Read Falam Chin MIPUM SIARNAK 27 Bible Online

MIPUM SIARNAK 27 - Falam Chin bible

MIPUM SIARNAK 27

¹Josef fapa Manasseh, Manasseh fapa Makhir, Makhir fapa Gilead, Gilead fapa Hefer, Hefer fapa Zelofehad a si. Zelofehad in fanu lawng a nei ih anmah tla cu Mahlah, Noah, Hoglah, Milkah le Tirzah an si.

²Cuih a fanu pawl cu Moses, puithiam Eleazar, hruaitu pawl le misenpi hmaiah Puanthlam sangka ahcun an feh ih,

³“Kan pa in hramlak ah in thihsan zo; fapa pakhat hman a nei lo. BAWIPA a dodaltu Korah ih dungthluntu lakah anih cu a tel lo. Amah ih sual ruangah a thi a si.

⁴Fapa neih lo ruangah zianghrangah so kan pa ih hmin cu a sungkhat lak ihsin a hlohral ta ding? Kan pa ih unau lakah kannih khal covo in pe ve uh,” tiah an dil.

⁵Cutikah an thu cu Moses in BAWIPA a ron.

⁶BAWIPA in a hnenah,

⁷“Zelofehad fanu pawl ih an dilmi cu a dik a si. An pa ih unau lakah annih khal covo pe ve aw. An pa ih ro cu anmah in co hai seh.

⁸Cun Israel mi pawl cu sim awla, mi pakhatkhat fapa nei loih a thih ahcun a ro cu a fanu in a co pei.

⁹Fanu a neih lo asile a unau in an co pei.

¹⁰Unau khal a neih lo a si ahcun a pa ih unau in an co pei.

¹¹A pa khal unau a neih lo a si ahcun a sungkhat lakih a nai bik in a co pei ih, amah ih ta ah a cang ta pei. Himi cu BAWIPA keimah ih thupekmi a si ih Israel mi pawl in an thlun dingmi daan a si,” tiah a ti.

¹²BAWIPA in Moses hnenah, “Abarim Tlangah hung feh awla Israel mi pawl hnenih ka pek dingmi ram cu va thlir aw.

¹³Na thlir ṭheh cun na u Aaron a nunnak a cem bangtuk in nang khal a cem ve ding.

¹⁴Ziangahtile Zin hramlakih ka thupekmi nan pahnih in nan el ruangah a si. Meribah ah Israel misenpi in in dodal tikah keimah ih thianhlimnak huham cu nan dinpi duh lo a si,” a ti. Meribah cu Zin hramlak Kadesh ih cirhti a si.

¹⁵Cutikah Moses in,

¹⁶“Maw BAWIPA nunnak hmuahhmuahih hramṭohnak Pathian,

¹⁷na minung pawl hi tuukhaltu nei lo tuurual bangtuk an si lonak dingah mi hruai theitu le raldo tikih mi ho theitu mi pakhat hril hram aw,” tiah a dil.

¹⁸Cutikah BAWIPA in Moses hnenah, “Thilti theinak a nei mi Nun ih fapa Joshua cu ko awla a lu parah na kut suang aw.

¹⁹Puithiam Eleazar le misenpi hmaiah cun dingter awla an zate ih hmaiah cun nangmah ih ai-awhtu a si, tinak thu than aw.

²⁰Cun Israel misenpi in a thu an thlunnak dingah na thuneihnak hrekkhat cu amah pe aw.

²¹Joshua in puithiam Eleazar cu a rinsanzet pei ih Eleazar cun keimah ih duhnak thei dingah Urim le Thummim [16] a hmang pei. Cuticun Joshua le Israel misenpi cu Eleazar in a ho pei ih amah ih thu in ziangtinkim ah an um pei,” a ti.

²²BAWIPA ih thupekmi bangtuk cun Moses in a tuah ṭheh. Puithiam Eleazar le misenpi hmaiah cun Joshua cu a dinter ih,

²³Joshua-ih lu parah a kut a suang ih amah ai run awhtu dingah nemhngetnak a tuah.