Read Falam Chin HOSEA 14 Bible Online

HOSEA 14 - Falam Chin bible

HOSEA 14

¹Maw Israel mi pawl, BAWIPA nan Pathian hnenah ra kir uh. Nan sualnak ruangah nan bah zo ih nan tlu zo.

²BAWIPA ih hnenah kir uhla hiti in thlacam uh: “Kan sualnak hmuahhmuah in ngaidam hram aw; kan thlacamnak in sang awla kan lo kam cia vekin kan lo thangṭhat ding.

³Assiria cun in run thei dah lo ding; kan rangleng pawl cun in hum thei fawn lo ding. Kan kut ih tuahmi kan milem pawl hnenah, ‘Nang cu kan khawzing na si,’ tiah kan ti nawn lo ding. Maw BAWIPA bawmtu dang nei lo pawl hnenah zaangfahnak pek ṭheutu na si,” ti uh. BAWIPA in hiti in a ti:

⁴“Ka minung pawl ih hlawhhlannak le vahvaihnak cu ka damter ding; Ka thinlung ngaingai in ka duhdawt hai ding. Ka thinhengnak cu an hnen ihsin a pialsan zo.

⁵Israel mi hrangah cun ramcaar ih ruahti bangtuk ka si ding; Lili pangpar bangin an par ding, Lebanon thingkung bangin hnget zetin an kho ding.

⁶A hnge a thar in a cerh ding ih, Olif thing vekin a mawi ding. Lebanon in sidar thing bangin An rim a thaw ding.

⁷Keimah ih thladem thuaiah an um sal ding. Hmuan ah thlaikho an ciing ding ih, Sabit hmuan ih sabit bangin an rah ding. Lebanon sabitti bangin an hmin a thang ding.

⁸Israel mi pawl cu milem thawn Pehtlaihnak an nei nawn lo ding; An thlacamnak cu ka thei ding ih Ka kilkhawi ringring hai ding. A hnah a hring ringring mi thingkungpi bangin, Ka thladem thuaiah ka ret ding. Keimah cu an thlawsuahnak hrampi ka si,” a ti.

⁹Mifim hmuahhmuah in hitawk ih nganmi hi thei hai sehla theihthiamnak nei in an thinlung in ciing ṭha hai seh. BAWIPA ih lamzin cu a dik ih miding pawl cun cumi lamzin an thlun. Asinain cuih lamzin an zawh lo ruangah misual pawl cu an bah ih an tlu.