Read Falam Chin MIKAH 6 Bible Online

MIKAH 6 - Falam Chin bible

MIKAH 6

¹BAWIPA in Israel mi parih mawhthluknak a neih mi hi ngaihnik uh! Maw BAWIPA, tho awla na neihmi thu cu simhnik aw; tlang saangpipi le tlang niamtete in na thu cu thei hai seh.

²Nannih tlang saangpi pawl, nannih kumkhua hmun mi leilung hram ṭoh-nak pawl, BAWIPA ih thu cu ngai uh! BAWIPA in a minung parah thu a nei. Israel parih a neihmi thu a sim ding.

³BAWIPA in, “Ka minung pawl, nan parah ziang tuahmi so ka neih? Ziangtin so nan hrangah thilrit ih ka can cu? I let hnik uh!

⁴Izipt ram ihsin ka lo runsuak ih saltaannak sungin ka lo tlensuak. Nanmah hruaitu dingah Moses le Aaron le Miriam ka thlah.

⁵Ka minung pawl, Moab siangpahrang Balak in nan parih thil tuah a tummi le Beor ih fapa Balaam in thu a lehnak pawl kha ciing ringring uh. Akasia ih riah hmun ihsin Gilgal fehnak lamzin ih thil a cangmi pawl kha thei ringring uh. Cuih thil pawl ciing ringring uhla nanmah hum duh ih thil ka rak tuahmi pawl cu nan thei sal ding,” tiah a ti.

⁶Vancung Pathian BAWIPA bia dingih ka feh tikah a hnenah ziangso ka ken ding? A hnenih mei-ur thawinak pe dingah kum khat kim caw no ṭha ka hei keng ding maw?

⁷Tuu a thawng le a za in pe ningla BAWIPA cu a lung a awi pei maw? Cat loih a luangmi olif hriak in a lung a awiter pei maw? Ka sualnak ruangah a hnenah ka sung suak ka fatir ka pe ding maw?

⁸Asilo, BAWIPA amah in a ṭhami le tuahter in duhmi cu in sim zo. Siter in duh mi cu: A dingmi tuah le zaangfahnak tlaihsan le tangdorte in Pathian thawn fehtlang khi a si.

⁹BAWIPA ṭihzah cu fim a si. BAWIPA in khawpi cu a ko ih, “Khawsungih a ummi pawl, ngai uh.

¹⁰Mi ṭha lo pawl ih inn ahcun ṭhat lonak thawn an ngahmi sumsaw tampi a um. A dik lomi tahnak an hmang, ka huatmi thil a si.

¹¹A dik lomi tahnak le a dik lomi cuaithlainak a hmangtu pawl cu ziangtinso ka ngaithiam thei ding?

¹²Khawsungih milian pawl cun mifarah pawl nan neekrawk ih nan zatein thuphan pertu hlir nan si.

¹³Nan sualnak ruangah nanmah siatsuahnak atu ihsin ka thok zo.

¹⁴Rawl cu nan ei ding naón nan puar lo ding; nan ril a rawng ringring ding. Thilri humsuak dingih nan tlanpi hmanah nan hlawhtling lo ding. Nan tlanpi suakmi a um pang hmanah ral kut in ka siatter ṭhiamṭhiam ding.

¹⁵Rawlci nan tuh ding naón a rah cu nan la ngah lo ding. Olif rah ihsin siti nan rial ding naón hman ding cu nan nei dah lo ding. Sabitti nan tuah ding naón nan in dah lo ding.

¹⁶Siangpahrang Omri le a fapa siangpahrang Ahab ih thil ṭha lo tuahmi nan thlun zo a si. An taantami an thu cu nan thlun ṭhiamṭhiam ruangah siatnak ah ka lo thlenpi hai ding ih mi hmuahhmuah in an lo hmuhsuam ding. Khawzakip ih mi in nautatnak thawn an lo siatsuah ding,” tiah a ti.