Read Falam Chin DANIEL 5 Bible Online

DANIEL 5 - Falam Chin bible

DANIEL 5

¹Zan khatah siangpahrang Belshazzar in rawl ei-puai tumpi a tuah ih a kuthnuai um bawi le upa pawl thawngkhat a sawm ih hmun khatah zu an in tlang.

²Cutiih zu an in laiah Belshazzar cun Jerusalem Biakinn ihsin a pa Nebuchadnezzar in sui khuathai le ngun khuathai le kheng pawl a rak lakmi kha rak keng dingin thu a pek. Amah le a bawi upa pawl, a nupi pawl le a nusun pawl in zu an innak ding hrangah a cahmi a si.

³A cah vek cun hmakhatte-ah sui khuathai le kheng pawl cu an rak keng ih zu in-nak ah an hmang.

⁴Cuticun sui le ngun, dar le thir, zanthing le lungto tla ih tuahmi khawzing pawl cu an thangṭhat ciamco.

⁵Rinlopi ah milai kut pakhat a lang ih mei-inn vannak ṭhuam zawn phar parah cun ca a ngan. Ca a ngan rerotu kut cu siangpahrang in a hmu.

⁶Cuvete in a mithmai a raam thluh; a ṭih ngaingai ih a khuk a ṭhia ciamco.

⁷Cule mitkher thiam pawl, dawithiam pawl le arsi zohthiam pawl ko dingah mi a auh ciamco. An kawhmi pawl cu an rathleng ih an hnenah siangpahrang in, “Hi canganmi a siar theitu le a sullam i sim theitu cu siangpahrang puansen in thom a si pei, a hngawng ah hminṭhatnak sui ṭhirual a orh ding ih ka uknak sungah thuneihnak lamah pathumnak a si ding,” tiah a ti.

⁸Siangpahrang ruahnak petu pawl cu hmaiah an ra suak ih canganmi cu an zoh naón zohman in an siar thei lo; a tican tla siangpahrang a sim theitu zohman an um lo.

⁹Siangpahrang Belshazzar cu a van a sang ih a hmai a raam sinsin; A bawi upa pawl khal in ziang tuah ding an thei hrimhrim lo.

¹⁰Siangpahrang le a bawi upa pawl mangbang ih an umnak thawmvang cu siangpahrang nu in a theih tikah rawl einak khaan sungah a ra lut ih, ‘Siangpahrang bawipa, na nunkhua sau hram seh! Hi bangtuk in thinhar le hmairaam cun um hram hlah aw.

¹¹Na ramsungah hin khawzing thianghlim pawl ih thlarau a neitu mi pakhat a um. Na pa siangpahrang a rak si laiah cupa cun ruahnak dik le theihnak a neihzia kha a langter zo ih a fimnak tla cu khawzing fimnak bangtuk a si. Curuangah na pa siangpahrang Nebuchadnezzar in kutṭial zohthiam pawl, mitkher thiam pawl, tinzoh thiam pawl le arsi zohthiam pawl ih hotu ah a tuah a si.

¹²Thilti theinak a hleice in a nei; a fimzet ih mangih tican sim le mangbangza theih theinak le thuthuuk sim theinak lamah cun a thiam ngaingai. Curuangah cupa, siangpahrang in Belteshazzar ti ih hmin a sak mi, Daniel cu ko awla amah in a sullam a lo sim thluh ding,” tiah a ti.

¹³Zamrangte in Daniel cu siangpahrang hmaiah cun an rak hruai ih siangpahrang in a hnenah, “Daniel na si maw? Judah mi salih kaihmi, ka pa siangpahrang in Judah ram ihsin a rak hruaimi Daniel na si maw?

¹⁴Khawzing thianghlim pawl ih thlarau na sungah a um ih thiamnak, theihnak le fimnak na nei tiah ka lo thei.

¹⁵Ruahnak i petu pawl le mitkher thiam pawl hi canganmi siartu dingah le a tican i simtu dingah an rak hruai naón a tican an thei thei hrimhrim lo.

