Read Falam Chin HOSEA 1 Bible Online

HOSEA 1 - Falam Chin bible

HOSEA 1

¹Judah siangpahrang Uzziah, Jotham, Ahaz le Hezekiah pawl siangpahrang an ṭuan san le Israel siangpahrang, Joash fapa Jeroboam in siangpahrang a ṭuan laiah BAWIPA ih thu cu Beeri fapa Hosea hnenah a ra.

²BAWIPA in Israel miphun hnenih a ṭong tikah hmaisa bik ah Hosea hnenah, “Feh awla nupi va ṭhi aw; na nupi cu hlawhhlang a si ding ih na faale pawl khal an nu vek an si ding. Ka miphun in in tlansan zo ih hlawhhlang phun ah an cang zo,” tiah a ti.

³Curuangah Hosea cun Gomer a ṭhit. Gomer cu Diblaim fanu a si. Fa a vun ih fapa a hring.

⁴Cutikah BAWIPA in Hosea hnenah, “A hminah ‘Jezreel,’ sak aw; ziangahtile Israel siangpahrang ih pu Jehu in Jezreel khua ih mi a rak thah ruangah a rei hlanah Israel siangpahrang ka hrem ding a si. Jehu tesinfa pawl ih uknak san cu ka cemter ding.

⁵Cule Jezreel phairawn ah Israel ralkap pawl ih cahnak cu ka siatsuah ṭheh ding a si,” tiah a ti.

⁶Gomer in fa pahnihnak a hun nei ih fanu a si. Cule BAWIPA in Hosea hnenah, “A hmin ah ‘Lo-ruhamah,’[1] sak aw; ziangahtile Israel mi pawl cu ka lainat nawn lo ding ih ka ngaidam nawn lo ding.

⁷Asinain Judah mi pawl cu ka lainat ding. BAWIPA an Pathian keimah in ka run ding; asinain cutiih ka run tikah raldonak ralnam, li le thal, rang le rangralkap thawn ka run lo ding,” tiah a ti.

⁸Gomer in a fanu cu pawhte fawp a baanter hnuah fa a vun sal ih fapa a hring.

⁹Cutikah BAWIPA in Hosea hnenah, “A hmin ah ‘Lo-ammi,’[2] sak aw; ziangahtile nannih Israel mi cu ka minung nan si lo ih kei khal nan Pathian ka si lo,” tiah a ti.

¹⁰Israel miphun cu tifinriat ih vunnel zat an si leh ding; tah cawk lo le siar cawk lo an si ding. Atu-ah Pathian in, “Israel cu ka minung a si lo,” a ti. Asinain “Nannih cu a nungmi Pathian ih faate nan si,” a ti ni a ra thleng leh ding.

¹¹Judah mi le Israel mi cu an kom-aw sal ding. Anmah hrangah hruaitu pakhat an hril ding ih a hlanlai vekin an ram sungah an karhzai ding ih an ṭhangso ding. Asi, Jezreel[3] san cu san maksak a si ding.