Read Falam Chin MIPUM SIARNAK 5 Bible Online

MIPUM SIARNAK 5 - Falam Chin bible

MIPUM SIARNAK 5

¹BAWIPA in Moses hnenah,

²“Israel mi pawl in anmah lakih phaarnat a tuarmi le a thihnai a dokmi le miruak a dai ruangih a thiangfai lomi hmuahhmuah cu an riahnak hmun ihsin an dawi thluh pei.

³An hnenih ka umnak an riahnak hmun cu an balhter lonak dingah a thiangfai lomi hmuahhmuah cu nunau siseh, mipa siseh, dawi thluh hai seh,” tiah thu a pek.

⁴BAWIPA ih thupek bangtuk in Israel mi pawl cun an thlun ih mi thiangfai lo pawl cu an riahnak ihsin an dawi thluh.

⁵BAWIPA in Moses hnenah

⁶a tanglamih daan pawl cu Israel mi pawl hrangah a pek. Mipa siseh, nunau siseh, midang parah sualnak tuah tahrat in BAWIPA hmaiah rintlak lo a si ahcun,

⁷a sualnak cu a phuang pei ih a tisual man cu cupa hnenah kimte in a kuan hlei ah zateek kul a beet pei.

⁸Sikhalsehla a tuahmawhmi cu a thi ih a kuanmi saangtu dingah sungkhat suahpi zohman a neih lo a si ahcun puithiam ih hman dingah BAWIPA ih hnenah a pek pei. Hi pekmi cu sualthlah thawinak hrangih tuucang a pekmi hlei ah beetmi a si pei.

⁹Cun Israel mi pawl in BAWIPA ih hnenah a hleice ih thawinak an pekmi pohpoh cu a rak saangtu puithiam ih ta a si pei.

¹⁰Puithiam poh in a hnenih an pekmi laksawng cu a co pei.

¹¹BAWIPA in Moses hnenah,

¹²a tanglam daan pawl cu Israel mi hrangah a pek. Pasal neimi nunau in mipa dang thawn a sual ih miborhhlawh ah a cang;

¹³asinain a sual cu phuang loin a thup ringring; a sual lai an kai lo ih a hmutu le an um fawn lo naón a pasal cun zum lonak a nei ih a nupi parah a lung a hring ringring.

¹⁴Culole a nupi cun sualnak zianghman a tuah lo naón a pasal in a zum lo. A nupi a thiik ruangih zum lo meen a rak si.

¹⁵Ziangziang a si khalle hi bangtuk ih thu a um ahcun a pasal in a nupi cu puithiam hnenah a fehpi pei. Thlairawl thawinak hrangih a ṭulmi barli sangvut cuai hrek a keng pei ih thawinak a pek pei. Asinain olif siti le frankincense rimhmui cu a toih lo pei. Ziangahtile himi cu lunghringtu a pasal in thudik theih duh ruangih a pekmi thawinak a si.

¹⁶Puithiam in cuih nunau nu cu biakṭheng hmaiah a suahpi pei ih BAWIPA ih hmai ahcun a dingter pei.

¹⁷Cun puithiam in tlak beel pakhat a lak pei ih a sungah tidai thiangfai tawkfang a ret pei; cule BAWIPA umnak Puanthlam sungih leivut a lak pei ih, tidai cu khaa dingin, tidai ah a phulh pei.

¹⁸Cuih hnuah puithiam in nunau nuih samtom a phoih pei ih nunau nuih kut sungah thawinak sangvut a ret pei. Amah puithiam in siatserhnak thlentertu tidai cu a beel in a keng pei.

¹⁹Cule puithiam in nunau nu cu, “Mipa dang thawn na sual lo a si ahcun siatserhnak a thlentu hi tidai in lo siatsuah hlah seh.

²⁰Asinain pasal nei cingin mipa dang thawn nan sual ngaingai a si ahcun,

²¹BAWIPA in na hmin cu na miphun lakih midang camsiatnak ah hmang seh. BAWIPA in na pumpi thlingter sehla na zahmawh caarter seh.

²²Hi tidai cu na pum sungah lut in na pumpi cu thlingter ciamco sehla na zahmawh khal caarter thluh seh,” tiah siatserhnak a tuahter pei. Cutikah nunau nu cun, “Si hram seh, Amen,” tiah a sawn pei.

²³Cun cuih siatserhnak cu puithiam in a ngan pei ih a nganmi cu beel sungih thlalet cammi siatti sung ahcun a tleuh pei.

²⁴Tidai cu nunau nuih pum sungih natnak besia suakter dingin a inter hlan ah,

²⁵puithiam in nunau nu kut sungih a ummi thlairawl thawinak sangvut cu a lak pei ih BAWIPA ih hnenah a hun thlir hnuah biakṭheng parah a ret pei.

²⁶Cun thawinakih pekmi a si ti langternak ah sangvut cu zatekhat a lak pei ih biakṭheng parah a ur pei. Cule neta bikah tidai cu nunau nu a inter pei.

²⁷Mipa dang thawn an sual ngaingai asile tidai cun a pum a natter ding ih a pumpi a ṭhang vivo ding ih a zahmawh khal a caar vivo ding. A hmin cu a miphun lakah siatserhmi a si pei.

²⁸Sikhalsehla a sual lo a si ahcun siatsuahnak a tong lo pei ih fa khal a nei thei ding.

²⁹Hi daan cu mipa pakhat in a thuneihnak thuaiih a ummi a nupi a thiik ih mipa dang thawn an sual ruangah zum lonak a neih tikah thlun ding mi daan a si.

³⁰Culole a nupi a thiik meen ruangih zum lonak a neih ruangah a si khalle thlun dingmi daan a si. Cutiin biakṭheng hmaiah nunau nu cu a dinter pei ih puithiam in hi thawinak cu a tuah pei.

³¹A pasal cu mawh a phur lo pei; asinain a nupi cu a sual a si ahcun sualman a tuar pei.