¹⁶A thup-awmi ih a tican a sim thei ih thil thuuk tla a sim thei tiah ka lo thei zo. Hi canganmi hi na siar thei ih a tican i sim thei ngaingai a si ahcun siangpahrang puansen in thom na si ding, hminṭhatnak suiṭhi na hngawng ah orh na si ding ih hi ramsung thuneihnak lamah pathumnak na si ding,” tiah a ti.

¹⁷Cutikah Daniel in, “Na laksawng cu na hrangah re ko aw, a si lole midang pe aw. Siangpahrang bawipa na hrangah hi canganmi cu ka siar ding ih a tican ka lo sim ding.

¹⁸“Cungnungbik Pathian in na pa Nebuchadnezzar cu siangpahrang tumzet ah a tuah ih huham a neihter ih mi nasa a siter.

¹⁹A nasa tuk ih phunkip, hnamkip le ṭongkip a ṭongmi in an ṭih ih an khur ciamco. Mi pakhatkhat thah a duh ahcun a that mai, nunter a duh ahcun a nunter mai. A duhduh in mi cu hminṭhatnak a pek ih mualpho khal in a tuah a si.

²⁰Sikhalsehla cutiih puarthau in, thinlungruh in le zaangfah thinpemnak zianghman nei lo ih a um ruangah cun a siangpahrang tokham cu lon a si ih upatnak dinhmun cu a sung a si.

²¹Minung umnak khua le ram in dawihlo a si ih a thinlung cu ramsa thinlung vekah a cang. Hramlak laak lakah a um ih cawcang vekin hrampi a ei ih, humtu le phentu zianghman nei loin leenkolh ah a it ih dai in a tlak. Neta bikah Cungnungbik Pathian in minung ram uknak tlunah thu a nei ih cuih ram uknak cu a duhmi hnenah a pek thei a si, ti kha a run thei ngah.

²²“Sikhalsehla cuih thu pawl cu nang a fapa hin na thei ṭheh naón na thinlung a neem cuang lo.

²³Vancung BAWIPA dodal in hna na ṭuan ih Biakinn ihsin lakmi khuathai le kheng pawl hinah na keng ṭheh. Nangmah le na tlangsuak pawl, na nupi pawl le na nusun pawl in cuih khuathai thawn zu nan in ih sui le ngun, dar le thir, zanthing le lungto thawn tuahmi khawzing pawl nan thangṭhat ciamco. Khua a hmu thei lomi khuavang, zianghman thu a thei thei lo le zianghman theihnak a nei lomi khawzing cu nan cawimawi ciamco. Nan nunnak le nan thihnak tlunih laireltu, na tuahmi hmuahhmuah tlunih thuneitu Pathian sawn cu upatnak zianghman nan pe lo.

²⁴Curuangah hi thu pawl ngantu dingah kut a rak kuatnak cu a si.

²⁵“A nganmi cu, ‘Mene, mene, tekel u-pharsin,’ ti a si.[1]

²⁶Atican cu a tanglam bangtuk in a si: ‘Mene,’ ti cu ‘siar’ tinak a si ih na ram uknak hi Pathian in a ni a siar zo ih a cemter cing ding, tinak a si.

²⁷‘Tekel,’ ti cu ‘cuai thlai’ tinak a si ih thlai na si tikah cuai na kim lo tinak a si.

²⁸‘u-pharsin,’ ti cu ‘ṭhen’ tinak a si ih na ram uknak hi ṭhenṭhek thluh a si ih Media mi le Persia mi hnenah pek a si, tinak a si,” tiah a ti.

²⁹Hmakhatte-ah Belshazzar in Daniel kha siangpahrang puansen hruh dingah le a hngawng ih suiṭhi orh dingah a hnaṭuantu pawl thu a pek. Cutiin a uknak ih thuneitu bik pathumnak ah a tuah.

³⁰Cuih zan rori ah Babilon siangpahrang Belshazzar cu an that ih,

³¹kum sawmruk le kum hnih a timi Media mi Darias in Babilon ram cu a lak a si.[2]