Read Falam Chin MIPUM SIARNAK 9 Bible Online

MIPUM SIARNAK 9 - Falam Chin bible

MIPUM SIARNAK 9

¹BAWIPA in Moses hnenah, Izipt ram ihsin Israel mi an suah hnu a kum hnihnak thla hmaisabik ah Sinai nelrawn ah hiti in a sim.

²“Israel mi pawl in Lantak Puai cu a tikcu a kim tinte in tuah hai seh.

³Hi thla ni hleili nitlak vete in tuah ding timi le thlun ding timi daan hmuahhmuah vekin an tuah pei,” tiah a ti.

⁴Curuangah Moses in Lantak Puai tuah ding cu a sim ih,

⁵a sim vek cun thla hmaisa bikih ni hleilinak siim lamin Sinai nelrawn ahcun an tuah. BAWIPA in Moses hnenih thu a pek bangtuk in Israel mi pawl cun an tuah thluh.

⁶Asinain mi hrekkhat cu miruak an tham ruangah mi thiangfai lo an si ih cuih ni-ih Lantak Puai ah an tel thei lo. Curuangah Moses le Aaron hnenah an feh ih,

⁷“Miruak kan tham ruangah kannih cu mi thiangfai lo kan si. Sikhalsehla Israel mi pawl in BAWIPA hnenih thawinak an pek tikah tel thei lo dingin ziangah so in kham?” tiah an sut.

⁸Moses in, “Nan hrangih BAWIPA ih thupekmi ka ngah hlan lo cu rak hngak hrih uh,” tiah a ti.

⁹Cutikah BAWIPA in Israel mi pawl than dingah Moses hnenah,

¹⁰“Anmah siseh, an tesinfa pawl siseh, miruak dai ruangih mi thiangfai lo an si tikah siseh, khual lamhla an tlawn tikah siseh, Lantak Puai an hmang duh thotho a si ahcun,

¹¹thla hnihnak ni hleili zanlam khuathim zawng in an hmang thei ve pei. Cumi puai cu thilnu rawi lo sang le ankha hnah thawn an tuah pei.

¹²An thahmi tuu ih ruh cu pakhat hman an khiak lo pei ih, rawl cu a thaizing tiang hlah-mi an nei lo pei. Lantak Puai cu thlun ding timi daan vekin an ul pei.

¹³Sikhalsehla mi pakhatkhat thianfai lonak ziang hman a nei lo ih khual khal a tlawng lo naón Lantak Puai a tuah lo a si ahcun amah cu ka miphun sungah siarcih a si nawn lo pei. Ziangahtile a tikcu ah ka hnenih thawinak a pek lo ruangah a si. A sualman cu amah in a tuar pei.

¹⁴“An lakih a um ramdang mi in Lantak Puai a tuah duh ve a si ahcun tuah ding le thlun ding timi daan vekin a thlun pei. Israel mi siseh, ramdang mi siseh, an thlun dingmi daan cu a bangrep thluh a si,” tiah a ti.

¹⁵BAWIPA ih umnak Puanthlam an din ni ah mero a rung zaam ih Puanthlam cu a run zeel thluh. Zanvarte mero cu meisa vekin a tleu.

¹⁶Cubangtuk ringring in a si: sunah mero in a khuh ih zanah cun meisa bangtuk a si.

¹⁷Mero a kian tinte in Israel mi pawl cu an riahnak hmun an ṭhawn ih mero a rung zaam tinte in riahnak hmun an khuar sal ṭheu.

¹⁸BAWIPA ih thupeknak vekin Israel mi pawl cu an riahnak an ṭhawn ih a thupek vek thothoin an sak sal ṭheu. Puanthlam tlunih mero a zaam sung hmuahhmuah cu an riahbuk ah an caam.

¹⁹Mero cu tikcu reipi ṭhawn loih a um tikah BAWIPA ih duhnak an thlun ih ṭhawn loin an um ve.

²⁰Voikhat khat cu Puanthlam tlunah ni malte sung lawng mero a zaam; an riahnak hmunih an riah tikah siseh, an riahnak an ṭhawn tikah siseh, BAWIPA ih duhnak vekin an thlun.

²¹Voikhatkhat cu khuathim ihsin zinglam tiang lawng mero a zaam ih cuih mero a kian vete in an ceer ve ṭheu. Sun zan ti loin mero a kian tinin an riahnak cu an thawn ṭheu a si.

²²Ni hnih siseh, thla khat siseh, a si lole kum khat sung khal siseh, Puanthlam parih mero a zaam sung hmuahhmuah cu an ṭhawn hrimhrim lo; asinain mero a kian vete cun an ṭhawn ve a si.

²³BAWIPA in Moses hmang in thu a pekmi pawl cu an thlun ruangah an riahnak cu an ṭhawn ih umhmun an khuar sal ṭheu.