Read Falam Chin OBADIAH 1 Bible Online

OBADIAH 1 - Falam Chin bible

OBADIAH 1

¹Edom ram thuhla ah BAWIPA Pathian in Obadiah hnenih a simmi langnak cu, BAWIPA in miphun pawl lakah a tlang-autu a thlah ih a tlang aumi kan theih mi cu: “Nan tim tuah uh, Kan zatein tho in Edom kha do uhsi,” ti a si.

²Edom hnenah BAWIPA in, “Zohhnik, miphun lakah phunnau bikah ka lo tuah ding; Hmuhsuam nautatmi na si ding.

³Na hngalnak in a lo bum ngah zo. Lungpuk sungah na um ih, Hmun sangzet ih na um ruangah na thinlung cun, ‘Zoso i dir thla theitu ding?’ tiah na ti.

⁴Muvanlai bangin vansaangzet ah zuang in na bu cu arsi lakah sak hman awla, Ka lo dir thla thotho ding,” tiah BAWIPA in a ti.

⁵“Zan ah rukru ra hai sehla, An lo rammi cu a tam ding naón, An lakmi cu an duhmi lawng a si ding. Sabit rutu pawl ra hai sehla, Hlah mi nei loin maw an um ding?

⁶Asinain Esau[1] thilri an ram zia hi ruathnik uh; A thupte ih a retmi sumsaw hman an phorhsuak ṭheh hi!

⁷A hlanih a lo ṭanpitu pawl in an lo bum, Na ram sung in an lo dawihlo. Nangmah thawn remte ih a rak ummi pawl in an lo neh zo. Nangmah rawl a hil pitu na rualpi pawl in thang an lo kam; ‘Fimnak a neihmi khuiah so a si?’ an lo ti.

⁸“Cuih ni ahcun Edom mifim pawl ka siatsuah ding ih, Esau Tlang ah fimnak ka zuah lo ding.

⁹Teman[2] ralkap pawl an thin a phang ding ih Edom ralkap hmuahhmuah thah an si ding.

¹⁰“Na unau Jakob tesinfa hnenih thil sual na tuah ruangah, Ningzak in na um ringring ding ih Kumkhua in na hloralta ding.

¹¹Ral pawl in an kotka tla an siat bal ṭheh ni ah khan, Zianghman poisa loin na rak ding meen. Jerusalem ih hlawnthil a la hlo ih Camcawhfung zuuk in a zem aw ṭhehtu ramdangmi tlukin mi siava na si.

¹²Na unau ih vanduai ni ah porh aw rero hlah; Judah siatsuahnak a ton ni ah na lungawi hlah. Awloksong ih an um ni ah hni suamso hlah.

¹³Ka minung pawl harsatnak an tuar ni ah an kotka sungah va lut hlah. Siatnak an ton ni ah diriam in va um hlah. An tluk ni ah an thilri khal va long hlah.

¹⁴Tlansuah a tumtu pawl that dingah lamzin ṭeek in bawh hlah. Vansanglam ih an um ni ah An miluat hrekkhat an ral kut sungah va pe hlah.

¹⁵“Reilote ah Keimah BAWIPA in, Miphun hmuahhmuah parah thu ka ṭhen ni a ra thleng ding. Maw Edom, midang parih na tuah vekin na parah tuah a si ve ding. Na thil tidaan cu na lu parah a ra kir ding.

¹⁶Ka minung pawl in ka tlang thianghlim parah a khami hremnak khuathai an in zo. Sikhalsehla a kiangkap ih ummi Miphun hmuahhmuah cun, Cuhnakih a khasawnmi khuathai an in ding. An zate in an in ding ih an hloral ṭheh ding.

¹⁷“Asinain Zion Tlang ah mi hrekkhat an luat ding. Cuih tlang cu a thianghlim ding. Jakob ih minung pawl in, An covo anmah ih ram kha an co sal ding.

¹⁸Jakob innsang cu meisa ah a cang ding ih, Josef innsang cu meihlio ah a cang ding; Esau innsang cu fanghi a si ding ih, An alh ding ih an kaang ṭheh ding. Esau innsang cu a luatmi pakhat hman an um lo ding. BAWIPA in a sim zo a si.

¹⁹“Cule Negeb ih a ummi pawl in Esau Tlang an luah ding, Shephelah phairawn ih a ummi pawl in Filistin ram an luah ding. Israel mi in Efraim le Samaria ram an luah ding a si. Benjamin hrin in Gilead ram an co ding.

²⁰Israel Saklam um saltaang pawl an kir ding ih, Saklam ah Zarefath tiang Foenisia ram an luah ding. Jerusalem saltaang pawl Sardis ih a ummi pawl in Judah thlanglam ih um Negeb khawpi pawl an luah ding.

²¹Nehtu Jerusalem mi pawl in cu Zion Tlang ah an kai ding ih, Esau Tlang uktu an si ding. Cule BAWIPA cu Siangpahrang a si ding.