Read Falam Chin EZEKIEL 47 Bible Online

EZEKIEL 47 - Falam Chin bible

EZEKIEL 47

¹Cupa cun Biakinn luhnak sangka ah i kirpi sal. Cuih sangka hnuai zawn cun tidai a hung puut ih Biakinn a hoinak nisuah lamah a luang. Biakinn thlanglam kap hnuai in a luang ih biakṭheng thlanglamkap lan tiang a luang.

²Cupa cun saklam kotka lam zawh in Biakinn ihsin i hruai ih nisuah lam a hoitu kotka lamah i kelpi. Cuih kotka ih thlanglam kapah tivate pakhat a hung suak ih a luang.

³Cupa in a thil tahnak fung thawn nisuahnak lam tiva a vung luannak lamah cun dong thawngkhat a vun tah ih cutawk ihsin tiva cu tan dingah i fial. Tidai cu ka kemit tiang lawng a si.

⁴Cule dong thawngkhat a tah salih tidai cu ka khuk a tiang. Dong thawngkhat a vun tah sal lala ih tidai cu ka taai a hung tiang.

⁵A dang dong thawngkhat a vun tah sal tikah tidai cu a thuk tuk thlang ih ka tan thei nawn lo. A leuh ih leuh lo cun tan thei ding a si nawn lo.

⁶Anih in, “Milaipa, hi na hmuhtonmi pawl hi ṭhatein ciing aw,” i ti. Cule cupa cun tivakap ah i kirpi sal ih,

⁷cutawk ka thlen tikah khatlam khatlam ah thingkung tampi an um fingfing kha ka hmu.

⁸Cupa cun ka hnenah, “Hi tiva cu ram sungin nisuahnak lamah a luang ih Jordan tiva kuam ihsin Tipi Thi ah a thleng. Tipi Thi sungih a vung luan tikah cun ci a almi tidai hmuahhmuah cu tidai thar in a airawl ṭheh ding.

⁹Tiva a luannak hmun kipah tisung um ramsa le nga a phunphun an um ding. Cuih tiva cun Tipi Thi ih tidai hmuahhmuah cu a tharter ṭheh ding ih a thiangfaiter ṭheh ding. A luannak kipah nunnak a suakter ding.

¹⁰En-gedi Cerhti ihsin En-eglaim Cerhti tiang tipikap ah ngakaitu an um vivo ding ih cutawkah an sur pawl an pho ding. Mediterranean Tifinriat ih nga phunkim a um vekin cutawk khalah nga phunkim a um ve ding.

¹¹Sikhalsehla tipikap ih cirhduup le tili ih tidai pawl cu an thiangfai lo ding. Citi suahnak cutawkah an um ringring ko ding.

¹²Tiva kap hnih ah thingkung a phunphun an kho ding ih ei ṭhami rah an rah ding. An hnah a vuai dah lo ding ih an rah khal a reh dah lo ding. Biakinn ihsin a luangmi tidai in a cawm ruangah thlatinte in rah thar an rah ringring ding. Cuih thingrah pawl cu rawl ah an ring ding ih thinghnah pawl khal mi tampi ih damnak ah a cang ding,” tiah a ti.

¹³Cungnungbik BAWIPA in Israel hnenah, “Nan hrin hrin hleihnih ih nan zem awk dingmi nan ramri cu hibangtuk in a si pei. Josef hrin in ramṭhen ṭhenhnih an co ding.[17]

¹⁴Nan pu le nan pa pawl hnenah hi ram cu an ta si dingin ka pek ding tiah siatcam in thu ka rak kam zo, atu-ah a tia awtein zem aw uh.

¹⁵“Saklam ramri cu Mediterranean Tifinriat ihsin nisuahnak lamah a feh pei ih Hethlon khua in Hamath Tlangkawn in Zedad khua tiang,

¹⁶Zedad khua ihsin (Damaskas ukmi ram le Hamath ih ukmi ram karlak ih a ummi) Berothah khua le Sibraim khua in, (Hauran ram ukmi ramri kiangih a ummi) Tikon khua tiang a si pei.

¹⁷Cutiin saklam ramri cu Mediterranean Tifinriat ihsin nisuah lamah Enon khua tiang a si pei. Saklam ih ramri cu Damaskas le Hamath ram pawl an si.

¹⁸“Nisuahnak lam ramri cu Damaskas le Hauran ramri ihsin a thok ih thlanglam ah a feh ih Jordan Tiva cu ramri ah a cang; Jordan Tiva in nitlaknak lam cu Israel ram a si ih nisuahnak lam cu Gilead ram a si; cuticun Tipi Thi kapih a ummi Tamar tiang a vung feh.

¹⁹“Thlanglam ramri cu Tamar ihsin a thok ih nitlaknak lamah Kadesh tipuut tiang a feh; cule saklam nitlaknak lamah a feh vivo ih Izipt ramri ihsin Mediterranean Tifinriat a thleng.

²⁰“Nitlaknak lam ramri cu Mediterranean Tifinriat a si ih saklam ah Hamath tlangkawn in nitlaknak lam kap hmun tiang a si.

²¹“Hi ram cu nan hrin pawl ṭhen aw uh.

²²Kumkhua in nanmah ih ta a si ding. Nanmah lakah a ummi ramdangmi pawl, hitawk ramah faate a neimi pawl cu ram nan zem awk tikah covo an nei ve pei. Israel minung thotho ah rel an si pei ih Israel miphun pawl thawn ram nan zem awk tikah camcawhfung an zuuk ve ding a si.

²³Nan lakih a ummi ramdangmi pawl khal in Israel mi bangin ram zemmi covo a ngah ve ding. Keimah Cungnungbik BAWIPA in ka sim zo,” tiah a ti.