Read Falam Chin HOSEA 13 Bible Online

HOSEA 13 - Falam Chin bible

HOSEA 13

¹Hlanlai ahcun Efraim hrin an ṭong tikah hrin dang pawl in an rak ṭih ṭheu. Israel hrin dang pawl in Efraim hrin cu an rak zohso. Asinain Baal khawzing biaknak in an sual ih curuangah annih cu an thi.

²An sual sinsin ih biak dingah thir in milem an tuah. Minung thinlung in suai copmi ngun milem pawl minung kut in an tuah. Cule, “Cuih milem hnenah raithawinak pek uh,” tiah an ti. Ziangtin so minung in cawcang hmel cuangih tuahmi cawlem cu an hnam thei!

³Curuangah hi minung pawl cu zinglam suumzing bangin an hlo ding, daitla bangin an hloral ding a si. Fang cilnak puum ihsin thli ih a seemmi fanghi bangtuk an si ding; meikhu suahnak ihsin a suakmi meikhu vek an si ding.

⁴BAWIPA in, “Izipt ihsin a lo hruaisuaktu cu keimah, BAWIPA nan Pathian hi ka si. Keimah siar lo Pathian dang nan nei lo. Keimah lawng hi nanmah runtu ka si.

⁵Thlaler ramṭhing le ramcaar ah ṭhatein ka lo kilkhawi.

⁶Asinain ram ṭha sungih nan luh tikah nan pum a puar ih nan hna a ngam; cule nan puarthau ih kei cu in hngilh.

⁷Curuangah kiosa bangin ka lo nam ding. Tlavang bangin nan fehnak lamzin ihsin ka lo bawh ding.

⁸A fano lonmi savompi bangin ka lo zon ding ih ka lo bauhthlek ṭheh ding. Kiosa bangin nan hmun rori ah ka lo maai ṭheh ding ih sahrang bangin cipseksek in ka lo thlek ṭheh ding.

⁹“Maw Israel mi pawl, Keimah in ka lo siatsuah ding! Zoso a lo hum thei ding?

¹⁰Siangpahrang le hruaitu nan ngen. Asinain atu khuiah so an si? Ziangtin so ram pumpi an hum thei ding?

¹¹Ka thinheng in siangpahrang ka lo pek zo ih ka thinheng ah ka lak sal zo.

¹²“Israel ih sualnak le mawhnak cu cazual parah ṭhatein nganmi a si ih ṭhatein retkhummi a si.

¹³Israel cu nun theinak tikcu ṭha a nei, asinain a aat ruangah cuih tikcu ṭha cu a laak hna a thiam lo; amah cu a rung suak zikmi naute a nuih pum sungih suah duh lo ih a kir salmi bangtuk a si.

¹⁴Himi pawl cu mithi khua Sheol[9] ihsin ka run suak lo ding; thihnak kut sung khal in ka sansuak lo ding. Maw Thihnak, na pulhnat cu run keng hnik aw! Maw Sheol, na mi siatsuah theinak thawn ra aw! Himi pawl parah zaangfahnak zianghman ka nei thei nawn lo.

¹⁵Israel cu phaikung bangin no hngualhngi hmansehla nelrawn ihsin nisuahnak lam thli sa ka hrangter ding ih an tipuut le an tikhur pawl a caar ṭheh ding. A thil mankhung hmuahhmuah a siat ṭheh ding.

¹⁶Pathian a dodal ruangah Samaria cu hrem a si ding ih a ṭio ding. A minung pawl cu ral kut in an thi ding. An faate pawl cu leilung ah denthat an si ding ih an nunau fa vun lai pawl cu an pum zaithlek an si ding,” tiah a ti.