Read Falam Chin MIPUM SIARNAK 3 Bible Online

MIPUM SIARNAK 3 - Falam Chin bible

MIPUM SIARNAK 3

¹BAWIPA in Sinai tlang ah Moses hnenih thu a sim tikah Aaron le Moses ih tefa pawl cu a tanglam bangtuk in an si.

²Aaron in fapa pali a nei; upa bik cu Nadab a si ih a dang pawl cu Abihu, Eleazar, le Ithamar an si.

³Anmah cu puithiam ṭuan dingah hriakculhnak le kutsuannak ngahtu an si.

⁴Asinain Nadab le Abihu cu Sinai nelrawn ah BAWIPA hnenih a thianghlim lomi mei-ur thawinak an pek ruangah an pahnih in thah an tong. Fa pakhat hman an nei lo; curuangah an pa Aaron a nun sung hmuahhmuah cu Eleazar le Ithamar in puithiam hna an ṭuan.

⁵BAWIPA in Moses hnenah,

⁶“Levi mi pawl cu puithiam Aaron hnenih um dingah le a hna ṭuan dingah ratpi hai aw.

⁷Ka umnak Puanthlam hrangih a ṭulmi, Israel misenpi le anmah puithiam pawl hrangih a ṭulmi hnaṭuan pawl an ṭuan pei.

⁸Puanthlam sungih ummi thilri pawl an kilkhawi pei ih Israel mi pawl hrangah biaknak hnaṭuantu an si pei.

⁹Israel mi sung in Levi mi pawl cu Aaron le a fapa pawl riantu dingah pek an si pei.

¹⁰Asinain puithiam hnaṭuan ṭuantu dingah cun Aaron le a fapa pawl lawng an si pei. Zozo khal Aaron le a fapa pawl ih hnaṭuan a ṭuan tumtu cu thah an si pei,” tiah a ti.

¹¹BAWIPA in Moses hnenah,

¹²“Atu-ihsin Israel mi pawl ih fapatir hmuahhmuah ai-ah Levi mi pawl cu ka lak pei ih keimah ih ta an si thlang ding.

¹³Ziangahtile Izipt ram ah Izipt mi pawl ih fapa upa bik ka thah thluh tikah Israel mi pawl ih fapa upa bik hmuahhmuah le ṭilva pawl ih fatir hmuahhmuah cu ka thianhlimter ih keimah ih hrangah ka hammi an si. Atu-ah Israel mi pawl fapatir aiah Levi mi pawl ka lak a si. Keimah cu BAWIPA ka si,” tiah a ti.

¹⁴Sinai nelrawn ah BAWIPA in Moses hnenah,

¹⁵“Levi mi pawl cu an hrin ciar le an innsang ciarin thla khat le a tlunlam mipa hmuahhmuah mipum na siar pei,” tiah thu a pek.

¹⁶BAWIPA ih thupekmi bangtuk in Moses cun a tuah.

¹⁷Levi in fapa pathum a nei: Gershon, Kohath le Merari an si ih anmah cu an hrin ciarih cithlahtu an si ruangah an hmin cu an hrin hminah an cangta.

¹⁸Gershon in fapa pahnih a nei ih Libni le Shimei an si.

¹⁹Kohath in fapa pali a nei ih Amram, Izhar, Hebron le Uzziel an si.

²⁰Merari in fapa pahnih a nei ih Mahli le Mushi an si. Anmah cu cithlahtu an si ih an hmin cu an hrin hmin ciarah a cang.

²¹Gershon cithlah ah hrin pahnih an um ih Libni hrin le Shimei hrin an si.

²²Mipa thla khat ti le a tlunlam hmuahhmuah mipum an siar tikah an zatein thawng sarih le zanga an si.

²³Hi hrin pawl cu nitlaknak lam, Puanthlam ih dunglamah an riahbuk sak ding an si ih,

²⁴Lael fapa Eliasaf cu an lal a si.

²⁵Puanthlam an kilkhawi ding ih a lenglam khuh siseh a sunglam khuh siseh, Puanthlam luhnak sangka puanzar,

²⁶Puanthlam le biakṭheng kimvelih a ummi kulhnak puanzar pawl le kulhnak sangka puanzar tla a kiltu an si. Hi thilri pawl hrangih a ṭulmi hmuahhmuah ṭuantu ding an si.

