Read Falam Chin DANIEL 8 Bible Online

DANIEL 8 - Falam Chin bible

DANIEL 8

¹Belshazzar in siangpahrang a ṭuan kum thumnak ah voihnihnak langnak ka hmu.

²Cuih langnak ka hmuhmi ahcun Elam peng lungdawl ih kulhmi Susa khawpi sungah um in ka thei aw. Ulai Tivapi kapah ka ding ih,

³cuih tivakap ahcun tuucang pakhat, ki saupi pahnih a neimi ka hmu; a ki pakhat cu a dang ki hnakin a sau ih a no deuh fawn.

⁴Cuih tuucang in nitlak lam, saklam le thlanglam a khik rero kha ka zoh. Ramsa dang in an kham thei lo; a mi nehnak cun an luat thei fawn lo. A duhduh in ziang hmuahhmuah a tuah hluahhlo ih a hngalzet.

⁵Cumi ih tican mangbangin ka ngaihtuah rero laiah nitlak lam ihsin mecang pakhat a ra tlan ciamco ka hmu; a tlan a cak tuk ih a ke in leilung a dai man lo. A mit le a mit karlakah a langzetmi ki pakhat a nei.

⁶Tiva kapah a ding ka hmuhmi tuucang lamah cun a feh ih tuucang cu a tha neih patawp in a zon.

⁷Tuucang a zon le a sual lai cu ka zoh. A thin a heng tuk ih tuucang cu nasa zetin a a ki pahnih kiak ko in a khik. Tuucang cun khik ve theinak thazaang zianghman a nei lo. Leilung ah a ril ih mecang cun a palcih a si; a run theitu zohman an um lo.

⁸Cuih mecang cu a puarthau deuhdeuh ih a cah bik laitak ah a ki cu a kiak. Cuih ki pakhat ai ahcun a langzetmi ki pali an hung suak; a ki pali cun saklam, thlanglam, nisuah lam le nitlak lam an hoi fingfing.

⁹Ki pali lakih pakhat sung ihsin ki fate pakhat a hung suak ih a huham cahnak cun thlang lam, nisuah lam le Ram Tiam lam a pan.

¹⁰Van ralkap, arsi pawl do ding tlak in a cak ih a do ih a hrekkhat cu leilungih a hlon hnuah a palcih.

¹¹Van ralkap pawl hotu bawi hman a dodal; nitinte a hnenih an pekmi thawinak cu a kham ih Biakinn a tiborhhlawh a si.

¹²Cutawkah nitin thawinak pek ai-ah minung pawl in sualnak an tuah; biaknak dik cu leilungah hlonthlak a si. A tuahmi hmuahhmuah ah cuih ki cu a hlawhtling a si.

¹³Cule vancungmi pakhat in a dang vancungmi hnenah, “Hi langnak sungih a langmi thil hi ziangtik tiangso a rei ding? Hi bangtuk tuksumza sualnak hin ziangtik tiangso nitin thawinak pekmi cu a ai-awh ding? Ziangtik tiangso van ralkap pawl le Biakinn cu palcih an si hrih ding?” ti ih a sut kha ka thei.

¹⁴Cutikah cuih vancungmi cun, “Hi thil hi zanlam le zinglam thawnghnih le zathum[3] sung a rei ding ih cuih sungah zinglam le zanlam thawinak pekmi zianghman a um lo ding. Cuih hnuah Biakinn cu a hlan vekin a um thei sal ding,” tiah a ti.

¹⁵Cuih langnak ih tican ka ruah rero laiah rinlopi in mi pakhat ka hmaiah a ra ding.

¹⁶Ulai Tivapi tlun ihsin aw pakhat in a rak auh ih, “Gabriel, a hmuhmi ih tican cu a hnenah simfiang aw,” a ti.

¹⁷Gabriel cu a ra ih ka kiangah a ra ding; ka ṭih tukih leilung ah ka bok. Ka hnenah cun, “Milaipa, hi thu hi theithiam aw. Na hmuhmi hi leilung cemnak thuthawn pehawknak a nei a si,” tiah a ti.

¹⁸Cutiih a ṭong rero laiah ka tlu ih zianghman ka thei lo. Sikhalsehla anih cun i tho ih i dinter ih,

¹⁹“Pathian thinhengnak in ziangbangtuk thil a suahter ding tihi ka lo hmuh a si. Na hmuhmi langnak hi caan neta bik thawn pehtlaihnak a nei a si.

²⁰“Ki pahnih a neimi tuucang na hmuhmi kha Media le Persia uknak can-ai a si.

²¹Mecang kha Grik uknak can-ai a si ih, a mit karlakih a langzetmi ki kha an siangpahrang hmaisa bik can-ai a si.

²²Ki pakhat a kiah hnu ih ki pali a hung suakmi kha an ram a ṭhen awk ṭheh hnu ih a hung suak dingmi uknak pali can-ai an si; hi uknak pali hi hmaisa uknak tluk cun an cak lo ding.

²³“Cuih uknak pawl an cem zik cuahco thlang ih an siatvaat tuk ruangih hremnak an tuar tikcu a hung kim cuahco tikah mi lungruh, mi sualral le mi bumhmang siangpahrang pakhat a hung suak ding.

²⁴A cak vivo ding, asinain a cahnak cu amah ih thilti theinak ruangah a si lo ding. Siatsuahnak nasa zetin a suahter ding ih a tuahmi hmuahhmuah ah a hlawhtling ding. Mi cak zetzet le Pathian ih minung pawl parah siatnak tampi a thlenter ding.

²⁵Mi depde a si ruangah bumnak in thil a ti thei vivo ding. A zum aw ngaingai ding ih rinloparal ah mi tampi a tisiat ding. Siangpahrang lakih siangpahrang maksak bik hman a dodal ding; sikhalsehla amah cu milai cahnak tel lotein siatsuahnak a tong ding.

²⁶Na hnenih simfiang zo a si mi zinglam le zanlam raithawinak pekmi thu ih langnak na hmuhmi cu a ra kim ngaingai ding. Sikhalsehla thuthup ah ret aw, ziangahtile a kimnak dingah tikcu a rei hrih ding a si,” tiah i ti.

²⁷Ka thin a har ih ni tam nawn sung ka dam lo. Cuih hnuah ka tho ih siangpahrang ih fialmi hna cu ka ṭuan thei sal. Asinain ka hmuhmi cun ka mang i bangter ih ka theih thei mi a si lo.