Read Falam Chin MIPUM SIARNAK 35 Bible Online

MIPUM SIARNAK 35 - Falam Chin bible

MIPUM SIARNAK 35

¹Jerikho khua zawn Jordan Tiva khatlam ral, Moab hmunrawn ah BAWIPA in Moses hnenah,

²“Israel mi pawl sim awla an comi ram sung ihsin Levi mi pawl umnak ah khawpi pawl le khawpi kiangah ṭilva tlannak ram pawl an pek pei.

³Hi khawpi pawl cu Levi mi pawl comi an si pei ih cutawkah an um pei. A kiangkap cu an caw le an ṭilva dangdang pawl hrangah a si pei.

⁴An khua kiang ṭilva tlannak ram cu khua phardawl ihsin tah in pi thawngkhat le zanga in a thok ding ih khua vuakvel ah a um ding.

⁵Cun ṭilva tlannak ram cu an khua ihsin pi thawng thum a kau pei ih khua vuakvel ah a um ding ih a laifangah khawpi cu a um ding.

⁶Levi mi pawl hnenah rolnak khawpi paruk nan pek pei ih mi pakhatkhat in lai a thah pang tikih a rolnak dingah a si pei. Hi hlei ah a dang khawpi sawmli le pahnih pek uhla,

⁷a zatein an tlangram pawl thawn khawpi sawmli le pariat an si ding.

⁸An hrin ram ciar sungih Levi mi pawl ih khawpi zat ding cu an ram tum le fatet thu-in zoh a si pei,” tiah a ti.

⁹BAWIPA in Moses hnenah,

¹⁰Israel mi pawl sim dingin thu a pek ih, “Jordan Tiva nan tan ih Kanaan ram nan luh tikah,

¹¹mi pakhat in milai a thah pang tikih a rolnak dingah khawpi pawl nan hril pei.

¹²Cutawk ah a rol pei ih a thahmi sungkhat pawl in phuhlam an duh khalle a him ding. Mithah an puhmi pa cu misenpi hmaiih a thu an relcat hlan ahcun an that lo pei.

¹³Khawpi paruk hril uh:

¹⁴Jordan Tiva in nisuahnak lamah khawpi pathum, Kanaan ramah khawpi pathum nan hril pei.

¹⁵Hi khawpi pawl cu Israel mi siseh, hrin dangmi a laangte ih a ummi, a si lole reipi a ummi siseh, milai an thah pang tikah an rolnak khawpi an si pei.

¹⁶“Sikhalsehla mi pakhat in thir hriamhrei hmang tahrat in mi a thah a si ahcun laithat a si ruangah amah cu thah a si ve pei.

¹⁷Mi pakhatkhat in lungto hmang tahrat in mi a thah a si ahcun laithat a si ruangah amah cu thah a si ve pei.

¹⁸Mi pakhatkhat in thingtan lak tahrat in mi a thah a si ahcun laithat a si ruangah amah cu thah a si ve pei.

¹⁹A thahmi pa ih sungkhat nai bik in laithat pa cu a that ve ding. A hmuh tik pohah a that pei.

²⁰“Mi pakhat in midang pakhat cu a hua ih khaam ah a tuul thlak, a si lole a bawh ih ziangin maw a deng,

²¹a si lole a kuttum in a thong ih a thih a si ahcun laithat a si ruangah amah cu thah a si pei. A thah mi-ih sungkhat nai bik in laithat pa cu a that ve ding. A hmuh tik pohah a that pei.

²²“Mi pakhat in a huatmi a si lo naón midang pakhat a tuul thlak pang, a si lole bawh loin ziangin simaw a deng pangih a thi;

²³a si lole ṭhatein zohta loin mi pakhat in lungto a deng ih tumhrim si lo, a ral khal a si lo naón midang pakhat a deng that pang a si ahcun,

²⁴misenpi pawl in a thu an ṭhen sak tikah a thi mi-ih sungkhat, phulak tumtu ṭan loin mi a that pangtu ṭan in a thu cu an rel pei.

²⁵Misenpi pawl in laithat an puhmi pa cu phulak a duhtu, a thi mi pa-ih sungkhat pawl hnen ihsin nan humsuak pei ih a rak rolnak khua ahcun nan kuat sal pei. Mi a thah laiih Puithiam Sang a ṭuantu a thih hlanlo cu cutawk khua ah a um pei.

²⁶Laithat pa cu a rolnak khua in a suak ih,

²⁷a thah mi ih sungkhat in an hmu ih an thah a si ahcun himi cu phuhlam a si ruangah laithat a si lo.

²⁸Laithat pa cu rolnak khawpi ah Puithiam Sang a nun sung hmuahhmuah cu a um pei. Puithiam Sang a thih hnuah cun a inn ah a kir thei pei.

²⁹Hi daan pawl cu nanmah le nan tesinfa pawl in khuitawkih nan um khal asile nan thlun dingmi a si.

³⁰“Laithah an puhmi pa cu thutheitu pahnih maw, pahnih hnakih tam maw an um lawngah laithat tiin thah theih a si pei. Thutheitu pakhat ih theihnak lawng cu laithat ti dingah a kim lo.

³¹Laithat cu thah a si pei. Thahnak in luat dingah paisa in a tlen-aw thei lo pei.

³²Rolnak khawpiih a rol zomi pa cu Puithiam Sang a thih hlan ahcun a khua ah kir sal dingah tlennak paisa a pek khalle nan sang lo pei.

³³Nan kirter asile nan umnak nan ram cu nan ti borhhlawh a si. Laithahnak in ram cu nan borhhlawhter ih mi pakhatkhat an thahnak ram thianter dingah laithat pa an thah ve dah ti lo ahcun sualthlah thiannak dang zianghman a um lo.

³⁴Nan umnak ram cu borhhlawhter hlah uh, ziangahtile keimah hi BAWIPA ka si ih Israel mi lakah ka um a si,” tiah a ti.