Read Falam Chin MIPUM SIARNAK 23 Bible Online

MIPUM SIARNAK 23 - Falam Chin bible

MIPUM SIARNAK 23

¹Cutikah Balaam in Balak hnenah, “Hitawk ah ka hrangah biakṭheng pasarih in dawl awla cawcang pasarih le tuucang pasarih i rak ken aw,” tiah a ti.

²A sim vekin a tuah ih Balak le Balaam in biakṭheng pakhat ah cawcang pakhat le tuucang pakhat fingfing biakṭheng pasarih ah thawinak an pek.

³Cule Balaam in Balak hnenah, “Na mei-ur thawinak kiangah hin rak ding hrih awla kei cu BAWIPA in i tong duh maw tong duh lo ka va hliahta hrih pei. BAWIPA in ka hnenih a langtermi hmuahhmuah cu ka lo sim ding,” tiah a ti. Cule Balaam cu tlang parah a feh ih,

⁴Pathian in Balaam cu a tong. Balaam in, “Biakṭheng pasarih ka dawl zo ih pakhat parah cawcang pakhat le tuucang pakhat fingfing ka thawi a si,” tiah a ti.

⁵Cutikah BAWIPA in, “Balak hnenah kir awla ka thucahmi va sim aw,” a ti.

⁶Curuangah Balaam cu a kir ih Balak cu a mei-ur thawinak kiangah Moab mi hotu pawl thawn a rak din hrih kha a hmu.

⁷Cule Balaam in a tanglam vekin profet ṭongkam in a ṭong: “Moab siangpahrang Balak in i ko, Aram[14] le nisuahnak lam tlang ihsin, ‘Ka aiah ra sim aw,’ i ti, ‘Israel mi pawl camsiat aw,’ i ti.

⁸Pathian ih camsiat lomi ziangtinso ka camsiat thei ding? Pathian ih camriam lomi ziangtinso ka camriam thei ding?

⁹Lungpi tlangsaang in anmah cu ka cuan, Tlangzik par ihsin anmah ka hmu. Anmahte a nungmi miphun an si, Miphun dang lakah a siarcih awmi an si lo.

¹⁰Jakob ih tefa pawl cu vunnel zat an si, Israel cithlah pawl cu siar cawk an si lo. Pathian ih minung bangin ka nunnak ni cu liamseh, Miding bangin daihnak in thi ning law,” tiah a ti.

¹¹Cutikah Balak in Balaam hnenah, “Ka parih na thil tuahmi hi ziangvek so a si? Ka ral pawl camsiat dingah hinah ka lo ko. Asinain anmah riangri thlawsuah na pek,” a ti.

¹²Cule Balaam in, “Keiih ka simmi cu BAWIPA in sim dingih i fialmi lawng a si,” tiah a ti.

¹³Cun Balak in Balaam hnenah cun, “Ra awla Israel mi hrekkhat lawng na hmuh theinak hmunah kan feh pei. Cutawk ihsin ka aiah camsiat hai aw,” a ti.

¹⁴Balak in Balaam cu Pisgah Tlang zik, Zofim ih lo ah a fehpi. Cutawk ahcun biakṭheng pasarih a dawl ih biakṭheng pakhat parah cawcang pakhat le tuucang pakhat fingfing thawinakah a pek.

¹⁵Cule Balaam in Balak hnenah, “Hitawk na mei-ur thawinak kiangah rak ding awla khitawk ah Pathian ka va tong ta pei,” tiah a ti.

¹⁶BAWIPA in Balaam cu a tong ih a ṭong dingmi pawl cu a sim ih Balak sim dingah a kirter.

¹⁷Balaam cu a kir ih Balak a mei-ur thawinak kiangah Moab mi hotu pawl thawn a din hrih kha a hmu. Cutikah Balak in, “BAWIPA in ziang a ti so?” tiah a rak sut.

¹⁸Balaam cun a thok ih profet ṭongkam in hiti in a ti: “Ra aw, Zippor fapa Balak, ra aw, Ka sim dingmi hi ra ngai hnik aw.

¹⁹Pathian cu thuphan per hmang milai vek a si lo, A thinlung a thleng leuhleuhmi milai vek khal a si lo. A tiamkammi hmuahhmuah cu a tuah suak, A ṭong ih tuah thluh an si.

²⁰Thlawsuah pek ding lawng hi in fialmi a si, Pathian in thlawsuahnak a pek zo ih ka khir sal thei nawn lo.

²¹Israel mi pawl hmailamih an fehnak dingah, Vanduainak le harsat tonnak ding ka hmu lo. BAWIPA an Pathian cu an hnenah a um ih, Pathian cu an Siangpahrang ah an aupi a si.

²²Pathian in Izipt ram ihsin a suahpi hai ih, An hrangah cawcang hraang bangin a ṭang a si.

²³Dawi siseh polsia siseh a um lo, Israel miphun dodal ding ahcun. Miphun pawl in Israel an hmuh tikah, ‘Zohhnik uh, Pathian thiltuah hi,’ an ti ding.

²⁴Israel miphun cu a cakzetmi kiosa vek a si, A deh ciami sa a bauh thluh le a ei thluh hlan lo, A thisen a in thluh hlan lo cu colh ti a nei lo,” a ti.

²⁵Cutikah Balak in Balaam hnenah, “Israel mi pawl camsiat ding cu na el thla rori a sihi! Sikhalsehla thlawsuahnak tal cu pe loin um aw,” a ti.

²⁶Asinain Balaam cun, “BAWIPA ih i fialmi lawnglawng ka tuah ding, tiah ka lo sim cia zo lo maw?” tiah a ti.

²⁷Balak in Balaam hnenah, “Ka hnenah ra awla hmun dangah ka lo fehpi ding. Cutawk ihsin cun ka ai-ih Israel mi pawl camsiat dingah BAWIPA in a lo siang khal a si thei men,” a ti.

²⁸Curuangah Balak in Balaam cu nelrawn hmuh theinak Peor Tlang zik ah a fehpi.

²⁹Cule Balaam in Balak hnenah, “Ka hrangah biakṭheng pasarih hitawk ah dawl awla cawcang pasarih le tuucang pasarih i rak ken aw,” a ti.

³⁰A tivek cun Balak in a tuah ih biakṭheng pakhat parah cawcang pakhat le tuucang pakhat fingfing thawinakah a pek.