thawinak hrangih ṭilva pawl cu nan rak keng pei ih cuticun nan sualnak ngaithiam an si ding. Cungnungbik BAWIPA keimah in thu ka lo pek a si.

¹⁶“Israel ramsung misenpi pawl in hi thawinak pawl cu Israel ram mi-uk bawi hnenah an keng pei.

¹⁷Mi-uk bawi ih ṭuanvo cu Israel miphun pumpi hrangah Thla Thar Puai, Nizarh puai le puai dangdang tuah tikah mei-ur thawinak, sangphut thawinak le sabit thawinak pawl hrangih ṭilva pawl hawlsak ding kha a si. Israel mi pawl ih sual thianfaiternak dingah sualthlah thawinak, sangphut thawinak, mei-ur thawinak le pawlkom thawinak pawl tuahsak ding kha a ṭuanvo a si,” a ti.

¹⁸Cungnungbik BAWIPA in, “Thla khat thla, ni khat ni ah raitluan cawcang pakhat nan that pei ih Biakinn nan thiangter pei.

¹⁹Puithiam in hi sualthlah thawinak cawcang ih thisen malte cu a lak pei ih Biakinn sangka ṭhuam pawl, biakṭheng kil li parah le a sunglam tualrawn luhnak kotka ṭhuam pawlah a hnih pei.

²⁰Cuih thla ni sarih ni ah cubangtuk ṭhiamṭhiam in tipang sual hrangah siseh, a si lole theih lo sual hrangah siseh, nan tuah pei. Cuticun Biakinn cu nan thianghlimter pei.

²¹“Thla khat thla, ni hleili ni ah Lantak Puai tuah nan thok pei. Ni sarih sung mi hmuahhmuah in thilnu tel lo sang nan ei pei.

²²Puai tuah ni khatnak ni ah mi-uk bawi in amah ih sualnak le misenpi sualnak ruangah cawcang a that pei ih a pek pei.

²³Puai tuah ni ni sarih sung nitinte in raitluan cawcang pakhat le tuucang pakhat BAWIPA hnenah a pek pei ih a pumte in mei-ur thawinak ah a ur ṭheh pei. Nitinte in mecang pakhat khal sualthlah thawinak hrangah a pek pei.

²⁴An thahmi cawcang pakhat le tuucang pakhat thawn vainim reelkhat le olif hriak pawng thum ciar pek a si pei.

²⁵“Puanthlam Puai cu thla sarih thla ni hleinga ni ah thok a si pei ih ni sarih sung cu nitinte in mi-uk bawi in cubangtuk ṭhiamṭhiam in sualthlah thawinak, mei-ur thawinak le vainim le olif hriak a pek pei,” tiah a ti.