Read Falam Chin MIPUM SIARNAK 10 Bible Online

MIPUM SIARNAK 10 - Falam Chin bible

MIPUM SIARNAK 10

¹BAWIPA in Moses hnenah,

²“So ih sutmi ngun tawtawrawt pahnih na tuah pei ih Israel mi pawl pumkhawm kawhnak ah le riahhmun ṭhawn ding thannakah na hmang pei.

³Tawtawrawt a pahnih in rei zet an phawt tikah misenpi an zatein ka umnak Puanthlam luhnak sangka ah an ra pumkhawm ding.

⁴Asinain tawtawrawt pakhat lawng an phawt a si ahcun an hrin ciarih hotu pawl lawnglawng na hnenah an ra ding.

⁵Cun ringzet le tawizet ih tawtawrawt an phawt tikah nisuahnak lamih a riakmi hrin pawl an ṭhawn pei.

⁶Cule cubangtuk thothoin a voihnihnak ringzet le tawizet ih an phawt asile thlanglam ih a riakmi hrin pawl an ṭhawn pei. Curuangah riahnak ṭhawn ding ahcun ringzet le tawizet in tawtawrawt an phaw pei ih,

⁷misenpi tongkhawm ding ahcun reizet in an phaw ding.

⁸Tawtawrawt cu Aaron fapa puithiam pawl lawnglawng in an phaw pei. “A tanglamih daan pawl cu hmailamah nan tesinfa pawl tiang an thlun dingmi an si.

⁹Nan ram sungih a lo neh-nentu ral pawl nan do tikah hi tawtawrawt pawl hi raldo tawtawrawt phawtin nan phaw pei. BAWIPA nan Pathian keimah in ka lo bawm ding ih nan ral pawl ih kut ihsin ka lo run ding.

¹⁰Cun lungawi tikcu, thla thar caan ih nan Thla Thar Puai pawl le nan biaknak puai dangdang pawl hrangah siseh, mei-ur thawinak le remnak thawinak nan pek tik khalah siseh, hi tawtawrawt pawl cu nan phaw pei. Cuticun ka lo bawm hai ding. Keimah hi BAWIPA nan Pathian ka si,” tiah a ti.

¹¹Israel mi pawl Izipt ram in an suah hnu kum hnihnak a thla hnihnak[3] ni kul ni ah BAWIPA umnak Puanthlam tlunih mero cu a kiang ih,

¹²Israel mi pawl cu Sinai nelrawn ihsin an suak. Cule Paran nelrawn an thlen in mero cu a cawl.

¹³Moses hnenih BAWIPA thupekmi bangtuk in Israel mi pawl cu an ṭhawn a si.

¹⁴Riahnak an ṭhawn tinin, Judah thantaar hnuai ih a ummi hmuahhmuah cu hmaisabik ah an feh; Judah hrin pawl hotu cu Amminadab fapa Nahshon a si.

¹⁵Issakhar hrin pawl hotu cu Zuar ih fapa Nethanel a si ih,

¹⁶Zebulun hrin pawl hotu cu Helon ih fapa Eliab a si.

¹⁷Cun Puanthlam cu an ṭhet ih Gershon le Merari hrin pawl in an phur ih midang bangin an pok ve.

¹⁸Cuih hnuah Reuben thantaar hnuai ih a ummi pawl an feh. Reuben hrin pawl hotu cu Shedeur ih fapa Elizur a si.

¹⁹Simeon hrin hotu cu Zurishaddai ih fapa Shelumiel a si ih,

²⁰Gad hrin hotu cu Deuel ih fapa Eliasaf a si.

²¹Cule Kohath hrin, thilri thianghlim pawl a phurtu cu an pok ve ih riahhmun an khuarnak an va thlen tikah cun Puanthlam cu din cia in a rak um zo.

²²Cuṭhehin Efraim thantaar hnuai ih a ummi pawl an feh. Efraim hrin hotu cu Ammihud ih fapa Elishama a si,

²³Manasseh hrin hotu cu Pedahzur ih fapa Gamaliel a si ih,

²⁴Benjamin hrin hotu cu Gideoni ih fapa Abidan a si.

²⁵Neta bikah Dan thantaar hnuai ih a ummi pawl cu dunglamih ral kiltu-ah a bur a bur in an feh. Dan hrin hotu cu Ammishaddai ih fapa Ahiezer a si.

²⁶Asher hrin hotu cu Okhran ih fapa Pagiel a si ih,

²⁷Naftali hrin hotu cu Enan ih fapa Ahira a si.

²⁸Israel mi pawl an riahnak an ṭhawn ih a bur a burih an fehdan cu cuticun a si.

²⁹Moses in Midian mi a pu Reuel ih fapa, a nupi ih ṭapa Hobab hnenah, “BAWIPA in pe dingih in tiammi ram ah kan feh thlang ding. BAWIPA in Israel mi cu mineinung zet dingih tuah dingin thu in kam zo; curuangah kan hnenah ra ve awla kan lennak cu kan lo hlawm ve ding,” tiah a ti.

³⁰Hobab cun, “Ka ra lo ding; ka ram le ka miphun hnenah ka kir sawn ding a si,” tiah a sawn.

³¹Cutikah Moses in, “In tlansan hram hlah aw. Hramlak ramṭhing kan thlen tikah riahnak hmun ṭha na thei sawn ding a si. Curuangah in hruai theitu na si ding.

³²Kan hnenih na rat asile BAWIPA ih in pekmi thlawsuahnak hmuahhmuah cu nangmah thawn kan hlawm aw ding a si,” tiah a ti.

³³Israel misenpi cu, tlang thianghlim Sinai tlang cun an pok ih ni thum ban khual lamhla-ah an feh. BAWIPA ih Thukam Kuang cu an hmaiah a rak feh ih colhnak hmun a rak hawl.

³⁴An riahnak hmun pakhat in pakhat ih an ṭhawn tikah BAWIPA ih mero cu sunvu an tlunah a um ringring.

³⁵Cun Thukam Kuang cu riahhmun ihsin a ṭhawn tinte in Moses in, “Maw BAWIPA, tho awla na ral pawl cu ṭhekdarh thluh hai aw; a lo huatu pawl cu na hmai ihsin tlanhlo thluh hai seh,” tiah a ti ṭheu.

³⁶Cule Kuang a colh tinin, “Maw BAWIPA, Israel mi a thawng le a za hnenah hin ra kir hram aw,” tiah a ti ṭheu.