Read Falam Chin HOSEA 8 Bible Online

HOSEA 8 - Falam Chin bible

HOSEA 8

¹BAWIPA in, “Tawtawrawt tum uh! Ka ram sungah ral pawl cu muvanlai vekin an rung zam. Ka minung pawl in anmah thawn ka thukammi an bal ṭheh ih ka thuzirhmi cu an duh lo a si.

²Kan Pathian a si, kannih cu amah ih minung kan si ih amah cu kan thei a si, an ti naón,

³thil ṭha an dungtun ṭheh a si. Curuangah an ral pawl in an dawi ding.

⁴“Ka minung pawl in siangpahrang an hril, asinain anmah ih thu in an hril. Hotu khal an hril, asinain keimah ih lungkimnak a tel lo. An sui le an ngun an suah ih milem ah an tuah; anmah siatsuah awknak hrangah!

⁵Samaria khawpi sung mi pawl in sui cawcang an biak khi ka hua! An parah ka thin a heng ngaingai a si. Milem hi ziangtik tiangso an biak ding? Ziangtikah so an bang ding?

⁶An milem cu Israel mi kutzungthiam pa ih tuahmi a si; Pathian ngaingai hman a si lo! Samaria ih an biakmi sui cawcang cu denkuai ṭheh ding a si.

⁷Thli an vorh ih thlipi an khawm ding! A vui um lomi rawl kung cun rawl a suah thei dah lo ding. Rawl a suah thei hmanah ramdangmi in an ei ding.

⁸Israel cu dolh-mi miphun a si zo; miphun dang pakhat vekah a cang zo ih beel kuai vekin hman tlak lo a si thlang.

⁹Hramlak laak bangin a lung a ruh ih amah ih duhmi lamzin lawng a thlun. Assiria bomnak dil duh ah a va tlan. Miphun dangih humnak duh ah a ngaimi hnenah paisa a pek.

¹⁰Miphun dang hnenah a zuar-aw naón atu-ah ka finkhawm sal ding. Reilote-ah Assiria siangpahrang in a hrem ding ih harsatnak nasa zetin an tuar ding.

¹¹“Israel mi pawl in an sual thianfainak dingah biakṭheng tam deuhdeuh an tuah; asinain cuih biakṭheng pawl cu an sualnak hmun ah a cang.

¹²Misenpi hrangah a siar ih siar cawk lo thuzirhnak ka ngan, asinain thu lamdangpi a si-aw, tiin an thlun duh lo.

¹³Thawinak pek cu an paih zet; thawinak sa ei tla an duh zet. Sikhalsehla keimah an BAWIPA cu an parah ka lung a awi lo. An sualnak ka ciing ding ih cuih sualnak ruangah ka hrem hai ding. Cule Izipt ram ah an kir sal ding.

¹⁴“Israel mi pawl in inn ṭhaṭha tampi an sak, asinain anmah siamtu cu an hngilh. Judah mi pawl in phardawl ih kulhmi khawpi tampi an din. Sikhalsehla an khua le an inn ṭhaṭha pawl kaang ṭheh dingah meisa ka thlah ding,” tiah a ti.