Read Falam Chin MIPUM SIARNAK 33 Bible Online

MIPUM SIARNAK 33 - Falam Chin bible

MIPUM SIARNAK 33

¹Israel mi pawl Izipt ram in an suak ih Moses le Aaron ho in an riahnak hmunih hmin pawl cu a tanglam pawl hi an si.

²BAWIPA ih thupeknak bangtuk in Moses in an riahhmun pawl ih hmin cu a sangsang in a ngan.

³Israel mi pawl Izipt ram in an suah kum, thla hmaisa bik ni hleinga ni a hmaisa bik Lantak Puai ih thaisun ah Izipt ram ihsin an suak. BAWIPA ih humhimnak in Rameses khawpi in an pok.

⁴BAWIPA ih thahmi an fapa upa bik pawl an phum ih a buai rerotu Izipt misenpi ih hmuhhnganah Israel mi pawl cu an suak luilo. Hi bangtuk a si ruangah BAWIPA cu Izipt ih khawzing pawl hnakin a cak sawn ticu BAWIPA Amah in fiangtein a langter a si.

⁵Israel mi pawl cu Rameses in an suak ih Sukkoth ah riahhmun an tuah.

⁶Sukkoth in an suak ih hramlak nelrawn kiangih ummi Etham ah riahhmun an tuah.

⁷Etham in an suak ih Baal Zefon in nisuahnak lamih ummi Pi Hahiroth lamah an kir ih Migdol kiangah riahhmun an tuah.

⁸Pi Hahiroth in an suak ih Tipi Sen an tan hnuah Etham nelrawn ramṭhing an thleng. Cuih nelrawn ramṭhing ah ni thum sung an feh ih Marah ah riahhmun an tuah.

⁹Marah in an suak ih Elim ah riahhmun an tuah. Elim ah cerhti hmun hleihnih a um ih ṭhulhfau kung sawmsarih khal a um.

¹⁰Elim in an suak ih Tipi Sen tikel kiangah riahhmun an tuah.

¹¹Cutawk in an suak ih Sin nelrawn ramṭhing ah riahhmun an tuah.

¹²Sin nelrawn ramṭhing in an suak ih Dofkah ah riahhmun an tuah.

¹³Dofkah in an suak ih Alush ah riahhmun an tuah.

¹⁴Alush in an suak in Refidim ah riahhmun an tuah. Refidim ahcun misenpi hrangah tidai in ding a um lo.

¹⁵Refidim in an suak ih Sinai nelrawn ramṭhing ah riahhmun an tuah.

¹⁶Sinai nelrawn ramṭhing in an suak ih Kibroth Hattaavah ah riahhmun an tuah.

¹⁷Kibroth Hattaavah in an suak ih Hazeroth ah riahhmun an tuah.

¹⁸Hazeroth in an suak ih Rithmah ah riahhmun an tuah.

¹⁹Rithmah in an suak ih Rimmon Perez ah riahhmun an tuah.

²⁰Rimmon Perez in an suak ih Libnah ah riahhmun an tuah.

²¹Libnah in an suak ih Rissah ah riahhmun an tuah.

²²Rissah in an suak ih Kehelathah ah riahhmun an tuah.

²³Kehelathah in an suak ih Shefer Tlang ah riahhmun an tuah.

²⁴Shefer Tlang in an suak ih Haradah ah riahhmun an tuah.

²⁵Haradah in an suak ih Makheloth ah riahhmun an tuah.

²⁶Makheloth in an suak ih Tahath ah riahhmun an tuah.

²⁷Tahath in an suak ih Terah ah ruahhmun an tuah.

²⁸Terah in an suak ih Mithkah ah riahhmun an tuah.

²⁹Mithkah in an suak ih Hashmonah ah riahhmun an tuah.

³⁰Hashmonah in an suak ih Moseroth ah riahhmun an tuah.

³¹Moseroth in an suak ih Bene Jaakan ah riahhmun an tuah.

³²Bene Jaakan in an suak ih Hor Haggidgad ah riahhmun an tuah.

³³Hor Haggidgad in an suak ih Jotbathah ah riahhmun an tuah.

³⁴Jotbathah in an suak ih Abronah ah riahhmun an tuah.

³⁵Abronah in an suak ih Ezion Geber ah riahhmun an tuah.

³⁶Ezion Geber in an suak ih Zin nelrawn ramṭhingah riahhmun an tuah. (Zin cu Kadesh ti a si.)

³⁷Zin nelrawn ramṭhing in an suak ih Edom ram kiangte Hor Tlang ah riahhmun an tuah.

³⁸BAWIPA ih thupeknak bangtuk in puithiam Aaron cu Hor Tlang ah a kai ih Izipt ram ihsin Israel mi pawl an suahnak kum sawmli kum, thla nganak [19] ni hmaisa bik ni ah a thi.

³⁹Aaron cu a kum za le kul hluanthum a ti ah Hor Tlangah cun a thi a si.

⁴⁰Cun Thlanglam Kanaan ramih a ummi siangpahrang Arad in Israel mi pawl an ra ti kha a thei.

⁴¹Hor tlang in an suak ih Zalmonah ah riahhmun an tuah.

⁴²Zalmonah in an suak ih Punon ah riahhmun an tuah.

⁴³Punon in an suak ih Oboth ah riahhmun an tuah.

⁴⁴Oboth in an suak ih Moab ram Iye Abarim ah riahhmun an tuah.

⁴⁵Iye Abarim in an suak ih Dibon Gad ah riahhmun an tuah.

⁴⁶Dibon Gad in an suak ih Almon Diblathaim ah riahhmun an tuah.

⁴⁷Almon Diblathaim in an suak ih Nebo Tlang kiang Abarim Tlang ah riahhmun an tuah.

⁴⁸Abarim Tlang in an suak ih Beth Jeshimoth le Akasia Phairawn karlak,

⁴⁹Jerikho zawn Jordan Tiva ral, Moab hmunrawn ah riahhmun an tuah.

⁵⁰Jerikho khua zawn Jordan Tiva khatlam ral, Moab hmunrawn ahcun BAWIPA in Moses hnenah,

⁵¹Israel mi pawl hrangah daan a pek: “Jordan Tiva nan tan ih Kanaan ram nan luh tikah,

⁵²ram sungih a ummi miphun pawl cu nan dawi thluh hai ding. Lungto in siseh, thir in siseh, milem an tuahmi hmuahhmuah le an khuavang biaknak pawl hmuahhmuah cu nan siatsuah thluh pei.

⁵³An ram cu nan luah pei ih cunah nan um pei. Ziangahtile nan umnak dingah ka lo pe zo a si.

⁵⁴Kanaan ram cu nan hnam le nan hrin sungah camcawhfung zukin nan zem aw pei ih, hrin tam deuh pawl cu ram tum deuh, hrin mal deuh pawl cu ram fate deuh, tiin nan zem pei. Camcawhfung zukin an zemmi ram cu a zuktu in a co tata ding.

⁵⁵Sikhalsehla ram sungih a rak ummi pawl nan dawisuak hai lo a si ahcun nan lakih a taangmi pawl cu nan hrangah mit sungih hnawm bangtuk le nan hnak sungih misuntu hling bangtuk in hnaihnoktu le harnak a lo petu an si ding ih nan umnak kipah a lo do ringringtu an si ding.

⁵⁶Nan dawisuak lo a si ahcun anmah siatsuah thluh ding ka tum vekin nanmah khal ka lo siatsuah thluh hai ding a si,” a ti.