Read Falam Chin MIPUM SIARNAK 17 Bible Online

MIPUM SIARNAK 17 - Falam Chin bible

MIPUM SIARNAK 17

¹BAWIPA in Moses hnenah,

²“Israel mi pawl sim awla hrin khatah kianghrol pakhat ciar in kianghrol hleihnih lo pe hai seh. An kianghrol parah an hmin ciar ngan awla,

³Levi hrin kianghrol parah Aaron ih hmin ngan aw. An hrin hotu pakhat hrangah kianghrol pakhat ciar a si pei.

⁴Cuih kianghrol pawl cu ka umnak Puanthlam sung, ka lo ton ṭheunak Thukam Kuang hmaiah ret aw.

⁵Cule ka hril mipa ih kianghrol cu a cerh ding. Cuticun Israel mi pawl ih phunzai ringringnak hi ka kham thei ding,” tiah a ti.

⁶Curuangah Moses cun Israel mi pawl cu a sim ih an hotu ciar in kianghrol pakhat ciar, hrin hleihnih hrangah kianghrol hleihnih, Moses an pek. Aaron ih kianghrol khal a tel ve.

⁷Moses in kianghrol hmuahhmuah cu Puanthlam sung, BAWIPA ih Thukam Kuang hmaiah cun a ret.

⁸A thaisun ah Puanthlam sungah Moses cu a lut ih Levi hrin ai-awhtu Aaron ih kianghrol a cerh kha a hmu. A cerh lawng si loin a mum hnuah a par ih almon[8] a hminmi almon rah a rah.

⁹Cutikah Moses in kianghrol zatein a lak ih Israel mi pawl hnenah a hmuh. Cutiih thil a cangmi an hmuh hnuah hotu pawl cun anmah an ta ciar an lak sal.

¹⁰BAWIPA in Moses hnenah, “Aaron ih kianghrol cu Thukam Kuang hmaiah ret sal aw. An phunzainak an baan lo ahcun mi dodaltu Israel mi cu an thi ding, tiih ralrin ternak ah ret ringring ding a si,” a ti.

¹¹BAWIPA ih thupek vekin Moses cun a tuah thluh.

¹²Cule Israel mi pawl cun Moses hnenah, “Kan cem a si. Kan thi cem thluh ding a si ko.

¹³Puanthlam kiangih a ra menmenmi a thih ahcun kan cem riai a si. Pakhatte hman taang loin maw kan cimih thluh ding!” an ti.