Read Falam Chin HOSEA 4 Bible Online

HOSEA 4 - Falam Chin bible

HOSEA 4

¹BAWIPA in hi ram sungih a ummi pawl parah mawhthluknak a nei a si. Maw Israel, a simmi hi ngai hnik: “Hiram sungah hin duhdawtnak a um lo ih rintlak sinak khal a um lo. Minung pawl in an Pathian ah in ruat lo.

²Mi an camsiat, thuphan an per, mi an that, ruk an ru, nupi le pasal pawl in midang an ngai san. Thisen luannak a karh vivo ih mi thahnak pakhat hnu pakhat a um.

³Curuangah hi ram cu a caar ding ih ram sungih nunnak a neimi hmuahhmuah an cau ṭheh ding. Ramsa le vate hmuahhmuah le nga hman an thi ṭheh ding,” a ti.

⁴BAWIPA in, “Zohman in misenpi pawl mawhthluk hlah hai seh; a kawk khal kawk hlah hai seh. Ka mawhthluk mi cu nanmah puithiam pawl nan si.

⁵A sun a zan in sualnak poimawh nan tuah; nannih hnakin profet pawl an ṭha cuang fawn lo. Nan nu Israel hi ka siatsuah ding.

⁶Ka minung pawl in keimah in theih duh lo ruangah an cem thla ding. Nannih puithiam pawl khal in in thei duh lo ih ka thuzirhmi pawl nan hlon. Curuangah nannih cu ka lo hnong ih nan fapa pawl khal ka puithiam an si thei nawn lo ding.

⁷“Puithiam nan tam deuhdeuh ih ka parah nan sual deuhdeuh. Upat tlak nan sinak cu nan mualphonak ah ka tuah ding.

⁸Ka minung pawl ih sualnak thawngin milian ah nan cang; curuangah tam sinsin in sualter nan duh.

⁹Misenpi vek thotho in cawhkuannak nan tuar ve ding. Thil ṭha lo nan tuah ruangah ka lo hrem ding ih ka lo cawh ding.

¹⁰Raithawinak pekmi sungin nan covo cu nan ei ding naón nan ril a rawng thotho ding. Hlawhhlang nan ṭuan ih punzainak khawzing nan bia rero ding naón faate nan nei cuang lo ding, ziangahtile khawzing dang thlun duh ah ka hnen ihsin nan pial a si,” tiah a ti.

¹¹BAWIPA in, “Zu thar in siseh zu hlun in siseh ka minung pawl ih thinlung a hloter ṭheh.

¹²Thingtan hnenah tin an leeng, funghreu in an duhmi a rak sim. Curuangah kei cu in tlansan. Hlawhhlang ih a cangmi nunau vekin annih cu khawzing dang hnenah an pe aw.

¹³Tlangzim hmunthiang ah thawinak an tuah ih tlangpar thingpi sang sasua kiing daihnem ṭha hnuai ah rimhmui an ur. “Curuangah nan fanu pawl cu hlawhhlang ah an cang ih nan fapa ih nupi pawl cu mipa dang thawn an sual.

¹⁴Asinain hi ruangah ka hrem hai lo ding; ziangahtile nanmah hman biakinn hlawhhlang[6] pawl hnenah nan feh ih anmah thawn hmunkhat ah thawinak nan pek. Thufim ih a um vekin, ‘Ruahnak nei lo miphun cu an siat ding.’

¹⁵“Nannih Israel mi pawl cu ka hrangah hlawhhlang ah nan cang zo naón Judah mi cu cuvekin si hram hlah hai seh. Gilgal a si lole Bethaven[7] ah i bia hlah hai seh. Cutawk hmunah a nungmi BAWIPA ih hmin in thukamnak tla tuah hlah hai seh.

¹⁶Israel mi pawl cu laak lungruh bangin an lung a ruh a si. Ziangtin so tuufaate bangin tlimno lakah ka cawm thei ding?

¹⁷Israel mi pawl cu milem in a ham ṭheh a si. An duhnakah feh hai seh.

¹⁸Zu tampi an in hnuah hlawhhlang an ṭuannak ah nuam an ti zet ih hmin ṭhatnak hnakin thangsiatnak an duh sawn.

¹⁹Phusiing ih semhlomi vekin ṭhekdarh ṭheh an si ding ih an khuavang biaknak cu an zahpi ding.