Read Falam Chin DANIEL 1 Bible Online

DANIEL 1 - Falam Chin bible

DANIEL 1

¹Jehoiakim ih Judah siangpahrang a ṭuan kum thumnak ah Babilon siangpahrang Nebuchadnezzar in Jerusalem khawpi cu a do ih a kulh ṭheh.

²BAWIPA in siangpahrang Jehoiakim cu a kaihter ih Biakinn thilri le hlawnthil hrekkhat pawl a lakter. A kaihmi pawl cu Babilon ah a fehpi ih Biakinn thilri a lakmi pawl cu a khawzing pawl ih biakinn thilri retnak khaan ah a ret.

³Siangpahrang Nebuchadnezzar in a kuthnuai ih bawi tum bik pakhat Ashpenaz kha ralkaihmi le thawngthlakmi Israel mi pawl sungin siangpahrang hrin le bawi phun, mino deuh pawl hril dingah thu a pek.

⁴Mi piangzet, mifim, ziangkim ah zirnak a nei ciami, fimvarmi le kutke himmi an si pei ih siangpahrang inn ah hnaṭuan theitu an si pei, tiah a ti. Babilon ṭong an siar thiam le an ngan thiamnak dingah Ashpenaz cu anmah zirhtu a si pei.

⁵Nitinte an ei an inmi cu siangpahrang inn ih ei le inmi rawl le zu a si ve pei. Cutiih kum thum zirnak an neih hnuah siangpahrang hmaiah an suak pei, tiah thu a pek.

⁶Cutiih hrilmi lakah cun Daniel, Hananiah, Mishael le Azariah an tel ve. An pali in Judah hrin ihsin an si.

⁷An bawi upabik cun annih cu hmin thar a sak hai ih an hminthar cu Belteshazzar, Shadrak, Meshak le Abednego ti an si.

⁸Daniel cun siangpahrang inn ih rawl ei tahrat in le zu in tahrat in raithiang lomi si lo ding ah a thinlung a ṭhencat aw; curuangah Ashpenaz cu amah bawm dingin zaangfah a dil.

⁹Ashpenaz khal cu Pathian in Daniel parah zaangfahnak thinlung a neihter;

¹⁰sikhalsehla Aspenaz in siangpahrang a ṭih ruangah Daniel hnenah cun, “Nan ei ding le nan in dingmi hi siangpahrang amah rori ih relcat ciami a si. Curuangah tlangval dang vekin nan cakvak lo a si pang ahcun keimah lehlam in that men ding,” a ti.

¹¹Cutikah Daniel cu amah le a rualpi pathum zohtu dingah Ashpenaz in mikiltu ah a retmi pa hnenah a feh ih,

¹²“Ni hra sung in hniksak aw. Ei dingah hanghnah hangrah le in dingah tidai in pe hnik aw.

¹³Cule tlangval dang siangpahrang inn ih ti le rawl a ei a intu pawl thawn in ṭhim hnik awla cuih par ihsin thu cu ṭhencat sal leh aw,” tiah a ti.

¹⁴Anmah kiltupa cu nihra sung hniksak dingah a lung a kim.

¹⁵Nihra cu a hung kim ih an zoh tikah siangpahrang inn ih ti le rawl a eitu pawl hnakin harhdam sawn le cak sawn in an lang.

¹⁶Curuangah cuih ni thokin anmah kiltupa cun siangpahrang ih pekmi rawl si loin hanghnah hangrah cu a eiter lanta.

¹⁷Pathian in hi tlangval pali cu fimnak, calai lam thiamnak le theihthiamnak a pek. Cuih tlunah Pathian in Daniel cu mang lehtheinak le langnak pawl simfiang theinak a pek.

¹⁸Siangpahrang in tikcu a khiahmi kum thum a kim tikah Ashpenaz in tlangval pawl cu Nebuchadnezzar hnenah a fehpi.

¹⁹Siangpahrang thawn thu an ruah aw ih midang hmuahhmuah hnakin Daniel, Hananiah, Mishael le Azariah pawl in a lung an tong bik. Curuangah siangpahrang inn ih hnaṭuantu ah an cang.

²⁰Siangpahrang in ziangvek thu a suh ih, ziangvek thuharsa a suahter hmanah hi tlangval pali cun a ram ukmi sungih kutṭial zohthiam le mitkher thiam pawl hnakin a lethra in an thei thei deuh.

²¹Persia siangpahrang Sairas in Babilon a neh tiang Daniel cu siangpahrang hnaṭuantu ah a um lanta.