Read Falam Chin MIPUM SIARNAK 1 Bible Online

MIPUM SIARNAK 1 - Falam Chin bible

MIPUM SIARNAK 1

¹Israel mi pawl Izipt ram ihsin an suah hnu kum hnihnak a thla hnihnak ih[1] ni hmaisa bik ni ah, Sinai Nelrawn ih ummi Pathian umnak Puanthlam sungah BAWIPA in Moses hnenah thu a sim. A thusimmi cu hiti in a si:

²“Nangmah le Aaron in Israel mi pawl cu an hrin ciar le an innsang ciarin mipum nan siar pei. Kum kul le a tlunlam mipa,

³ralkap a ṭuan thei ding mi hmuahhmuah cu an hmin cazin lak uh.

⁴A lo bawmtu dingah hrin khat ihsin an lal ciar sawm uh.

⁵Cuih an lal ciar cu a tanglam bangtuk in an si: Reuben hrin ihsin Shedeur fapa Elizur,

⁶Simeon hrin ihsin Zurishaddai fapa Shelumiel,

⁷Judah hrin ihsin Amminadab fapa Nahshon,

⁸Issakhar hrin ihsin Zuar fapa Nethanel,

⁹Zebulun hrin ihsin Helon fapa Eliab,

¹⁰Josef fapa pawl: Efraim hrin ihsin Ammihud fapa Elishama, Manasseh hrin ihsin Pedahzur fapa Gamaliel,

¹¹Benjamin hrin ihsin Gideoni fapa Abidan,

¹²Dan hrin ihsin Ammishaddai fapa Ahiezer,

¹³Asher hrin ihsin Okhran fapa Pagiel,

¹⁴Gad hrin ihsin Deuel fapa Eliasaf,

¹⁵Naftali hrin ihsin Enan fapa Ahira.

¹⁶A tlunih lal pawl cu an hrin ciarah hotu an si ih mipum siar hnaṭuantu dingah hrilmi an si,” tiah a ti.

¹⁷Hi lal hleihnih pawl cu Moses le Aaron in an sawm ih,

¹⁸thlahnihnak ni hmaisa bik ni ah Israel mi pawl cu an zatein an kokhawm a si. Israel mi zatein an hrin ciar le an innsang ciar in mipum cazin an lak ih BAWIPA ih thupekmi bangtuk in,

¹⁹kum kul le a tlunlam mipa hmuahhmuah cu an siar ih an hmin an khum ṭheh. Sinai Nelrawn ahcun Moses in Israel mi pawl mipum cazin cu a lak.

²⁰Ralkap a ṭuan thei ding mipa kum kul le a tlunlam pawl cu an hmin rori in, Jakob fapa upa bik Reuben hrinih thok in an hrin le an innsang fekfek ciar in, cazin ah an khum. Mipum cazin an lakmi zat cu a tanglam bangtuk a si:

²¹Reuben hrin ihsin thawng sawmli thawng ruk le zanga,

²²Simeon hrin ihsin thawng sawmnga thawng kua le zathum,

²⁴Gad hrin ihsin thawng sawmli thawngnga, zaruk le sawmnga,

²⁶Judah hrin ihsin thawng sawmsarih thawngli le zaruk,

²⁸Issakhar hrin ihsin thawng sawmnga thawngli le zali,

³⁰Zebulun hrin ihsin thawng sawmnga thawng sarih le zali,

³²Efraim hrin ihsin thawng sawmli le zanga,

³⁴Manasseh hrin ihsin thawng sawmthum thawnghnih le zahnih,

³⁶Benjamin hrin ihsin thawng sawmthum thawngnga le zali,

³⁸Dan hrin ihsin thawng sawmruk thawnghnih le zasarih,

⁴⁰Asher hrin ihsin thawng sawmli thawngkhat le zanga,

⁴²Naftali hrin ihsin thawng sawmnga thawngthum le zali.

⁴⁴An zate ih kom tikah thawng zaruk thawngthum zanga le sawmnga an si.

⁴⁷Sikhalsehla Levi hrin pawl cu mipum siarnak ah telhcih an si lo,

⁴⁸ziangahtile BAWIPA in Moses hnenah,

⁴⁹“Israel mi pawl ralkap ṭuan thei ding mipum nan siar tikah Levi mi pawl cu telhcih hlah uh,” tiih a rak ti ruangah a si.

⁵⁰Cuih tlunah BAWIPA in Moses hnenah, “Levi mi pawl cu ka Puanthlam le a sungih hmanmi thilri pawl kilkhawitu-ah re hai aw. Puanthlam le a thilri pawl cu anmah in an phur pei ih ṭhatein an zoh pei; an riahbuk khal Puanthlam ih kimvel ah an sak pei.

⁵¹Nan riahnak nan ṭhawn tikah Levi mi pawl in Puanthlam cu an ṭhet pei ih riahnak hmun a tharih nan khuar tikah cutawkah anmah thotho in an sak sal pei. Midang zokhal Puanthlam kiangkapih an rat asile thah an si pei.

⁵²Israel mi pawl cun a bur a bur in an riahbuk cu an sak pei ih zozo khal anmah ih hrin ciarin anmah ih thantaar thuai ciarah an sak pei.

⁵³Asinain Puanthlam kiangkapah zohman an rat lonak dingah le ka thinhengnak cu Israel mi pawl parih a thlen lonak dingah Levi mi pawl cun Puanthlam kimvel ah an riahbuk an sak pei ih an kilveng pei,” tiah a ti.

⁵⁴BAWIPA in Moses hnenih thu a pek bangtuk in Israel mi pawl cun an tuah thluh.