Read Falam Chin AMOS 3 Bible Online

AMOS 3 - Falam Chin bible

AMOS 3

¹Maw Israel mi pawl, Izipt ram ihsin nan miphun pumpi in BAWIPA in a lo hruaisuak zo ih nanmah ih thuhla ah a simmi hi ngaihnik uh:

²“Leilung tlun miphun hmuahhmuah lakah nanmah lawng hi ka theih mi le ka kilkhawi mi nan si. Cucing in nan sual; curuangah ka lo hrem ding,” a ti.

³Lungkim tlang loin mi pahnih hmunkhat ah khual an tlawng tlang thei maw?

⁴Kiosa cu dehmi sa nei loin tupi sungah a huuk maw? Kiosa no cu dehmi sa nei loin a kua sungah a hngirhngir maw?

⁵Vate cu thang tarh um loin awh a theih maw? Thang cu a pelhtertu um loin a pelh thei maw?

⁶Raldonak tawtawrawt khua sungih an tum tikah khawsungmi thinphang loin an um maw? BAWIPA ih thlenter loin khawsungah harsatnak a thleng dah maw?

⁷Cungnungbik BAWIPA in a riantu profet pawl hnenah a tumtahmi phuangta loin hna a ṭuan dah lo.

⁸Kiosa a hrum tikah zoso ṭih loin a um thei? Cungnungbik BAWIPA a ṭong tikah tlang-aupi loin zoso a um thei ding?

⁹Izipt le Ashdod siangpahrang inn sungih um pawl hnenah, “Samaria kimvel ih tlang ah tongkhawm aw uhla cutawkih thil sualral an tuahmi le a sungih hnahnawhnak nasa zet tla hi zohhnik uh,” tiin than uh.

¹⁰BAWIPA in, “Himi pawl in an siangpahrang inn sung cu sualralnak le thisen luannak thawn an lakmi thilri in an khahter. Ziangtiih mifel si ding, ti khal an thei nawn lo.

¹¹Curuangah an ram ral in an kulh ding. An ṭankhuarnak hmun pawl an siatsuah ding ih an siangpahrang inn cu an ram ding,” tiah a ti.

¹²BAWIPA in, “Tuukhal in kiosa ih dehmi tuu a hawl tikah a ke pahnih le a hna lawng a runsuak vekin Samaria khua ih um Israel mi pawl khal an todan kil le an ihkhun ke thawn lawng an luat thei ding.

¹³Ṭhatein ngai uhla Jakob ih tesinfa pawl cu ralrinnak thu sim uh,” tiah Cungnungbik Ziangkimtithei BAWIPA in a ti.

¹⁴“An sualnak ruangih Israel ka hrem ni ah Bethel ih biakṭheng pawl khal ka siatsuah ṭheh ding. Biakṭheng ih ki pawl khal ka khiak ding ih leilung ah an tla ṭheh ding.

¹⁵Ṭhal inn siseh, thlatang inn siseh ka balsiat ṭheh ding. Saiho ih ceimawimi inn pawl le inn tumpi dang pawl khal ka siatsuah ṭheh ding,” a ti.