Read Falam Chin MIPUM SIARNAK 19 Bible Online

MIPUM SIARNAK 19 - Falam Chin bible

MIPUM SIARNAK 19

¹BAWIPA in Moses le Aaron hnenah,

²a hnuailam ih daan pawl Israel mi hnenih pe dingah thu a pek: Raitluan mi le hna a ṭuan hrih lomi cawla sen rak keng hai sehla,

³puithiam Eleazar hnenah pe hai seh. Riahhmun lengah an suahpi pei ih Eleazar hmaiah an that pei.

⁴Cule Eleazar in a thisen hrekkhat cu a lak pei ih Puanthlam hmailam ahcun a mehtok in voisarih tiang a theh pei.

⁵A sa zatein - a vun le a tit, a thisen le a sungril pawl thawn - puithiam hmuh hngan rori ahcun ur thluh a si pei.

⁶Cule puithiam in sidar thing, hissop thingṭeek le puan sen a lak pei ih meisa sungah cun a paih pei.

⁷Cuih hnuah a hnipuan a sawp pei ih ti a bual ṭheh hnuah riahhmun ah a kir sal pei. Asinain cuih zanlam tiang cu mithiangfai lo a si ding.

⁸Caw a thattu pa khal in a hnipuan a sawp pei ih ti a bual pei. Asinain cuih zanlam tiang cu mithiangfai lo a si ve pei.

⁹Cun a thianghlim pa pakhat in caw senih vutcam cu a lak pei ih riahhmun leng hmun thiangfai ah a ret pei. Cumi cu Israel mi pawl in thianfainak hrangih tidai an hman tikah cuih tidai thianfaiternak ah an hmang pei. Cumi cu sual thianfainak hrangih urmi a si.

¹⁰Cuih vutcam a latu cun a hnipuan a sawp pei. Asinain cuih zanlam tiang cu mithiangfai lo a si pei. Hi daan cu Israel mi siseh, an lakih ummi ramdangmi siseh, kumkhua in an thlun dingmi a si.

¹¹Miruak a daitu cu ni sarih sung mithiangfai lo a si pei.

¹²Thianfaiternak tidai in ni thumnak ni le ni sarihnak ni ah a thiangfai awk lo ding ih cuticun mithiangfai ah a cang ding. Asinain ni thumnak ni le ni sarihnak ni ah a thiangfai awkter lo a si ahcun mi thiangfai lo a si pei.

¹³Miruak a daitu cu thianfainak tidai a toih-awk lo ahcun mithiangfai lo a si ringring. BAWIPA ih Thukam retnak Puanthlam a borhhlawhter ruangah BAWIPA ih minung lakah siarcih a si nawn lo pei.

¹⁴Mi pakhatkhat a deuthlam sungih a thih ahcun a thih laiih a deuthlam sungih a ummi siseh, a leng ihsin a rung lutmi siseh, ni sarih sung cu mithiangfai lo an si pei.

¹⁵Sin a nei lomi palang le beel khal an thiangfai ve lo a si.

¹⁶Cubangtuk ṭhiamṭhiam in riahhmun lengah mi pakhatkhat hriamhma in siseh, mahte thih in siseh, a thi ih cuih ruak a thamtu cu ni sarih sung mithiangfai lo a si pei. Milai ruh siseh, milai thlaan siseh, a thamtu cu ni sarih sung mithiangfai lo a si pei.

¹⁷Hi bangtuk ih thianfai lonak a um tikah sual thianfainak dingih urmi caw senih vutcam an lak pei ih beel sungih an ret hnuah tidai fai an burh pei.

¹⁸A hmaisa-ah a thiangfaimi mi pakhat in hissop thing ṭeek pakhat la tahratin cuih tidai sungah a hnim pei ih deuthlam le a sungih ummi thilri hmuahhmuah le minung pawl a theh thluh pei. A neta-ah a thiangfaimi mi dang pakhat in tidai cu a lak pei ih miruh le miruak le thlaan a thamtu cu a theh pei.

¹⁹Cun a thiangfaimi mi pakhatkhat in ni thumnak ni le ni sarihnak ni ah cuih tidai cun mithiangfai lo cu a theh pei. Ni sarihnak ni ahcun cupa cu a thianfaiter ding ih a hnipuan a sawp hnuah ti a kholh-aw pei ih zanlam nitla ah mithiangfai a cang pei.

²⁰Mi pakhatkhat mithiangfai lo a si ih thianfainak tidai in a kholh-awk lo ahcun thianfai termi a si lo ruangah mithiangfai lo ringring a si. Cubangtuk mi cu BAWIPA ih Puanthlam a borhhlawhter ruangah Pathian ih minung lakah siarcih ding a si nawn lo pei.

²¹Hi daan cu a kumkhua ih nan thlun dingmi a si. Cule thianfainak tidai a thehtu khal in a hnipuan a sawp thluh pei. Hi tidai a thamtu cu zanlam tiang mithiangfai lo a si pei.

²²Ziang khal mithiangfai loih tham mi pohpoh cu a thiangfai lo pei ih zokhal cumi a thamtu pohpoh cu zanlam tiang mithiangfai lo a si pei.