Read Falam Chin AMOS 5 Bible Online

AMOS 5 - Falam Chin bible

AMOS 5

¹Maw Israel mi pawl, mithi phumnak hla ka lo saksanmi hi ngaihnik uh:

²Fala him Israel cu a cem zo, A tho sal nawn lo ding. Leilung ah a ril zo, Amah thotu an um lo.

³Cungnungbik BAWIPA in, “Israel ramsung khua pakhat in ralkap thawngkhat a thlah; asinain zakhat lawng an ra tlung. Khua dang pakhat in zakhat a thlah ih pahra lawng an ra kir,” a ti.

⁴BAWIPA in Israel mi hnenah, “Ka hnenah ra kir uhla nan nung ding.

⁵Khawzing biak dingah Beersheba ah feh hlah uh; Bethel ah i hawl duh hlah uh; Bethel cu zianghman a si lo ding. Gilgal khalah va feh hlah uh; a minung pawl sal ah hruai an si ṭheh ding,” a ti.

⁶BAWIPA hnenah feh uhla nan nung ding. Nan feh lo asile nan parah meisa hlio bangin BAWIPA a thleng ding. Bethel mi pawl cu meisa in a kaang ding; zohman in an hmit thei lo ding.

⁷Dingthluk lairelnak kha merh tahrat in felnak kha leiah a deengtu nannih pawl cu nan cem ding.

⁸BAWIPA in arsi tla a tuah, Siruk rawlṭawm le zaangkhua pawl; Thimnak cu sun nitleu ah a tuah, Sun cu zan ah a canter. Tifinriat tidai pawl a ko ih Leilung parah a toih. A hmin cu BAWIPA a si.

⁹Micak pawl le an ṭanhmun ralhruang pawl cu a siatsuah ṭheh.

¹⁰Nannih pawl cun thuṭhennak zungih dinglonak a phuangtu le thudik a reltu pawl nan hua.

¹¹Mi rethei zonzai pawl nan namsuk ih an rawl nan long. Curuangah nan sakmi lungto inn ṭhaṭha sungah hin nan um lo ding ih sabit hmuan mawi sungih nan ciinmi sabitti nan in lo ding.

¹²Nan sualnak tuksumza a sizia le thil sual nan tuahmi a tam zia hi ka thei ṭheh. Miṭha nan hrem, nawhthuh nan la ih farah zonzai pawl parah dingthluk lairelnak thawn thu nan rel lo.

¹³Curuangah cuih tikcu caan ahcun thuruat thiam mifim pawl cu daitein an rak um. Ziangahtile cuih caan cu caan sia a si.

¹⁴Thil ṭha lo bansan in thil ṭha tuah uh; cuti asile nan nung ding. Ziangkimtithei BAWIPA Pathian cu kan hnenah a um nan ti vekin a um ngaingai ding.

¹⁵Thil ṭha lo hua uh, thilṭha duh uh; thuṭhennak zungah dingthluk lairelnak kha lal seh. Cuti asile Josef hrin a taangsun parah BAWIPA in zaangfahnak a nei hrih ding.

¹⁶Curuangah Cungnungbik BAWIPA Ziangkimtithei in, “Khawsung lamzin ah ṭahnak le ai-hramnak a um ding. Lothlo pawl an ko ding ih ṭah man pekmi pawl thawn mithi an ṭah tlang ding.

¹⁷Sabit hmuan kip ah ai-hramnak a um ding. Ka lo hrem ding ruangah cupawl cu a kim ṭheh ding,” a ti. BAWIPA in a sim zo.

¹⁸Bawipa ni a hngakhlaptu pawl nan hrangah ṭihnungza a si. Cuih ni in ziangso a lo ṭhathnempi ding? Nan hrangah thimnak ni a si ding, tleunak ni a si lo ding.

¹⁹Kiosa ṭih ah a zaam ih savom tongtu bangtuk a si ding. Asilole inn ah ra tlung in phar zuut na khaw rul cuk tongtu bangtuk a si ding.

²⁰Bawipa ni in tleunak si loin thimnak a thlenter. Tleunak malte hman um lo a thim bepbepmi ni a si.

²¹BAWIPA in, “Biaknak puai nan tuahmi pawl hi ka hua ih ka mit an kem.

²²Mei-ur thawinak le sangphut thawinak in rak pekmi pawl hi ka saang lo ding; thawinak hrangah tiah thau zetih nan cawmmi ṭilva pawl khal ka saang lo ding.

²³A ringzetmi nan hla pawl hi bang thlang uh; nan ṭingṭang awn pawl hi ka ngai paih nawn lo.

²⁴Dingthluk lairelnak cu tivapi bangin luang sehla felnak cu a kaang dah lomi ti bangin luang sawnseh.

²⁵“Maw Israel mi pawl, hramlak ih kum sawmli sung ka lo hruai laiah khan thawinak le peknak zianghman ka lo ngen lo.

²⁶Atu cu nan khawzing le siangpahrang a si mi Sakkuth zuk le nan arsi khawzing Kaiwan[2] ih lem pawl nan biak ruangah,

²⁷Damaskas pawnlam ram ah salih ka lo hruai tikah cuih milem pawl cu nan ken ṭheh a ṭul ding,” tiah BAWIPA in a ti. A hmin cu Ziangkimtithei Pathian a si.