Read Falam Chin MIPUM SIARNAK 24 Bible Online

MIPUM SIARNAK 24 - Falam Chin bible

MIPUM SIARNAK 24

¹BAWIPA in Israel mi pawl thluasuah pe dingah i duh ti kha Balaam in a thei zo ih curuangah a hlan bangtuk in aizingnak tla tuah dingah a feh nawn lo. Nelrawn lamah cun a hoi kir ih,

²Israel mi pawl a hrin a hrin ciarih an riah kha a hmu. Pathian ih thlarau cu a hnenah a rung thleng ih,

³profet ṭongkam in hiti in a phuang: “Beor fapa Balaam ih thuphuanmi, Fiangte ih a hmu theitu pa-ih ṭongkam cu,

⁴Pathian simmi a theitu pa-ih thucah mi cu. Ka mit meng tahrat in ka hmu, Ziangkimtithei Pathian ih langnak cu.

⁵Israel mi pawl ih puanthlam cu an mawi a si,

⁶A tluantluan ih ciin mi ungkung bangin, Tiva kiangih hmuan pawl an bang, BAWIPA ih ciinmi khukthli vek, Tidai kiangih sidar thing vek an si.

⁷Vanruah cat loin an ngah ding, Tidai a ciapmi lo sungah thlaici an tuh ding. An siangpahrang cu Agag hnakin a nasa deuh, A ukmi ram cu a kau ngaingai.

⁸Pathian in Izipt ram ihsin a suahpi, An hrangah cawcang hraang bangin a ṭang; An ral pawl cu an dolh thluh, An ruh an rialdip ih an thal pawl an khiak ṭheh.

⁹Israel cu a cak zetmi kiosa bangtuk a si, A ihthat lai ahcun zohman in an ṭhang ngam lo. Israel a thluasuahtu cu thlawsuah an si ve ding, Israel a camsiattu cu camsiat an si ve ding,” a ti.

¹⁰Cutikah Balak cu a thin hengin a kut a tum ih Balaam hnenah, “Ka ral pawl camsiat dingah ka lo ko; asinain voi thum rori thlawsuah na pek a si.

¹¹Atu zamrangin na inn ah kir aw. Laksawng pe dingah ka lo tiam naón BAWIPA in laksawng ngah ding cu a lo kham a si,” a ti.

¹²Balaam in, “Ka hnenih palai na rak thlahmi pawl hnenih ka sim zo vekin,

¹³na siangpahrang inn sungih a ummi sui le ngun a zatein i pek hmanah BAWIPA ih thupekmi el tahrat in, a ṭha a sikhal le a sia a si khalle, keimah ih thu cun ka nung thei lo. BAWIPA in sim dingih i fialmi lawnglawng ka sim ding a si,” a ti.

¹⁴Balaam in Balak hnenah, “Atu cu ka minung pawl hnenah ka kir thlang ding. Asinain ka feh hlanah hmailam caanah Israel mi pawl in na minung pawl parih an tuah dingmi hi ralrinnak ka lo sim cia duh a si,” a ti.

¹⁵Cule a thokih profet ṭongkam in hiti in a ṭong: “Beor fapa Balaam ih thuphuanmi, Fiangte ih a hmu theitu pa-ih ṭongkam,

¹⁶Pathian simmi a theitu le, A Sang Bik ih a ummi hnen ihsin fimnak a cotu in, Ka mit meng tahrat in ka hmu; Ziangkimtithei Pathian ih langnak cu.

¹⁷Hmailam tikcu caan sung khi ka hei zoh ih, Israel miphun ka hei hmu a si. Cuih miphun sung ihsin, Arsi bangtuk ih a tleumi Siangpahrang a suak ding. Deirel arsi bangin Israel miphun sungin a suak ding. Moab hotu pawl cu a vuak hai ding ih, Seth mi pawl cu a vuakthlak hai ding.

¹⁸Edom ramih a ral pawl cu a neh ding ih, An ram cu amah ih ta-ah a cang ding. Israel cu nehtu a si ringring ding.

¹⁹Israel cun a ke thuaiah a pal hai ding ih, A luatmi lakih neta bik tiangin a that ding,” a ti.

²⁰Cule Balaam in langnak a hmuhmi ah Amalek mi pawl a hmu ih hiti in a phuang: “Amalek cu miphun lakah a cak bikmi a si, Asinain neta bikah cun kumkhua in a hloralta ding,” a ti.

²¹Cun langnak a hmuhmi ahcun Ken mi pawl a hmu ih Balaam in hiti in a ṭong lala, “Atu na umnak hmun cu a himzet a si, Khaam saangpi lungpi parih vate bu vek a si;

²²Asinain nannih Ken mi pawl cu nan cem ding, Nan ral Assiria in a lo kaih tikah cun,” a ti.

²³Cun Balaam in hiti in a ṭong: “Saklam ih a tongkhawm mi pawl hi zoso an si?

²⁴Saipras ihsin mi dotu pawl tangphawlawng in an ra ding. Assiria le Eber an neh ding; Asinain annih khal kumkhua-in an hloralta ding,” a ti.

²⁵Cule Balaam cu a tho ih a khua ah a tlung; Balak khal a tlung ve.