Read Falam Chin MIPUM SIARNAK 20 Bible Online

MIPUM SIARNAK 20 - Falam Chin bible

MIPUM SIARNAK 20

¹Thla hmaisabik ah[9] Israel misenpi pawl cu Zin nelrawn an thleng ih Kadesh ah riahhmun an khuar. Cutawkah Miriam cu a thi ih an phum.

²Cule misenpi hrangah tidai a um lo ruangah Moses le Aaron hnenih phunzai dingin an tongkhawm aw ih,

³“Hitiih si hnak cun kan unau Israel mi hrekkhat pawl thawn BAWIPA ih Puanthlam hmaiah khan thi ve nungla a ṭha sawn ding naón!

⁴Ziangah so hi bangtuk ramṭhing ah hin in thlenpi? Hitawkih kan ṭilva pawl thawn thi dingah maw?

⁵Zianghrangah so hivek ram ṭha lo, zianghman a khoh thei lonak ramih hruai dingah cun Izipt ram ihsin in suahpi? Hinah zianghman a um lo: fang le theipi, sabit le taleti tla a um lo! Tidai in ding rengreng hman a um lo!” tiah an phunzai ciamco.

⁶Cutikah misenpi hmai ihsin Moses le Aaron cu an ṭhawn ih Puanthlam sangka hmaiah an ding. Cutawkah leilung ah an bok ih an hnenah BAWIPA ih huham tleu cu a rung lang.

⁷BAWIPA in Moses hnenah,

⁸“Thukam Kuang hmaiih a ummi kianghrol kha la awla nangmah le na u Aaron in misenpi pawl cu kokhawm uh. Cutawkah misenpi hmuh hngan rori ahcun khitawk ih a ummi lungpi khi tidai suak dingin sim uhla tidai a suak ding. Cuticun khi lungpi sungin tidai na suakter ding ih misenpi siseh, an ṭilva pawl siseh, tidai an in ding,” tiah a ti.

⁹Curuangah Moses cu BAWIPA thupeknak bangtuk in a feh ih kianghrol cu a lak.

¹⁰Moses le Aaron in Israel misenpi pawl cu lungpi hmai ahcun an kokhawm ih Moses in, “Ngai uh, nannih raltho pawl! Nanmah ih hrangah a si lo maw hi lungpi ihsin tidai suahter rero a ṭul cu?” a ti ih,

¹¹Moses in a kianghrol cu a thlir ih lungpi cu voihnih a vuak. Cutikah tidai cu a puut zurzo ih misenpi le ṭilva pawl cun an in.

¹²Sikhalsehla BAWIPA in Moses le Aaron cu, “Ka thianhlimnak huham nan zum kim lo ruangah Israel misenpi hmaiah tlamtling in in upat lo; curuangah hi misenpi pawl pek dingih ka tiammi ram ah nannih in nan hruai suak hai lo ding,” tiah a ti.

¹³Cuih hmun cu Israel mi pawl in BAWIPA hnenih an phunzainak le BAWIPA in a thianhlimnak huham a langternak a si ruangah Meribah [10] tiah an ti.

¹⁴Moses in Kadesh ihsin Edom siangpahrang hnenah palai a thlah. Cuih palai pawl in Edom siangpahrang hnenah, “Na unau Israel hrin pawl in thu an lo cah. Ziangtluk in harsatnak kan tong ti cu na thei thluh ko.

¹⁵Kan pu le kan pa pawl cu Izipt ramah an feh ih kum reipi an vung um. Izipt mi pawl in kan pupa le kanmah pawl in tisiat tuk ruangah,

¹⁶BAWIPA ih hnenah bomnak dil in kan au. Kan aunak in thei ih vancungmi pakhat a run thlah ih Izipt ram in in suahpi. Atu-ah cun na ramri kiangih Kadesh khua ah kan um.

¹⁷In zaangfah awla na ram sungin in fehter siang hram aw. Kanmah siseh, kan ṭilva pawl siseh, lamzin ihsin zinsak zinthlangah kan pial lo ding. Nan lo ah siseh, nan sabit hmuan khal ah siseh, kan lut lo ding. Cun nan tikhur pawl ih tidai khal kan in hrimhrim lo ding. Na ram sung ihsin kan liam hlan lo lamzinpi lawnglawng kan zawh ding, an ti a si,” tiah an sim.

¹⁸Asinain Edom mi pawl cun, “Kan ram cu a pal in nan pal hrimhrim lo pei. Nan pal a si ahcun kan ra suak pei ih kan lo do ding a si,” an ti.

¹⁹Cutikah Israel mi pawl cun, “Lamzinpi lawnglawng kan zawh ko ding. Kanmah in siseh, kan ṭilva pawl in siseh, nan tidai kan in pang a si khalle a man kan kuan ko ding. Nan ram voikhat pal phahte lawng khi kan lo dilmi cu a si,” an ti.

²⁰Edom mi pawl cun, “Kan ram nan pal thei lo,” an ti ih Israel mi pawl do dingah an ralkap tamzet, hriamnam ṭhazet thawn an pok.

²¹Cutiin Edom mi pawl ih an ram pal an sian lo ruangah Israel mi pawl cu an kir ih lamzin dang an thlun.

²²Israel mi pawl cu Kadesh hmun ihsin an pok ih Edom ramri kiangih ummi Hor Tlang an thleng.

²³Cutawk ahcun BAWIPA in Moses le Aaron hnenah,

²⁴“Aaron cu Israel mi hnenih pek dingah ka tiammi ram a thleng lo ding. Ziangahtile nan pahnih in Meribah ah ka thupekmi nan thlun duh lo ih in dodal ruangah Aaron cu a thi ding.

²⁵Aaron le a fapa Eleazar cu Hor Tlang ah fehpi awla,

²⁶Aaron ih puithiam thilthuam cu hlit awla Eleazar hrukter aw. Aaron cu khitawk ah a thi ding,” tiah a ti.

²⁷BAWIPA ih a ti vek cun Moses in a tuah ṭheh. Misenpi hmuhah Hor Tlang cu an kai ih,

²⁸Moses in Aaron ih puithiam thilthuam cu a hlit sak ih Eleazar a hrukter. Cule Aaron cu cutawk tlangpar ahcun a thi ih Moses le Eleazar cu an rung kir.

²⁹Israel misenpi in Aaron a thih an theih tikah an zatein ni sawmthum sung mithi ngai in an um.