Read Falam Chin MIKAH 2 Bible Online

MIKAH 2 - Falam Chin bible

MIKAH 2

¹Ihkhun parah zau tahratin thil ṭha lo tuah ding khua a khang rerotu pawl cu nan hmakhua a va pit so! Khua a hung vang ih tikcu ṭha an ngah vete in thil ṭha lo an ruahmi cu an tuah.

²Lo an duh tikah mi ih lo an long. Inn an duh tikah mi ih inn an luah mai. Zo ih innsang le thilri hman a him lo.

³Curuangah BAWIPA in hiti in a ti, “Nan parah thil ṭha lo ka thlenter ding ih zohman nan luat thei lo ding.Awloksong le vansaang in nan um ding ih hngalhngawng zet cun nan tlang nawn lo ding.

⁴Cuih tikcu a thlen tikah siatnak nan tonmi cu mi tampi in thuṭhimnak ah an hmang ding ih hi nan thinnatnak hla hi an sak ding: ‘Siatsuah ṭheh kan si zo, BAWIPA in kan ram a lak zo; Sal ih in kaitu pawl hnenah a pek,’ an ti ding,” tiah a ti.

⁵Cule hi ram cu BAWIPA ih minung hnenih pek sal a si tikah nannih hrangah cun co ding zianghman a um lo ding.

⁶Misenpi in ka hnenah, “Thu in sim duh hlah. Cuih thu pawl cu a rel in rel nawn hlah. Pathian cun mual in photer zik lo.

⁷Israel mi pawl hi camsiatnak hnuai ah an um tiah maw si na ruah? Pathian cu a thin a sau thei nawn lo tiah na ruat maw si? Cuvek thil cu a tuah ngaingai pei maw? Thil ṭha a tuahtu pawl hnen ahcun ṭong thlum in a ṭong ṭheu a si lo maw?” an ti.

⁸Cule BAWIPA in, “Ka minung pawl cu nan ral vek in nan do. Raldonak ihsin an rung tlung ih kan inn ah himte in kan um tiah an ruat; asinain nannih in an taksa parih angki fual hman kha ru dingah nan rak bawh.

⁹Ka miphun ih nupinu pawl cu an duhmi an inn nuamzet ihsin nan dawi suak ih an faale pawl hnen ihsin ka thlawsuah kha nan laksak.

¹⁰Curuangah tho uhla feh uh; hitawk ah humhimnak malte hman a um nawn lo. Nan sualnak in hi hmun cu a siatter ṭheh zo.

¹¹“Hi minung pawl ih duhmi profet cu sukso ah tawivak tahratin thuphan le mi bumnak lawng rel ih, ‘Nan hrangah cun sabitti le zu an luang ringring ko ding,’ a ti hluahhlotu khi a si.

¹²“Sikhalsehla a taang hrihmi Israel pawl nannih cu hmunkhat ah ka lo finkhawm ding. Tuu innih a tlungmi tuu vekin hmunkhat ah ka lo tlunter ding. Ṭilva tlannak ramih tuu an khah vekin nan ram cu minung in an khat sal ding,” tiah a ti.

¹³Pathian in lamzin a sial ding ih an saltaannak hmun ihsin a hruaisuak ding. Khawpi kotka pawl cu an bauh ding ih an suak ding. An siangpahrang BAWIPA amah rori in a suahpi hai ding.