Read Falam Chin EZEKIEL 7 Bible Online

EZEKIEL 7 - Falam Chin bible

EZEKIEL 7

¹BAWIPA in ka hnenah,

²“Milaipa, Cungnungbik BAWIPA keimah in Israel ram hnenih ka ṭongmi cu hihi a si: Nan ram pumpi hrangah a netnak a nai zo.

³“Maw Israel, a netnak tikcu a thleng zo. Ka thinhengnak na tong ding, ziangahtile na thiltuahmi ruangah na parah thuṭhennak ka thlenter a si. Na nuncan fihnungza ruangah na parah phuba ka la ding.

⁴Ka lo zuah lo ding, ka lo zaangfah fawn lo ding. Fihnungza thil na tuahmi hmuahhmuah ruangah ka lo hrem ding; cuticun BAWIPA ka sihi na thei ding,” a ti.

⁵Cungnungbik BAWIPA in hiti in a ti: “Nan parah siatralnak pakhat hnu pakhat a ra thleng ding.

⁶Atu hi a netnak a si. Nan cem zo. Nan cem faizo a si.

⁷Ramsung ih a ummi nannih pawl hrangah cun a netnak a ra thleng cing ding. Tlangsang par khawsia biaknak hmunah lungawi in puai nan tuah nawn lonak tikcu a nai zo; lungawinak puai si nawn loin thubuai in a khatmi caan a si ding.

⁸“Rei lote-ah ka thinhengnak hmual cu nasa zetin nan tong ding. Nan tuahmi ruangah thuṭhennak nan parah ka thlenter ih nan nuncan fihnungza ruangah nan parah phuba ka la ding a si.

⁹Ka lo zuah lo ding, ka lo zaangfah fawn lo ding. Ningsinza thil nan tuah ruangah ka lo hrem ding ih cuticun BAWIPA ka si kha nan thei ding ih a lo hremtu ka si khal hi nan thei ding,” a ti.

¹⁰Israel hrangah siatralnak ni a ra thleng ding. Thisen suahnak a karhzai vivo; puarthaunak a pittawp a thleng.

¹¹Thisen suahnak in ṭhatlonak le sualralnak a suahter sinsin. Anmah ih ta zianghman a taang lo ding: an lennak, an ropitnak le an sunlawinak pawl pakhatte hman a taang lo ding a si.

¹²Tikcu a ra thleng ding. Thil lei le thil zuar timi in tican a neih nawn lonak ni a nai zo, ziangahtile Pathian hremnak cu mi hmuahhmuah parah a thleng ding.

¹³Sumtuahtu zo vek hman a sunmi a ngah sal tiang a nung lo ding; ziangahtile Pathian thinhengnak cu mikip hnenah a thleng a si. Mi ṭha lo pawl cu an luat lo ding.

¹⁴Tawtawrawt an tum ih mi hmuahhmuah an tiar aw; asinain zohman raldonak ah an feh lo; ziangahtile Pathian ih thinhengnak cu mikip parah bangrep in a thleng ding a si.

¹⁵Lamzin ah do awknak a um ih inn sungah rilrawnnak a um. Hramlakih a fehtu pawl cu do awknak ah an thi ding ih khuasungih a um mi pawl cu natnak le rilrawnnak in an thi ding.

¹⁶Mi hrekkhat cu horkuam ihsin thuro dawihlo mi bangin tlangsaang parah an tlan ding ih an luat ding. Zozo khal an sual ruangah an aihram ding.

¹⁷An kut a zawng ṭheh ding ih an khuk a ṭhia ciamco ding.

¹⁸Buri hnipuan an hruk ding ih an ruangpumpi in an ṭhia thlohthlo ding. An sam an met ṭheh ding ih an zate in mualpho in an um ding.

¹⁹An sui le an ngun pawl cu hnawmhne bangin lam lakah an hlon ding, ziangahtile BAWIPA in a thinhengnak a burh tikah cun an sui le ngun pawl cun a run thei lo ding. Cupawl in an rawl hiarnak a riamter lo ih an pum khal a puarter lo. Sui le ngun in sualnak ah a hruai a si.

²⁰A mawizetmi an hlawnthil pawl cu an rak uar zet caan a um; asinain cupawl cu fihnungza milem tuahnak ah an hmang. Curuangah BAWIPA in an lennak pawl cu mitkemza ah a canter.

²¹BAWIPA in, “An hlawnthil pawl cu ramdangmi ka ramter ding. Daan balsiattu pawl in an long ding ih an borhhlawhter ṭheh ding.

²²Sunloih bikmi ka Biakinn hman an borhhlawhter tikah khatlam ka hoisan ding; rukru pawl in an bauh ding ih an borhhlawhter khalle ka umsan men ding.

²³“Ziang hmuahhmuah a buai ṭheh a si: ramsungah thah awknak a khat ih khua pawl cu thisen suahnak in a khat.

²⁴Misual bik phun hitawk ah ka ratter ding ih nan inn pawl ka luahter ding. Miphun dang pawl nan Pathian biaknak hmun ka borhhlawhter tikah cun nan micak bik pawl hman in an ṭih ding.

²⁵Thinpihnak a thleng cing ding. Daihnak nan hawl ding naón nan hmu dah lo ding.

²⁶Siatralnak pakhat hnu pakhat an thlun aw ding ih thuthangsia cu tidai bangin nan hnenah a rung luang ding. Hmuhnak an neihmi phuangsuak dingah profet pawl nan dil ding. Puithiam pawl in mipi pawl zirh ding zianghman an nei lo ding ih upa pawl khal in thusim thei mi an nei lo ding.

²⁷Siangpahrang cu mithi ngai in a um ding; a fapa khal thinpit beidong in a um ding ih misenpi pawl cu ṭihphannak in an khur thlohthlo ding. Nan thil tuahmi ruangah ka lo hrem ding ih midang pawl parih thu nan ṭhen vekin nan parah thu ka ṭhen ve ding a si. Cuticun BAWIPA ka si kha nan hnenah a lang ding,” tiah a ti.