²⁷Kohath cithlah ah hrin pali an um. Amram hrin, Izhar hrin, Hebron hrin le Uzziel hrin pawl an si.

²⁸Thla khat le a tlunlam mipa hmuahhmuah mipum an siar ih an zatein thawngriat le zaruk an si.

²⁹Hi hrin pawl cu Puanthlam ih thlanglam kapah an riahbuk an sak ding ih,

³⁰Uzziel ih fapa Elizafan cu an lal a si.

³¹Anmah cu Thukam Kuang, cabuai, meisa vannak tung, biakṭheng pawl, Hmun Thianghlim ih puithiam pawl ih an hmanmi beelkheng pawl le Hmun Thianghlim Bik sangka puanzar pawl an kilkhawi ih hi thilri pawl thawn peh-aw in ṭuan a ṭulmi hmuahhmuah a ṭuantu ding an si.

³²Levi mi pawl ih lal cu puithiam Aaron ih fapa Eleazar a si. Amah cu Hmun Thianghlim ih hnaṭuantu pawl hotu a si.

³³Merari cithlah ah hrin pahnih an um. Mahli hrin le Mushi hrin an si.

³⁴Thla khat le a tlunlam mipa hmuahhmuah mipum an siar ih an zatein thawng ruk le zahnih an si.

³⁵An hrin ih lal cu Abihail ih fapa Zuriel a si. Hi hrin pawl cu Puanthlam ih saklam ah an riahbuk an sak.

³⁶Anmah tla cu Puanthlam saknak thing pawl, phartlang pawl, a ṭhuam pawl, a tawdam pawl le innkilih a pehtuah pawl an kilveng ih hi thilri pawl hrangih a ṭulmi hmuahhmuah an ṭuan ding.

³⁷Cuih tlunah a lenglam kulhnak hrangih ṭhuam pawl, a tawdam pawl, hri khihnak fungkhen pawl le hridai pawl tla an kilveng ding an si.

³⁸Moses le Aaron le a fapa pawl cu Puanthlam ih nisuahnak lamah an riahbuk an sak pei. Israel mi pawl hrangah Hmun Thianghlim ih tuah dingmi hnaṭuan hmuahhmuah cu anmah in an ṭuan ding. Cuih hnaṭuan cu midang pakhatkhat in ṭuan a tum asile thah a si ding.

³⁹Levi mi pawl, thla khat le a tlunlam mipa hmuahhmuah cu BAWIPA ih thupeknak vekin Moses in an hrin ciarin mipum a siar tikah an zatein thawngkul hluanhnih an si.

⁴⁰BAWIPA in Moses hnenah, “Israel mi pawl ih fapa upa bik thla khat le a tlunlam hmuahhmuah cu an hmin rori in cazin lak thluh aw.

⁴¹Keimah hi BAWIPA ka si. Israel mi fapa upa bik hmuahhmuah aiah Levi mi pawl cu ka ta dingah ka ham a si; cule Israel mi ṭilva-ih fatir hmuahhmuah aiah Levi mi pawl ih ṭilva pawl ka ham a si,” tiah a ti.

⁴²Moses in BAWIPA ih thupekmi cu a thlun ih,

⁴³thla khat le a tlunlam fapa upa bik hmuahhmuah mipum a siar tikah an zatein thawngkul hluanhnih zahnih sawm sarih le pathum an si.

⁴⁴Moses hnenah BAWIPA in,

⁴⁵“Israel mi pawl fapa upa bik aiah Levi mi pawl cu ka ta dingah hlan awla, Israel mi pawl ṭilva-ih fatir hmuahhmuah aiah Levi mi pawl ih ṭilva cu i pe aw. Levi mi pawl cu ka ta an si ding. Keimah cu BAWIPA ka si.

⁴⁶Cule Israel mi pawl ih fapa upa bik pawl cu Levi mi hnakin zahnih sawm sarih le pathum in an tam sawn a si ruangah a hleimi fapa pawl cu na tlen pei.

⁴⁷Hotu upa pawl ih an hman ṭheu vekin fapa pakhat cu ngun tangka fang nga in na tlen pei.

⁴⁸Cuih tangka cu Aaron le a fapa pawl hnenah na pek pei,” tiah a ti.

⁴⁹A ti vek in Moses in a thlun ih,

⁵⁰ngun tangka thawngkhat zathum sawmruk le fangnga a suah ih,

⁵¹Aaron le a fapa pawl hnenah a pek.