Read Falam Chin MIPUM SIARNAK 15 Bible Online

MIPUM SIARNAK 15 - Falam Chin bible

MIPUM SIARNAK 15

¹BAWIPA in Moses hnenah,

²a tiam ciami ram an thlen tikih Israel mi pawl thlun dingah a tanglam daan pawl hi a pek.

³“Mei-ur thawinak siseh, thukam-awh kimter thawinak siseh, mah lungtho teih pekmi thawinak siseh, biaknak puai tikcu ih thawinak siseh, BAWIPA hnenih nan pek tikah cawcang, a si lole tuu, a si lole me, nan pek pei. Hi pekmi meisa thawn thawinak pawl cu BAWIPA ih hrangah rim thawmi an si.

⁴BAWIPA ih hnenah cubangtuk thawinak a petu hmuahhmuah in olif siti khuat khat thawn rawi mi sangphut cuai hrek in thlairawl thawinak khal an pek cih pei.

⁵Mei-ur thawinakah tuucangte a pek tinin sabitti khuat khat cu inmi thawinak ah a pek cih pei.

⁶Cun an pekmi cu tuucang asile, inmi thawinakah sabit khuat khat le a hrek, thlairawl thawinak ah olif siti khuat khat le a hrek thawn rawi mi sangphut cuai khat khal a pek pei.

⁷Hi bangtuk thawinak pekmi cu BAWIPA ih hrangah a thawmi rimhmui a si.

⁸Cun BAWIPA ih hnenah cawcang cu mei-ur thawinak ah siseh, thukam-awh kimter thawinak ah siseh, mah lungtho teih pekmi thawinakah siseh, a pek tikah,

⁹thlairawl thawinak ah olif siti khuat hnih thawn rawimi sangphut cuai khat, inmi thawinak ah,

¹⁰Sabit khuat hnih khal a pek cih pei. Hi thawinak cu BAWIPA ih hnenah a thawmi rimhmui a si.

¹¹Thawinak ah cawcang siseh, tuucang siseh, tuu le me siseh, an pek tikah hi a tlunih thil pawl cu pek cih vivo an si pei.

¹²Cule ṭilva pakhat hnakih tam deuh an pek a si ahcun a tam zat in thilri dang pekmi pawl cu ṭhan an si ve ding.

¹³Ram sung minung hmuahhmuah in BAWIPA hnenih a rim a thawmi thlairawl thawinak an pek tikah a tlun ih tuah ding pawl cu an tuah thluh pei.

¹⁴Cule ramdangmi pakhatkhat in, a laangte ih a um ah siseh, kumkhua in nan lakih a um ah siseh, BAWIPA hnenih rimthaw thlairawl thawinak a pek a si ahcun a tlunih daan pawl cu a thlun ve pei.

¹⁵Nanmah siseh, ramdangmi nan lakih a ummi siseh, hi daan pawl cu sanmureng tiang nan thlun dingmi a si. Nanmah le anmah cu BAWIPA hmaiah nan bangrep a si.

¹⁶Nan hrangah siseh, an hrangah siseh, daan le thiltidan cu a bangrep a si, tiah a ti.

¹⁷Cun BAWIPA ih pekmi ram an thlen tikah,

¹⁸Israel mi pawl ih an thlun dingah a tanglam ih daan pawl cu BAWIPA in Moses hnenah a pek a si.

¹⁹Cutawk ramih a suakmi rawl an ei tikah rawl hrekkhat cu BAWIPA hnenah a dangte in laksawngah an pek pei.

²⁰Kumtin rawl an lak ṭheh tikah, fangtharih tuahmi sang zawl khat cu BAWIPA ih hnenah laksawngah an pek pei. Himi cu fang an ciilmi sungin laksawngih an pek ṭheu vekin an pek pei.

²¹Fang an lak ṭheh ih sangphut an tuahmi sung ihsin hi laksawng cu BAWIPA ih hnenah a kumkhua in an pek ringring pei.

²²BAWIPA keimah in Moses hnenih ka pekmi daan pawl hi mi pakhatkhat in tumhrimnak nei loin a thlun lo pang tikah siseh,

²³hmailam ni khat khatah BAWIPA ih thupekmi hi Israel misenpi in thlun loin an um tikah siseh,

²⁴misenpi in thutheih lo ruangih an tuah pangmi a si ahcun, mei-ur thawinakah cawcang an pek pei. Himi cu BAWIPA hnenih pekmi rimthaw a si ih thlairawl thawinak le inmi thawinak thawn an pek cih pei. Cuih tlunah sualthlah thawinak hrangah mecang khal an pek pei.

²⁵Misenpi hrangah mawhnak thawinak cu puithiam in a tuah pei ih ngaihthiam an si ding. Ziangahtile tihrimmi si loin tipangmi a si ih sualthlah thawinak le mei-ur thawinak BAWIPA hnenih an pekmi a si.

²⁶Cuih thilti sualmi-ah an zate ih an tel ruangah Israel misenpi siseh, an lakih um ramdangmi siseh, ngaithiam thluh an si ding.

²⁷Mi pakhat in pumpak in sualnak a tuah pang a si ahcun a sualthlah thawinakah kum khat ti menu a pek pei.

²⁸BAWIPA ih mithmuh ah a sualnak ihsin thianter dingah mawhnak thawinak cu puithiam in a tuah sak pei ih amah cu ngaithiam a si pei.

²⁹Hi daan cu Israel mi siseh, hrindangmi siseh, ramsungmi hmuahhmuah in, thil an tipang tikah thlun dingmi daan a si.

³⁰Asinain Israel mi siseh, ramdangmi siseh, ramsungih ummi pawl in tihrim sualnak an tuah ih BAWIPA an hmuhsuam a si ahcun thah an si pei.

³¹Ziangahtile BAWIPA ih ṭongmi thu cu an duh lo ih a thupekmi cu an pah hrim ruangah an thihnak cu a si, tiah a ti.

³²Voikhat cu Israel mi pawl hramlak nelrawnih an um laiah mipa pakhat Sabbath ni ah zanthing a khawm.

³³Amah cu an kai ih Moses le Aaron le misenpi hmaiah an suahpi.

³⁴Ziang tuah ding an theih ve lo ruangah annih in thawngah an khum ih an kil.

³⁵Cutikah BAWIPA in Moses hnenah, “Sabbath buartu cu thah ding a si. Riahhmun lengah nan suahpi pei ih misenpi in lungto in deng that hai seh,” a ti.

³⁶Curuangah riahhmun lengah an fehpi ih BAWIPA ih thupekmi bangtuk in amah cu lungto in an deng ih a thi.

³⁷BAWIPA in Moses cu

³⁸Israel mi hnenih sim dingah thu a pek ih, “Nan hnipuan ziik ah a fem nan thlaih pei ih a fem tinah mepian pat nan ṭelh pei. Cumi cu nan tesinfa tiang nan tuah dingmi a si.

³⁹Hi puanfeem nan hmuh tinte in ka thupekmi hmuahhmuah nan thei sal ding ih nan thlun ding. Cuticun nan zuanzamnak, nan thinlung hiarnak, le nan mit ih hmuhmi poh nan tuah duhnak tla suup-aw tahratin keimah cu in dungtun lo ding a si.

⁴⁰Ka thupekmi hmuahhmuah a lo mangter ding ih keimah ih ta hrimhrim nan si ding.

⁴¹Keimah hi BAWIPA nan Pathian ka si. Nan Pathian si dingah Izipt ram ihsin a lo suahtu BAWIPA nan Pathian ka si. Keimah cu BAWIPA ka si,” a ti.