Read Falam Chin JOEL 3 Bible Online

JOEL 3 - Falam Chin bible

JOEL 3

¹Judah le Jerusalem mivannei ih ka tuah ni le tikcu ahcun,

²miphun hmuahhmuah cu hmunkhat ah ka ko khawm ding ih, BAWIPA ih Thuṭhennak Horkuam[1] ah ka vun hruai hai ding. Ka miphun a si mi Israel ai-awh in an thu ka ṭhen ding. Ziangahtile ka minung pawl an ram sung ciar ah an ṭhekdarh hai ih ka ram cu an ṭhen aw ṭheh.

³Ka minung pawl cu camcawhfung zuuk in an zem aw. Cuih tlunah mipa nauhak le nunau nauhak salah an zuar ih an ngahmi paisa in hlawhhlang an leeng ih zu in dingah zu an lei.

⁴Ka hrangah ziangso nan si nannih Ṭaiar le Sidon le Filistin ram pawl? Ka parah phuba lak nan tum maw si? Ka parah ziangtal phuba lak theimi nan nei maw? Nan neih a si ahcun cakzet le zamrang zetin nan thil tuahmi cu nan lu parah ka kirter ding.

⁵Ziangahtile ka sui le ka ngun le ka hlawnthil sunglawi pawl cu nan biakinn ah nan thiar ṭheh.

⁶Judah le Jerusalem mi pawl cu an ram ihsin lamhlapi ah nan fehpi ih Grik mi pawl hnenah nan zuar.

⁷Sikhalsehla nan zuarnak hmun ahcun ka forh hai ding ih cuih hmun cu an tlansan ding. Nan thil tuahmi cu nan lu parah ka kirter ding.

⁸Nan fanu le nan fapa pawl Judah mi hnenah ka zuar ding ih annih in lamhlapi ih a ummi Seba mi hnenah an zorh ding. BAWIPA in a sim zo.

⁹“Hi thu hi miphun hmuahhmuah hnenah than uh; Raldo dingah timtuah uhla nan ralkap tho hai seh. Raldo ding hmuahhmuah cu hmunkhat ah tong aw in feh hai seh.

¹⁰Nan lei lehnak tuhmui pawl cu ralnam ah ser uh; Nan thingfa cehnak cehrep cu feipi ah tuah uh. Mi derdai bik khal in do ve hai seh.

¹¹Zamrang in ra suak uh, Kiangkap miphun hmuahhmuah, Cutawkah tongkhawm aw uh,” a ti. Maw BAWIPA, na ralkap pawl, raldo dingah run kuat aw.

¹²“Miphun hmuahhmuah in raldo dingah pok hai seh; BAWIPA ih Thuṭhennak Horkuam ah feh hai seh. Ziangahtile miphun hmuahhmuah thuṭhen dingah, Cutawkah ka to ding.

¹³“Rawl ah a cu, namkawi suah uh; Ra uh, sabit ra sawr uh. Sabit sawrnak khur a khat, ralca beel an liam. An sualnak a nasa ngaingai a si.

¹⁴Mi thawng tampi an um, Thuṭhennak Horkuam sungah. Thuṭhennak Horkuam ah BAWIPA ih ni a nai zo.

¹⁵Ni le thlapi cu an thim. Arsi an tleu nawn lo.

¹⁶BAWIPA cu Zion ihsin a hruum ding; Jerusalem ihsin a aw a suah ding. Cutikah lei le van an hnin ṭheh ding; Asinain a minung hrangah BAWIPA cu an beunak a si; Israel hrangah amah cu an himnak ṭanhmun a si.

¹⁷“Cutiin keimah cu BAWIPA nan Pathian ka si kha nan thei ding; Ka tlang thianghlim Zion ih a ummi ka si! Jerusalem cu khua thianghlim a si ding; Ram dangmi zohman in, Jerusalem khua sung an pal thei lo ding.

¹⁸Cuih ni ahcun tlangsaang ihsin Sabitti a puut ding; Tlang fatete ihsin cawhnawi a luang ding. Judah ram tiva hmuahhmuah ah tidai an luang ding; BAWIPA ih inn ihsin cirhti a puut ding ih, Sittim phairawn in tidai a ngah ding.

¹⁹“Asinain Izipt cu nelrawn ro ah a cang ding ih, Edom ram cu thlaler ramṭhing ah a cang ding. Ziangahtile Judah ramah thil poimawh an tuah ih, Mawh neilo thisen an suahter ruangah a si.

²⁰Sikhalsehla Judah ramah kumkhua in minung an tlangleng ding; Jerusalem ah cat loin minung an um ding.

²¹An thisen man cu keimah in phuba ka la ding; BAWIPA keimah cu Zion ah ka um ding,” a ti.