Read Falam Chin DANIEL 7 Bible Online

DANIEL 7 - Falam Chin bible

DANIEL 7

¹Belshazzar in Babilon siangpahrang a ṭuan, kum khatnak ah keimah Daniel mang ka man ih zanah hmuhnak ka nei. Ka mang cu ka ngan ih cuih zanih ka hmuhmi cu,

²hi vekin a si: Khawzakip in thli a hrang ih tipithuanthum tidai tla a sem ciamco.

³Tipithuanthum sung cun sahrang tum zetzet pali an hung suak ih pakhat le pakhat an dang ciar.

⁴Sahrang pakhatnak cu kiosa a bang, asinain muvanlai vekin thla a nei. Cutiih ka zoh laiah a thla cu a tlekcat. Cule sahrang cu an cawisaang ih milai bangin an dinter. Cuih hnuah milai thinlung an neihter a si.

⁵A pahnihnak sahrang cu savom a bang ih a dunglam ke in a ding. A ha in hnakruh pathum a keu ih a hnenah cun, “Na ei thei zat in ei rero ko aw,” tiah aw pakhat in a ti.

⁶Cutiih ka zoh laiah sahrang dang pakhat a hung suak. Tlavang a bang naón a zaang parah thla pali a nei; a thla cu vate thla vek a si. Lu khal pali a nei. A hmuihmel zoh tikah thuneizet ding a bang.

⁷Cumi ka zoh rero laiah a palinak sahrang a hung suak. Huham neizet, ṭihnungza le tuksumza ramsa a si. Thir ha a nei ih an tum zetzet; cuih a thir ha thawn a dehmi pawl cu a ṭam ṭheh ih a palcih hai fawn a si. Sahrang dang vek si loin hi sahrang cun ki pahra a nei a si.

⁸Cutiih a ki pawl ka zoh rero laiah a ki lakah cun ki fate a hung suak ka hmu. Cuih ki fate cun a hmaisa ki pathum cu a thlong hai. Cuih ki fate cun milai mit a nei ih kaa khal a nei ih puarthau zetin a ṭong ciamco.

⁹Cutiih ka zoh rero laiah cun siangpahrang tokham pawl an hun ret. Kumkhua ih a nungmi cu tokham pakhat parah a to. A hnipuan cu vur vekin a rang ih a sam cu tuuhmul vekin a thiangfai. A tokham cu meisa leng parah a um ih a hlio ciamco;

¹⁰meiling cu tidai luang bangin cutawk cun a suak ciamco. Amah riantu dingah minung a thawng a za in an um ih a hmaiah minung a thawngih thawngin an ding. Thuṭhennak cu an thok ih cabu pawl an kau.

¹¹Cutiih ka zoh laiah ki fate in tluang a khawn rero le puarthau zetih a ṭong rero lai hrih ka thei. Cule ka hmuhhngan ah sahrang palinak an that ih a ruak cu meisa sungah an hlon ih cuticun a cemta.

¹²A dang sahrang pawl cu an huham neih mi hmuahhmuah laksak ṭheh an si, asinain an nunnak cu caan tawite sung zuah an si.

¹³Zan ih langnak ka hmuhmi ahcun minung a bangmi pakhat ka hmu. Mero par in a ra ih kumkhua ih a nungmi hnenah cun a feh ih a hnenah a thleng.

¹⁴Cule phunkip, hnamkip le ṭongkip ih ṭongtu pawl in amah an rian theinak dingah a hnenah cun thuneihnak, hminthannak, upatnak le siangpahrang huham hmuahhmuah pek a si. A thuneihnak cu kumkhua in a hmun ding ih a uknak a cem dah lo ding.

¹⁵Langnak ka hmuhmi cun ka thin i phangter ih ka thinlung i buaiter.

¹⁶Cutawkih a dingmi pakhat hnenah ka hung feh ih a tican i simfiang dingah ka hung sut. A sullam cu hiti in i sim.

¹⁷Hi sahrang tum zetzet pali cu leilung tlunih a suak dingmi uknak pali an si.

¹⁸Cule Cungnungbik Pathian ih minung pawl in siangpahrang huham an ngah ding ih kumkhua in kumkhua tiang an cota ding,” a ti.

¹⁹Cule sahrang palinak, sahrang dang thawn a bang-aw lomi, ṭihnungza sahrang, a dar ke-tin le a thir ha thawn a dehmi hmuahhmuah a bohthlek ih a palcih rerotu ih thu theih ka duh.

²⁰A lu parih ki pahra a neihnak, neta ih ki pakhat a hung suahnak le a hung suah ruangih ki pathum an thlongnak thu tla cu theih ka duh. Mit a nei, kaa khal a nei ih puarthau zetin a ṭong ciamco. A dang hnakin ṭihnungza bik a si.

²¹Cutiih ka zoh laiah cuih ki cun Pathian ih minung pawl a do ih a neh.

²²Cule kumkhua ih a nungmi a ra ih Cungnungbik Pathian ih minung pawl ṭan in thuṭhennak a tuah. Pathian minung pawl in siangpahrang thuneihnak an co caan a ra thleng zo.

²³Cuticun ka hnenah in simfiang a si: “Sahrang palinak cu leilung tlunih a hung suak dingmi uknak palinak a si ding ih uknak dang thawn a bang-aw lo ding. Leilung pumpi hi a neh ṭheh, a siatsuah ṭheh ding ih a palcih ciamco ding.

²⁴Ki pahra cu cuih uknak a uktu ding siangpahrang pahra an si. Cule siangpahrang dang pakhat a suak ding; amah cu siangpahrang dang thawn an bang-aw lo ding ih siangpahrang pathum pawl kha a hlon ding.

²⁵Cungnungbik Pathian a relsia ding ih Pathian minung pawl a hrem ding. An biaknak daan pawl le puai pawl thleng a tum ding; Pathian minung pawl cu kum thum le a hrek sung a kuthnuai ah a ret ding.

²⁶Cuih hnuah vancung thuṭhennak a rung um ding ih a huham le a thuneihnak hmuahhmuah cu laksak ṭheh a si ding; siatsuahnak a tong ding ih a hloralta ding.

²⁷Leitlun uknak hmuahhmuah ih huham le maksaknak pawl cu Cungnungbik Pathian ih minung pawl hnenah pek a si ding. An comi siangpahrang huham cu a cem nawn lo ding ih leilungtlun mi uktu hmuahhmuah in an rian ding ih an upat ding,” a ti.

²⁸Himi hi thunetnak a si. Ka ṭih tukih ka raam ṭheh; cuih thu cu ka thinlung sungah ka ret ringring.