Read Falam Chin MIPUM SIARNAK 14 Bible Online

MIPUM SIARNAK 14 - Falam Chin bible

MIPUM SIARNAK 14

¹Israel misenpi pawl cu an riahsia in zanvar an ṭap.

²Moses le Aaron parah an phunzai ih, “Izipt ramah khan rak thih sawn taak ding. Culo talle hramlak ahhin thi sawn nungna a ṭha ding naón!

³Ziangah so BAWIPA in hi ram ahhin in thlenpi ngelcel? Ral ah kan thi thluh ding ih kan nupi le kan faate pawl tla ral in an kai thluh ding a si. Izipt ram ah kir sal sehla a ṭha sawn lo ding maw?” tiah an ti.

⁴Cule pakhat le pakhat, “Izipt ramih in hruai kirtu dingah hotu kan hril pei,” an ti-aw.

⁵Cutikah Moses le Aaron cu Israel mi misenpi hmaiah an bok.

⁶Cun Kanaan ram zoh dingih an thlahmi lakih a tel vemi pahnih, Nun ih fapa Joshua le Jefunneh ih fapa Kaleb cu an riahsiat tukah an hnipuan an thlek ih,

⁷Israel misenpi hnenah cun, “Kan va zohmi ram cu ram ṭha ngaingai a si.

⁸BAWIPA cu kan parih a lung a awi a si ahcun Amah in in hruai ding ih cawhnawi le khuaitizu in a khatmi ram cu in thlenpi ding ih in pe ding.

⁹Curuangah BAWIPA cu dodal hlah uhla cutawk ramih a ummi pawl tla cu ṭih hlah uh. Olte in kan neh ko ding. BAWIPA cu kan hnenah a um ih anmah humhimtu an khawzing pawl cu a siatsuah thluh zo a si. Ṭih hrimhrim hlah uh,” tiah an ti.

¹⁰Asinain Israel misenpi pawl cun anmah riangri cu lungto in den that an tum. Sikhalsehla rin lopi-ah misenpi in BAWIPA ih huham tleu kha Puanthlam tlunih a lang kha an hmu.

¹¹Cutikah BAWIPA in Moses hnenah, “Hi minung pawl in ziangtik tiangso in nautat ding? An lakah mangbangza tampi ka tuah zo naón keimah rinsan duh loin ziangtik tiangso an um ding?

¹²Pulhnat natsia ka tlunter ding ih ka siatsuah thluh hai ding. Anmah hnakih lian deuh le cak deuh miphun pakhat ka seemter ding ih nangmah hi an pa na si ding,” tiah a ti.

¹³Cutikah Moses in BAWIPA ih hnenah, “Nangmah ih cahnak huham in himi pawl cu Izipt ram ihsin na rak suahpimi an si. Na minung pawl parih thil na tuahmi hi Izipt mi pawl in an rak hmu zo sikhawh,

¹⁴hi ramih a ummi hnenah an sim ko ding. BAWIPA nangmah cu kan hnenah na um ih nangmah ih mero cu kan tlunah cawl tahratin langhngan ih in umpi zia cu hi ram minung pawl in an thei zo. Cuih tlunah sunah mero zual, zanah meisa tom ih in hruai ringring ṭheu hi an theih thluh zomi a si fawn.

¹⁵Cubangtuk hnu ih na minung pawl na thah thluh hai a si ahcun na hmin a lo theitu miphun hmuahhmuah in,

¹⁶‘An Pathian in a minung pawl cu a tiam ciami ram ah thlenpi thei loin hramlakah a that thluh hai a si,’ tiah an lo ti pang ding.

¹⁷BAWIPA, nang cun ‘Thinheng ol mi ka si lo, duhdawtnak neimi ka si, rinsan tlak ka si, sualnak le dodalnak ngaithiamtu ka si ih pupa sin sual ruangah san thum san li tiang an tesinfa pawl tlolh loih a hremtu ka si fawn,’ tiih na rak ti vek khan, maw BAWIPA, na huham le na thiltitheinak cu run langter awla in tiamciami cu kimter hram aw.

¹⁹Izipt ramih an suah thok ihsin tuihsun tiang na ngaithiam hai bangtuk in, a thukmi le a thleng-aw dah lomi na duhdawtnak in hi na minung pawl cu ngaithiam hram hai aw,” tiah zaangfah a dil.

²⁰Cutikah BAWIPA in, “I dil bangtuk in ka ngaithiam hai ding.

