Read Falam Chin AMOS 1 Bible Online

AMOS 1 - Falam Chin bible

AMOS 1

¹Hi thu cu Tekoa khuami tuukhal Amos ih simmi a si. Linghnin hlan kum hnih, Judah siangpahrang ah Uzziah a si ih Israel siangpahrang ah Joash ih fapa Jeroboam a si laiah Pathian in Israel thuhla Amos hnenih a langtermi a si.

²Amos in, “BAWIPA cu Zion ihsin a hrum durdo; A aw cu Jerusalem ihsin khawri bangin a thang. Tuu an tlannak hrampi a ro ṭheh, Karmel Tlang parih hrampi an caar zo,” a ti.

³BAWIPA in, “Damaskas khuami pawl atu le tu an sual ruangah ka hrem ding. Gilead mi pawl zaangfahnak nei loin thir ha bunmi fangrialnak thingtum thawn an rialsiat hai.

⁴Curuangah Syria siangpahrang Hazael inn parah meisa ka thlak ding ih siangpahrang Benhadad ih ral ṭannak pawl a kaang ṭheh ding.

⁵Damaskas kotka pawl ka khiak ṭheh ding ih Betheden uktu le Aven phairawn ih um pawl ka dawihlo hai ding. Syria rammi pawl Kir ramah salih hruai ṭheh an si ding,” tiah a ti.

⁶BAWIPA in, “Gaza mi pawl cu atu le tu an sual ruangah ka hrem tengteng ding. An miphun pumpi in Edom ram ah sal ah an zuar ṭheh.

⁷Curuangah Gaza ih khawkulhnak phardawl parah meisa ka run thlak ding ih an inn ṭha pawl hmuah thawn a kaang theh ding.

⁸Ashkelon khua uktu pawl cu ka hlon ding. Ekron khua cu ka hrem ding ih a taanglai mi Filistin pawl cu an thi ṭheh ding,” tiah a ti.

⁹BAWIPA in, “ṭai-ar khua mi pawl cu atu le tu an sual ruangah ka hrem tengteng ding. An miphun pumpi in Edom ram ah salah an hruai ṭheh. Pawlkomnak thukam an tuahmi cu an thlun lo.

¹⁰Curuangah Ṭaiar khua ih khaw kulhnak phardawl pawl parah meisa ka run thlak ding ih an inn ṭha pawl hmuah thawn a kaang ṭheh ding,” tiah a ti.

¹¹BAWIPA in, “Edom mi pawl cu atu le tu an sual ruangah ka hrem tengteng ding. An unau Israel mi pawl zaangfahnak nei loin nam thawn an dawi. An thinhengnak cu tawp ti a nei lo ih a reh thei dah lo.

¹²Curuangah Teman khua parah meisa ka run thlak ding ih Bozrah inn ṭha pawl a kaang ṭheh ding,” tiah a ti.

¹³BAWIPA in, “Ammon mi pawl cu atu le tu an sual ruangah ka hrem tengteng ding. Mi ram an nor ih ral an do tikah Gilead ah favun nunau pawl an raithlek ṭheh.

¹⁴Curuangah Rabbah khua ih khawkulhnak phardawl parah meisa ka run thlak ding ih an inn ṭha pawl a kaang theh ding. Cule raldo awk ni ahcun aunak a tam ding ih an do awknak cu thlisia bangin a hrang ding.

¹⁵An siangpahrang le a kut hnuai bawi pawl salah an kai ding,” tiah a ti.