Read Falam Chin MIPUM SIARNAK 22 Bible Online

MIPUM SIARNAK 22 - Falam Chin bible

MIPUM SIARNAK 22

¹Israel mi pawl cu an feh sal ih Jerikho khua ih khatlam ral, Jordan tiva ihsin nisuahnak lam, Moab hmunrawn ah an riak.

²Cule Israel mi pawl in Amor mi tlunih thil an tuahmi pawl kha Moab ram siangpahrang Zippor ih fapa siangpahrang Balak in a hmu ih,

³Israel mi pawl cu an tamzet fawn ruangah amah in siseh, a minung pawl in siseh, an ṭih ngaingai.

⁴Curuangah Moab mi pawl in Midian mi hotu pawl hnenah, “Cawcang ih hrampi a piat thluh ṭheu vekin hi mi burpi in kan kiangkap cu an ciil siat thluh ding a si ko,” tiah an ti. Cule Siangpahrang Balak in,

⁵Amaw ram, Eufrates Tivapi kiang Pethor khua ih a ummi Beor fapa Balaam hnenah palai a thlah. Cuih palai pawl hnen ihsin Balak in thu a cah ih, “Miphun phun khat pumpi Izipt ram in an suak ih atu-ah hin an minung pawl cu khuazakipah an darh-aw ih kan ram luah ṭheh an tum a si.

⁶An minung zat ṭuat tikah in hleih tuk fawn. Curuangah i zaangfah hram awla hi mi pawl hi in ra camsiat sakta aw. Cuticun kan neh ding ih kan ram in kan dawi suak thei ding. Nangmah ih na thluasuahmi cu thluasuah an ngah ih na camsiatmi cu camsiat an si, ti ka thei,” tiah a ti.

⁷Curuangah Moab hotu pawl le Midian hotu pawl cu camsiat man phalh ding keng in an pok ih Balaam hnen an thleng ih Balak ih thucah mi cu an sim.

⁸Cutikah Balaam cun an hnenah, “Tuihzan cu hinah riak uhla thaisun ah BAWIPA ih i simmi poh cu ka lo theihter hai ding,” tiah a ti. Curuangah Moab mi hotu pawl cu Balaam hnenah cun an riak.

⁹BAWIPA in Balaam hnen ahcun, “Na hnenih a riakmi pawl hi zoso an si?” tiah a sut.

¹⁰Balaam in, “Moab siangpahrang Balak ih palai pawl an si ih,

¹¹Izipt ram ihsin a ra suakmi miphun phun khat an ram ah an khat thluh a si ruangah cumi pawl do tahratih a dawi suaknak dingin camsiat dingah in ra fial a si,” a ti.

¹²Cutikah Pathian in Balaam hnenah, “An hnenah tel ding na si lo; Israel mi pawl tla na cam lo pei; ziangahtile ka thlawsuah mi an si,” a ti.

¹³A thaizing ah Balak palai pawl hnenah Balaam cu a feh ih, “Va kir uh; nan hnenih feh ve ding cu BAWIPA in i kham a si,” a ti.

¹⁴Curuangah Balak hnenah cun an kir ih an hnenih Balaam a tel duh lonak thu cu an sim.

¹⁵Cule Balak in hotu thupi deuhdeuh le tam deuh a hei thlah sal.

¹⁶An va feh ih Balaam hnen ahcun, “Zaangfahnak in ka hnenih rat ding cu zianghman in lo kham hram hlah seh.

¹⁷Laksawng tam ngaingai ka lo pe ding ih na simmi hmuahhmuah ka tuah thluh ding. Ra hramhram awla himi pawl hi ka aiah in camsiat sak aw,” tiah Balak ih thucahmi cu an sim.

¹⁸Sikhalsehla Balaam cun, “Balak in a siangpahrang inn sungih a ummi sui le ngun hmuahhmuah i pe hmansehla BAWIPA ih thu cu ka el thei lo; thil fate thu hmanah BAWIPA ka Pathian ih thupekmi cu ka el thei hrimhrim lo a si.

¹⁹Asinain midang bangin tuih zan cu hinah riak uhla BAWIPA in thudang sim ding i neih asile tuihzan ah ka thei ding,” tiah a ti.

