Read Falam Chin NAHUM 1 Bible Online

NAHUM 1 - Falam Chin bible

NAHUM 1

¹Himi hi Elkosh khuami Nahum in Nineveh khua thuhla ah langnak a hmuh mi a si:

²BAWIPA cu thiiknei le phuhlam hmang Pathian a si; BAWIPA cu phuhlam hmang le thinheng thei a si. Amah a dodaltu parah phu a hlam ih, A ral pawl parah thinheng in a lehrul.

³BAWIPA cu olte in a thin a heng lo; Asinain a huham cu a nasa ngaingai. Misual pawl hrem loin a luatter hrimhrim lo ding. BAWIPA ih fehnak kipah phusiing le thlipi a tho ih, Mero cu a ke fehnak ihsin a thomi leikhu a si.

⁴Tifinriat thu a pek ih a kanter, Tiva hmuahhmuah khal an caar an ro ṭheh. Bashan ram le Karmel tlang tla an ro ṭheh ih, Lebanon tlang ih pangpar khal an vuai ṭheh a si.

⁵Tlang saangpipi a hmaiah an hnin ih, Tlang niamtete an cim ṭheh. A hmaika ahcun leilung le a parih ummi pawl cu, An khur ih an ṭhia.

⁶A thinhengnak hmaiah zoso a ding thei ding? A thin ai-thoknak cu zoso a tuar thei ding? A thinhengnak cu tisa bangin a burh, A hmaika ahcun lungto hman leivutah an cang ṭheh.

⁷BAWIPA cu a ṭha, Harsatnak caanah beunak ṭha bik a si. A hnenih humhimnak a hawltu cu a zaangfah ih, Himdamnak an ngah a si.

⁸Tilian in thil a siatsuah bangin, A ral pawl cu a siatsuah ih, A dodaltu pawl cu thihnak khawthim sungah a thlak hai.

⁹Ziangah so BAWIPA cu a phiar nan tum rero? A lo siatsuah ṭheh hai ding a si. Zohman in voihnih tiang an do ngam dah lo.

¹⁰Hling le so an ngerh awk ṭheh bangin an ngerh aw; Zu phaam pawl bangin an ri ih, Hramro bangin an kaang ṭheh ding.

¹¹Maw Nineveh, na sungin misual pakhat BAWIPA dodaltu le midang thusual forhtu a suak zo.

¹²BAWIPA in Israel mi hnenah, “Assiria mi an tamzet ding ih an cakzet ding naón, Siatsuah an si dingih an cem ding. Ka minung pawl, ka lo hrem zo ih Ka lo hrem sal nawn lo ding.

¹³A lo delhtu kawn cu ka khiak ding, A lo ṭemṭawntu thir cikcin cu ka phihcat ding,” a ti.

¹⁴Assiria hrangah BAWIPA ih thupekmi cu: “Na hmin sawngtu dingah tefa na nei nawn lo ding; Na khawzing biakinn ihsin na milem le an zuk pawl cu ka khuai ṭheh ding. Na thlaan cu atu ihsin ka timtuah cia ding ih, Nung tlak na si nawn lo,” ti hi a si.

¹⁵Tlangpar ah thuthangṭha a phurtu le daihnak a rak thlentu ih ke khi zohhnik uh! Maw Judah, na tuah dingmi puai cu tuah aw, Na thukammi cu kimter aw. Mi ṭha lo pawl cun an lo neh nawn lo ding, Annih cu siatsuah ṭheh an si zo.