Read Falam Chin ZEFANIAH 2 Bible Online

ZEFANIAH 2 - Falam Chin bible

ZEFANIAH 2

¹Maw ningzah nei lo pawl, pangpar bangin nan vuai ih nan thih hlanah hin,

²BAWIPA ih thinhengnak cu mei alh vekih nan par a thlen hlan le a thin ai-thoknak a langter ni a thlen hlanah hin khuaruat thiam mi si thlang hnik uh.

³Ram sungih nannih mi lungnem le thukham a thluntu pawl, BAWIPA hnenah kir thlang uh. Thildik tuah uhla BAWIPA hmaiah lungnem mi si uh. BAWIPA in a thinhengnak a langter ni ah hremnak ihsin nan luat tla a si thei men.

⁴Gaza khawpi sungah zohman an taang lo ding. Ashkelon mi an ṭio ding. Ashdod mi pawl cu ni hrek ah dawihlo ṭheh an si ding ih Ekron mi pawl cu an khawpi ihsin dawi ṭheh an si ding.

⁵Nannih Filistin mi, tipikap ih a ummi pawl, nan cem a si! BAWIPA in nan parah thurelnak a tuah zo. A lo tisiat ding ih pakhat hman nan luat lo ding.

⁶Tifinriat kapih nan ram hi tuukhal riahbuk le tuuhruang pawl umnak hramlak ah a cang ding.

⁷Nan ram hi Judah mi a taangsun pawl in an luah ding. Cutawkah an tuu an khal ding ih Ashkelon ih inn pawl ah an it ding. BAWIPA an Pathian an hnenah a um ding ih mi neinung a siter sal ding.

⁸Cungnungbik BAWIPA in, “Moab mi le Ammon mi pawl in ka minung pawl an hmuhsuamnak le an nautatnak ka thei zo; an ram kan long ṭheh ding, tiih tluang an khawnnak tla ka thei zo.

⁹Israel ih Pathian nung ka si vekin, Moab le Ammon cu Sodom le Gomorrah vekin siatsuah ṭheh an si ding tiah thu ka kam a si. Cikhur pawl umnak hmunah an cang ding. Kumkhua in a siat tata ding ih hrampi lawng a kho ding. A taangsun ka minung pawl in an siatsuah ding ih an ram cu an luah ding,” tiah a ti.

¹⁰Cubangtuk in Moab mi le Ammon mi pawl cu an hngalhngawng, an puarthau ih Cungnungbik BAWIPA ih minung pawl an hmuhsuam ruangah hrem an si ding.

¹¹BAWIPA cu an hrangah ṭihnungza a si ding. Leilung tlunih khawzing pawl cu zianghman lo ah a tuah ṭheh ding. Miphun hmuahhmuah in amah cu an hmun le an ram ciar ah an biak ding.

¹²BAWIPA in Ethiopia mi pawl tla a thihter ding.

¹³BAWIPA in Assiria siatsuahnak ah a huham a hmang ding. Nineveh khawpi cu tidai um lonak nelrawn ah a cangter ding ih tlansan mi khawrop ah a cang ding.

¹⁴Caw le tuu le ṭilva phunkip an bawhnak hmunah a cang ding. Hnawmpen lakah cun sumbuh an um ding ih sangkate ihsin an ai ding. Tlang-ak tla sangkapi ihsin an ai ding. Inn parih sidar thing hmuahhmuah cu lak ṭheh an si ding.

¹⁵Ka cakzet tiah a puarthau mi le ka him tiah a ruat-awtu parah cubangtuk thil cu a thleng ding. Leilung tlunah kan khawpi hi a tum bik tiah khawsung mi pawl cun an ruat. An khawpi cu ramsa riahnak hmunṭhing ah a cang ding. A hmutu pawl cu an mangbang tukah an com dukdi ding ih an kuttum an hoi ding a si.