²⁰Cuih zanah Pathian cu Balaam hnenah a ra ih, “Himi pawl in an hnenih feh ding an ra lo sawm a si ahcun feh dingah na tim tuah aw. Asinain ka lo simmi lawnglawng tuah aw,” tiah a ti.

²¹Cuhrangah a thaizing cu Balaam in a laak cu a kung a tuah ih Moab hotu pawl hnen ahcun a feh.

²²Balaam a feh ruangah Pathian cu a thin a heng. Balaam cu a hnen-um pahnih in an thlun ih a laak to in a feh laiah a lamzin kham dingah BAWIPA ih vancungmi pakhat a hmaiah a rak ding.

²³Balaam ih laak in ralnam a kengtu vancungmi pakhat lamzinih a din kha a hmuh tikah lamzin ihsin a pial ih hram lakah a feh. Balaam in a laak cu a vuak ih lamzin ah a kirter sal.

²⁴Cule vancungmi cu lamzin cepthernak, sabit hmuan pahnih karlak, lungtlap pipi a zin kap hnih ih son awknak hmun ah a rak ding.

²⁵A laak in vancungmi a hmuh tikah a khir ih Balaam ih ke cu lungtlap ah a rialcih. Cutikah Balaam in a laak cu a vuak sal.

²⁶Vancungmi cu hmaiah a rak feh lala ih pial-awk thei lonak lamzin ceprep ah a rak ding.

²⁷Vancungmi a hmuh tikah a laak cu a bok. Balaam in a thin a suup thei nawn lo ih a laak cu a fungin a vuak ciamco.

²⁸Cutikah BAWIPA in laak cu a ṭongter ih Balaam hnenah, “Ziang ka lo ti ruangah so voi thum tiangtiang i vuak?” a ti.

²⁹Balaam in a laak hnen ahcun, “Lehnak menih i hman ruangah a si. Ralnam keng ningna cu atu rori-ah ka lo saat that ding naón,” tiah a ti.

³⁰Cutikah laak cun, “Na nun sung tutiang in na to ringringmi laak thotho ka si lo maw? Atu bangtuk in a hlanah ka lo ti dah maw?” a ti. “I ti dah lo,” tiah Balaam in a sawn.

³¹Cule BAWIPA in Balaam ih mit cu a vangter ih vancungmi pakhat a ralnam thawn a din kha a hmuhter. Cutikah Balaam cu leilung ah a bok.

³²Cule vancungmi cun, “Ziangah so hi bangtuk in na laak cu voi thum tiang na vuak? Hi lam feh ding na si lo naón na feh ruangah na lamzin ka lo kham a si.

³³Na laak in i hmu ih voi thum tiang a pial a si. Cutiin pial hlah sehla na laak cu ka zuah ding ih nang sawn hi ka lo that zo ding,” tiah a ti.

³⁴Cutikah Balaam in, “Ka sual a si. Ka lamzin i kham ih lamzinih na din kha ka theih lo ruangah a si. Hi lam ka feh vivo hi na lung a kim lo a si ahcun inn ah ka kir ding,” tiah vancungmi hnenah a ti.

³⁵Asinain vancungmi in, “Himi pawl hnenah feh ko aw; asinain sim ding ka lo timi lawng na sim pei,” a ti. Curuangah Balaam cu a ra kotu pawl hnenah a feh sal.

³⁶Balak in Balaam a ra ti a theih tikah a feh ih Moab ramri Arnon Tiva kapih Ar khua in a va hmuak.

³⁷Cutikah Balak in Balaam hnenah, “Ka lo sawm rero naón ziangah so na rat lo? Laksawng ṭhahnem i pe thei lo ding tiih na ruah ruangah maw si?” tiah a ti.

³⁸Cutikah Balaam in, “Atu cu ka ra thleng zo a sihi! Asinain ziang poh sim theinak ka nei lo. Pathian ih i simtermi lawnglawng ka sim ding a si,” a ti.

³⁹Cuticun Balaam cu Balak thawn Kiriath Huzoth khua ah an feh ih,

⁴⁰Balak in caw le tuu that in thawinak a tuah ih a sa hrekkhat cu Balaam le amah thawn a ummi hotu pawl a pek.

⁴¹A thaizing ah Balak in Balaam cu Bamoth Baal tlang ah a fehpi. Cutawk ihsin Balaam in Israel mi burpi umnak hmuahhmuah cu a hmu thei a si.