Read Falam Chin HAGGAI 1 Bible Online

HAGGAI 1 - Falam Chin bible

HAGGAI 1

¹Darias in Persia siangpahrang a ṭuan kum hnihnak, thla ruk thla, ni khat ni ah BAWIPA ih ṭong cu profet Haggai hnenah a rung thleng. A rung thlengmi thu cu Judah ram uktu bawi, Shealtiel ih fapa Zerubbabel hrangah le puithiam sang Jehozadak ih fapa Joshua hrangah a si.

²Cungnungbik BAWIPA in Haggai hnenah, “Atu hi Biakinn sak salnak dingah cun tikcu remcaang a si lo tiah mipi in an ti ciamco,” a ti.

³Curuangah profet Haggai hmangin misenpi hnenah BAWIPA ih thu cu hiti in a si:

⁴“Maw ka minung pawl, ka Biakinn hnawmpen vekih a um laiah ziangah so nannih hmuah inn ṭhaṭha ah nan um?

⁵Nan parih thil a thlengmi hi nan hmu thiam lo maw si?

⁶Rawl ci tampi nan tuh, asinain rawl malte lawng nan la. Rawl ei ding nan nei, asinain pum puar tlak nan nei lo. Sabit in ding nan nei, asinain rit tlak hman nan nei lo. Hnipuan hruh ding nan nei, asinain a lo hlumtertu hnipuan ṭha nan nei lo. Hnaṭuantu khal in pumcawmnak tlak nan hlawh lo.

⁷Ziangruangah hi bangtuk hin nan parah a cang ti nan thei lo maw si?

⁸Tlangpar ah va kai uh, thing va lak uhla Biakinn sak sal uh. Cutikah ka lung a awi dingih cutawkah ka sunlawinak ka langter ding.

⁹Rawl kan paṭha zet ding tin nan ruat, asinain nan lakmi ngaingai cu a malte a si. Nan rawl cu inn ih nan run tlun tikah keimah in ka semhlo ṭheh. Ziangah so ka semhlo nan thei maw? Nan zatein nanmah inn ciar nan sak ih manhlap zetih nan um laiah kei ih inn cu balsiat ṭhehmi hnawmpen vekih nan umter ruangah a si.

¹⁰Curuangah sokhaw ruah tla a sur lo ih zianghman a khoh thei lo cu!

¹¹Ruah sur loin leilung ka carter ṭheh: tlangpar le lo sung le sabit hmuan pawl le olif hmuan pawl, leilung parih a khomi rawl kung parah le minung le ṭilva tlunah le milai in ciin an tummi thil hmuahhmuah parah ruah ka surter lo ih ka caarter a si,” tiah a ti.

¹²Cutikah Zerubbabel le Joshua le Babilon saltaannak ihsin a ra kirtu pawl hmuahhmuah in BAWIPA an Pathian fialmi cu an tuah. An thin a phang ih BAWIPA ih palai a si mi profet Haggai ih thu cu an ngai.

¹³Haggai cunBAWIPAIÓ thu cu misenpi hnenah a sim: “Nan hnenah ka um ding, tiah thu ka lo kam a si,” a ti.

¹⁴BAWIPA in mi hmuahhmuah cu Biakinn ṭuan dingah an lung a thoter: Judah ram uktu bawi Zerubbabel, Puithiam Saang Joshua, le saltannak ihsin a ra kirtu pawl an tel ṭheh. Cungnungbik BAWIPA, an Pathian ih biakinn cu sak sal an thok.

¹⁵Darias in Persia siangpahrang a ṭuannak kum hnih kum, thla ruk thla, ni kul hluan li ni ah an thok a si.