Read Falam Chin MIPUM SIARNAK 2 Bible Online

MIPUM SIARNAK 2 - Falam Chin bible

MIPUM SIARNAK 2

¹BAWIPA Pathian in Moses le Aaron hnenah a tanglam bangtuk in thu a pek,

²“Israel mi pawl in an riahbuk an sak tikah zozo khal anmah ih hrin ciar hnenah le anmah ih thantaar thuai ciarah an um pei. An riahbuk cu BAWIPA umnak Puanthlam ih kimvelah an sak pei,” a ti.

³Nisuahnak lamah Judah ih thantaar thuai-ah a tanglam bangtuk in anmah ih hotu ciar thawn a bur a bur in an um pei: Judah hrinah Amminadab fapa Nahshon ho in thawng sawmsarih thawngli le zaruk an si; Issakhar hrinah Zuar fapa Nethanel ho in thawng sawmnga thawngli le zali an si; Zebulun hrinah Helon fapa Eliab ho in thawng sawmnga thawng sarih le zali an si; An zate komah thawng zakhat thawng sawmriat thawng ruk le zali an ti. Judah thantaar hnuai ih ummi pawl cu hmaisabik ah an feh pei.

¹⁰Thlanglamah Reuben ih thantaar thuaiah a tanglam bangtuk in anmah ih hotu ciar thawn a bur a bur in an um pei: Reuben hrinah Shedeur fapa Elizur ho in thawng sawmli thawng ruk le zanga an si; Simeon hrinah Zurishaddai fapa Shelumiel ho in thawng sawmnga thawngkua le zathum an si; Gad hrinah Deuel fapa Eliasaf ho in thawng sawmli thawngnga zaruk le sawmnga an si. An zate komah thawng zakhat thawng sawmnga thawngkhat zali le sawmnga an si. Reuben ih thantaar thuaiih ummi pawl cu a pahnihnak ah an feh pei.

¹⁷Cule a hmaisa bur hnih le a dungih bur hnih karlakah Puanthlam a phurtu Levi mi pawl an feh pei. Cuih a bur a bur in a fehtu Israel mi pawl cu anmah ih thantaar thuai ciarah an riahnak ih an umdan vek thothoin an feh pei.

¹⁸Nitlaknak lamah Efraim ih thantaar thuaiah a tanglam bangtuk in anmah ih hotu ciar thawn a bur a bur in an um pei: Efraim hrinah Ammihud fapa Elishama ho in thawng sawmli le zanga an si; Manasseh hrinah Pedahzur fapa Gamaliel ho in thawng sawmthum thawnghnih le zahnih an si; Benjamin hrinah Gideoni fapa Abidan ho in thawng sawmthum thawngnga le zali an si; An zate komah thawng zakhat thawngriat le zakhat an si; Efraim thantaar thuaiih a ummi pawl cu a pathumnak ah an feh pei.

²⁵Saklam ah Dan ih thantaar thuaiah a tanglam bangtuk in anmah ih hotu ciar thawn a bur a bur in an um pei: Dan hrinah Ammishaddai fapa Ahiezer ho in thawng sawmruk thawnghnih le zasarih an si; Asher hrinah Okhran fapa Pagiel ho in thawng sawmli thawngkhat le zanga an si; Naftali hrinah Enan fapa Ahira ho in thawng sawmnga thawngthum le zali an si; An zate komah thawng zakhat thawng sawmnga thawng sarih le zaruk an si. Dan ih thantaar thuai ummi pawl cu neta bikah an feh pei.

³²A bur a burih an homi Israel mi pawl cu an zate komah thawng zaruk thawngthum zanga le sawmnga an si.

³³Asinain Moses hnenih BAWIPA ih thupek bangtuk in Israel mi pawl lakah Levi hrin pawl cu siarcih an si lo.

³⁴BAWIPA in Moses hnenih thu a pekmi bangtuk cun Israel mi pawl in an tuah thluh. An riah tikah anmah ih thantaar thuai ciarah an riak ih an feh tik khalah anmah ih hrin ciarin an feh.