Read Falam Chin MIPUM SIARNAK 28 Bible Online

MIPUM SIARNAK 28 - Falam Chin bible

MIPUM SIARNAK 28

¹Israel mi pawl in rimthawmi rawlhun thawinak pawl BAWIPA ih hnenah a tikcu kim tikih an pek dingah sim dingin BAWIPA in Moses hnenah thu a pek.

³BAWIPA hnenih rawlhun thawinak nan pek dingmi pawl cu hihi an si: nitin mei-ur thawinak hrangah raitluanmi kum khat ti tuucangte pahnih;

⁴tuucangte pakhat cu zinglamah, a dang pakhat cu zanlam ah, nan pek pei.

⁵Cumi thawinak thawn hmun khatah fanghun thawinak tla nan pek pei ih olif siti ṭha bik khuat khat thawn rawimi sangphut reeltan a si ding.

⁶BAWIPA hnenih rimthaw thawinak pekmi a si ih Sinai Tlang parih hmaisa bik nan rak thawi bangtuk in hi thawinak cu nitinte meisa ur in thawinak a si.

⁷Cumi pakhatnak tuucangte pekmi thawn inmi thawinak khal nan pek pei ih sabit khuat khat biakṭheng ah nan toih pei.

⁸Zinglam thawinak nan pekmi bangtuk in pahnihnak tuucangte cu zanlam ah nan pek pei ih inmi thawinak khal nan pek pei. Himi cu rawlhun thawinak a si ih BAWIPA ih hrangah rimthaw a si.

⁹Sabbath ni ah kum khat ti raitluan tuucangte pahnih, thlairawl thawinak hrangah olif siti thawn rawimi sangphut reel khat cu inmi thawinak thawn nan pek pei.

¹⁰Hi mei-ur thawinak cu nitinte pekmi fanghun thawinak le inmi thawinak hlei ah Sabbath nitin pekmi thawinak a si pei.

¹¹Thlatin ni hmaisabik ah BAWIPA ih hnenah a tanglam pawl cu nan pek pei: cawcangte pahnih, tuucang pakhat, kum khat ti tuucangte pasarih, an zatein raitluan an si pei.

¹²Cuih tlunah olif siti thawn rawimi thlairawl thawinak, cawcang pakhat ah sangphut reel khat le a tan, tuucang pakhat ah sangphut reel khat thawn,

¹³kum khat ti tuucangte pakhat ah sangphut reel tan thawn nan pek pei. Hi mei-ur thawinak pawl cu rawlhun thawinak an si ih BAWIPA ih hrangah rimthaw an si.

¹⁴Felzet ih inmi thawinak pekmi a si ahcun cawcang pakhat ah sabit khuat hnih, tuucang pakhat ah khuat khat le a hrek, kum khat ti tuucangte pakhat ah khuat khat nan pek pei. Kum khat sung thlatin ni hmaisa bikih mei-ur thawinak pek tikah thlun ding daan an si.

¹⁵Cun nitin mei-ur thawinakah sabitti an telh ih hlei ah sualthlah thawinak hrangah mecang pakhat pek a si pei.

¹⁶BAWIPA ih upat cawimawinak ih tuahmi Lantak Puai cu thla hmaisa bik [17] ni hleili ni ah tuah a si pei.

¹⁷Ni hleinga ni ihsin biaknak puai a thok pei ih ni sarih sung a si pei. Cuih sung hmuahhmuah cu thilnu tel lo sang nan ei pei.

¹⁸Puai ni hmaisa bik ni ahcun ziang hnaṭuan hman nan ṭuan lo pei. Pathian biak dingah nan pumkhawm sawn pei.

¹⁹Mei-ur thawinak pek uhla cumi cu BAWIPA hnenih pekmi rawlhun thawinak a si pei: cawcangte pahnih, tuucang pakhat, kum khat ti tuucangte pasarih, an zatein raitluan nan pek pei.

²⁰Fanghun thawinak feltein tuah uhla olif siti thawn rawi uh; cawcang pakhat ah sangphut reel khat le a tan, tuucang pakhat ah reel khat,

²¹tuucangte pakhat ah reeltan a si pei.

²²Cuih tlunah sualthlah thawinak hrangah mecang pakhat nan pek pei ih cuticun misenpi thianhlimnak hrangah mawhnak thawinak cu tuah a si pei.

²³Himi cu nitinte tuahmi mei-ur thawinak hlei ah nan pek pei.

²⁴Cubangtuk ṭhiamṭhiam in ni sarih sung BAWIPA ih hnenah rawlhun thawinak, a hrangih rimthawmi cu nan pek pei. Himi cu nitinte nan pekmi mei-ur thawinak le inmi thawinak hlei ah nan pek pei.

²⁵Ni sarih ni ah a thianghlim mi pumkhawmnak nan nei pei ih zianghman nan ṭuan lo pei.

²⁶Nan Rawllak Puai ni hmaisa bik BAWIPA hnenih fangthar nan pek tikah Pathian biak dingah nan pumkhawm pei ih zianghman hna nan ṭuan lo pei.

²⁷BAWIPA hrangah rimthaw, mei-ur thawinak nan pek pei ih, cawcang pahnih, tuucang pakhat, le kum khat ti tuucangte pasarih, an zatein raitluan an si pei.

²⁸Cumi thawn olif siti rawimi, felteih tuahmi thlairawl thawinak nan pek pei ih cawcang pakhat ah sangphut reel khat le a tan, tuucang pakhat ah reel khat le,

²⁹kum khat ti tuucangte pakhat ah reel tan a si pei.

³⁰Cuih tlunah sualthlah thawinakah mecang pakhat nan pek pei ih cuticun misenpi thianhlimnak hrangih sualthlah thiannak cu nan tuah pei.

³¹Hi thawinak pawl le inmi thawinak cu nitin nan tuahmi mei-ur thawinak le thlairawl thawinak hlei ah nan pek pei.