Read Falam Chin MIPUM SIARNAK 34 Bible Online

MIPUM SIARNAK 34 - Falam Chin bible

MIPUM SIARNAK 34

¹BAWIPA in Moses hnenah

²Israel mi pawl hrangah a tanglam thu pawl cu a pek: “Kanaan ram nan luh tikah nan ramih ramri pawl cu a tanglam bangtuk in a si ding.

³Thlanglam nan ramri cu Zin nelrawn in a thok pei ih Edom ramri in a feh ding. Tipi Thi thlanglam kap nisuahnak lam a thleng ding.

⁴Cun Akrabbim Tlangkawn lamah a vung suk pei ih Zin in a feh ding ih Kadesh Barnea tiang thlanglam ah a vung ding. Cule saklam nitlaknak lamah Hazar Addar ah a so ding ih Azmon tiang a feh ding.

⁵Cutawk ihsin Izipt ramri tiva lamah a her-aw ding ih Mediterranean Tifinriat ah a net ding.

⁶“Nitlaklam ramri cu Mediterranean Tifinriat a si ding.

⁷“Saklam ramri cu Mediterranean in Hor Tlang tiang a feh pei ih,

⁸cutawk ihsin Hamath Tlangkawn tiang a feh pei. Cule Zedad le,

⁹Zifron tiang a feh pei ih Hazar Enan ah a net ding.

¹⁰“Cun nisuahlam ramri cu Hazar Enan in Shefam tiang dingtein a feh ding.

¹¹Cuih hnu ah Ain in nisuahnak lamih a ummi Harbel ah a vung suk ding ih cutawk in Galilee Tili nisuahnak lam kamih tlang ah a vung ding ih,

¹²Jordan Tiva thlun in thlanglam ah Tipi Thi tiang a suk ding. Himi pawl cu nan ram kimvelih ramri an si ding,” a ti.

¹³Cun Moses in Israel mi pawl hnenah, “Hi ram cu BAWIPA in nanmah hrin hrin kua le a hrek pawl hnenih a lo pekmi ram a si ih camcawhfung zukin nan co dingmi ram a si.

¹⁴Reuben le Gad hrin pawl le Manasseh hrin a hrek pawl cu,

¹⁵Jordan Tiva ih nisuahnak lam Jerikho khatlam ralah an innsang ciarin ram an zem-aw zo a si,” tiah a ti.

¹⁶BAWIPA in Moses hnenah,

¹⁷“Puithiam Eleazar le Nun ih fapa Joshua in ram zem-awk cu ṭuanvo an lak ding.

¹⁸Cule anmah bawmtu dingah hrin khat in hotu pakhat fingfing hril awla,

¹⁹a tanglam bangtuk in la aw: Judah hrin in Jefunneh ih fapa Kaleb,

²⁰Simeon hrin in Ammihud ih fapa Shelumiel,

²¹Benjamin hrin in Khislon ih fapa Elidad,

²²Dan hrin in Jogli ih fapa Bukki,

²³Josef tefa Manasseh hrin in Efod ih fapa Hanniel,

²⁴Efraim hrin in Shiftan ih fapa Kemuel.

²⁵Zebulun hrin in Parnak ih fapa Elizafan,

²⁶Issakhar hrin in Azzan ih fapa Paltiel,

²⁷Asher hrin in Shelomi ih fapa Ahihud,

²⁸Naftali hrin in Ammihud ih fapa Pedahel,” tiah a ti.

²⁹Hi hotu pawl cu Kanaan ram ah Israel mi pawl hrangih ram zemtu dingah BAWIPA ih fialmi an si.