²¹Sikhalsehla a nungmi Pathian ka si ih ka sunlawinak huham in leilung cu a khuh thluh ruangah ka hmin in thu ka lo kam:

²²Kanaan ram an luh tikah himi pawl cu zohman a nungmi an um lo ding. Izipt ram ah siseh, hramlak nelrawn ah siseh, mangbangza ka tuah mi le ka sunlawinak tleuvar cu an hmu ṭheh ko naón in rinsan lo ih in zum duh hrimhrim lo. Keimah sawn voisawm le voiza in hniksak a si.

²³An pu le an pa hnenih ka kam ciami ram cu an thleng hrimhrim lo ding.

²⁴Asinain ka salpa Kaleb cu a ruahnak phundangte a si ih a thinlung zatein i thlun a si. Curuangah a va zohmi ram cu ka thlengter ding ih a tesinfa pawl in cuih ram cu an co ding.

²⁵Amalek mi le Kanaan mi pawl an umnak phairawn tla cu an ta a si ding. Thaisun in nan dung nan let pei ih Tipi Sen[6] lam zawh in hramlak nelrawn ah nan feh kir pei,” tiah Moses cu a ti.

²⁶BAWIPA in Moses le Aaron hnenah,

²⁷“Ziangtik tiangso hi miṭha lo pawl hi ka parah an phunzai ding? An tlawhciarnak hi ka thei tamtuk zo!

²⁸Curuangah an hnenah, ‘A nungmi Pathian ka si ih siatcam in thu ka lo kam: Ka hnenih nan dil vek cekci in nan parah ka tuah ding. BAWIPA a si mi keimah in ka ṭong zo.

²⁹Nan thi ding ih hi hramlak ahhin nan ruak pawl cu ṭhekdarh thluh an si ding. Ka parih nan phunzai ruangah nan lakih kum kul tlun minung zohman Kanaan ram nan thleng lo ding.

³⁰Hi ram co dingah thu ka rak lo kam. Asinain Kaleb le Joshua siar lo pakhat hman nan thleng lo ding.

³¹Ral in kan faate pawl an kai thluh pang ding nan ti. Asinain cuih nan faate pawl riangri cu nan duh lo taak ram ahcun ka thlenpi thluh hai dingih an ram ah a cang ding.

³²Nannih cu hi hramlak ahhin nan thi thluh ding.

³³Nan zate nan thih thluh hlan lo nan faate pawl cu hi ramṭhing ahhin kum sawmli sung an vakvai ding ih cuticun nan zuanzam man an tuar ding.

³⁴Kanaan ram nan va zoh ni zat, ni khat ai ah kum khat in, ni sawmli hrangah kum sawmli sung nan sualman nan tuar ding ih keimah dodal a harzia cu nan thei ding.

³⁵Keimah dodaltu miṭha lo senpi pawl nan par hrimhrim ah a tlun ih hremnak pawl cu ka tlunter hrimhrim ding, tiah siatcam in thu ka lo kam a si. Hi ramṭhing ah hin pakhat hman luat loin nan thi thluh ding. BAWIPA keimah in ka sim zo,’ a ti, tiah nan sim pei,” tiah a ti.

³⁶Moses in Kanaan ram thlingthla dingih a thlahmi hruaitu pawl in thusia an sim ruangah misenpi pawl BAWIPA ih parih an phunzainak cu a si.

³⁷Curuangah Moses ih a thlahmi hruaitu pawl parah natsia a thleng ih an thi.

³⁸Thlingthlatu minung hleihnih sungah Joshua le Kaleb lawng an nung.

³⁹Moses in BAWIPA thusimmi hmuahhmuah cu Israel mi hnenih a sim tikah napi in an ṭap.

⁴⁰Cule a thaizing cu tlangpar ram ah an hung feh ih, “Kan sual zo ngai a si. Atu cun BAWIPA ih in tiammi ram ah kan feh thlang ko pei,” an ti.

⁴¹Asinain Moses cun, “Ziangah so atu khalah BAWIPA ih thu cu nan thlun duh lo? Zianghman nan si cuang lo ding!

⁴²Feh hlah uh. BAWIPA cu nan hnenah a um lo ih nan ral pawl in an lo neh ding.

⁴³Khitawk ah Amalek mi le Kanaan mi thawn nan do awk tikah nan thi thluh mai ding. BAWIPA ih thu thlun nan duh lo ruangah Amah cu nan hnenah a um hrimhrim lo ding,” a ti.

⁴⁴Sikhalsehla feh an tum thotho. Asinain BAWIPA ih Thukam Kuang siseh, amah Moses siseh, an riahhmun ihsin an pok lo.

⁴⁵Cutikah cutawkih a rak ummi Amalek mi le Kanaan mi pawl cun an rak nam hai ih an run neh ih Hormah khua tiang Israel pawl cu an run dawi.