Read Falam Chin MIPUM SIARNAK 25 Bible Online

MIPUM SIARNAK 25 - Falam Chin bible

MIPUM SIARNAK 25

¹Israel mi pawl Shittim[15] ih an um laiah an mipa pawl in Moab nunau pawl cu an sualpi ṭheu.

²Hi Moab nunau pawl cun an khawzing an biaknak le an raithawinak puai ah Israel mi pawl cu an sawm. Israel mi pawl in rawl an ei ih,

³Peor ih khawzing Baal cu an biak ve. Curuangah BAWIPA cu an parah a thin a heng ih,

⁴Moses hnenah, “Israel mi hotu pawl kokhawm awla senpi hmuhah cupawl cu that hai aw. Cuticun Israel mi parah ka thin a dai ding,” a ti.

⁵Cutikah Moses in Israel hotu pawl hnenah, “Nan hrin sungin Peor ih Baal khawzing a betu cu nan that ciar pei,” tiah a ti.

⁶Moses le Israel misenpi pawl cu an riahsia in BAWIPA umnak Puanthlam sangka ah an ṭap. Culai fangah an zate mithmuh ah Israel mipa pakhat in Midian nunau pakhat cu a deuthlam sungah a luhpi.

⁷Cumi cu Eleazar fapa, Aaron ih fapa sin, Finehas in a hmuh tikah a tho ih misenpi lakin a suak. Feipi a keng ih,

⁸cuih mipa le nunau nu cu a fuuk ih an deuthlam sungah cun an pahnih in a sun that. Curuangah Israel pawl parih a thlengmi natsia cu a reh.

⁹Asinain Israel mi thawng kul hluanli natsia in an rak thi zo.

¹⁰BAWIPA in Moses hnenah,

¹¹“Finehas in Israel mi parih ka thinhengnak cu a daiter zo a si. Anih cu keimah siar lo pathian ziangvek hman biak ding a duh hrimhrim lo. Curuangah Israel mi pawl ka siatsuah thluh lonak cu a si.

¹²Finehas cu sim awla kumkhuadaih in amah thawn thukamnak ka tuah ding.

¹³Keimah dodaltu ziangvek khawzing hman a pom thei lo ih, Israel misenpi ih sual ngaithiamnak khal a suahter ruangah amah le a tesinfa pawl cu kumkhua-in puithiam an si ding,” tiah a ti.

¹⁴Israel mipa, Midian nunau nu thawn, thahnak a tuartu cu Salu fapa Zimri a si. Amah cu Simeon cithlah sungah hrin pakhat ih lu a si.

¹⁵Nunau an thahmi ih hmin cu Kozbi a si ih a pa Zur cu Midian hnam lakah hrin khatih lal a si.

¹⁶BAWIPA in Moses cu,

¹⁷“Midian mi pawl cu do awla siatsuah thluh aw.

¹⁸Ziangahtile Peor ah nanmah an lo bum ih thil ṭha lo an tuah ruangah le Peor-ih natsia a thlen laiih thihnak a tuartu Kozbi ruangah siatsuah thluh ding an tlak a si,” tiah thu a pek.