Read Falam Chin ZEKHARIAH 10 Bible Online

ZEKHARIAH 10 - Falam Chin bible

ZEKHARIAH 10

¹BAWIPA ih hnenah thlatir ah ṭoruah dil uh. Khawdur a tuahtu le ruah a surtertu cu amah a si. Mi hmuahhmuah ih loram a hringtertu khal BAWIPA a si.

²Minung in milem le pol hnenah thu an ron, a sinan an simmi cu thulolak le thuphan lawng a si. Mi hrekkhat in mang an let, asinain a peengah an lo hruai; thinhnemnak ṭong an ṭongmi cu ṭhathnemnak zianghman a nei lo. Curuangah mipi pawl cu a hlomi tuu vekin an vakvai. Hotu an neih lo ruangah harsatnak an tong a si.

³BAWIPA in hiti in a ti. “Ka minung pawl a uktu parah ka thin a heng. Curuangah ka hrem hai ding. Judah mi pawl cu keimah ih ta an si ih Cungnungbik BAWIPA keimah in ka kilkhawi ding. Anmah cu ka uarzetmi le a cakzetmi ka raldonak rang an si ding.

⁴Anmah sung ihsin mi uktu pawl, mi hruaitu pawl le ralbawi pawl an suak ding ih ka minung pawl an uk ding.

⁵Lamzin ciarbek lakih an ral a palcil rerotu ralkap pawl vekin Judah mi pawl cu nehtu an si ding. BAWIPA an hnenih a um ruangah ral an do ding ih an ral sungih rangralkap pawl hman an neh ding.

⁶“Judah mi pawl cu mi cakzet ah ka tuah ding; Israel mi pawl ka runsuak ding. An parah lainatnak ka nei ding, An zate in an khua le an ram ah ka hruai kir ding. Ka hnon dah lomi vekah ruah an si ding. Keimah hi BAWIPA an Pathian ka si, An thlacamnak ka theihsak ding.

⁷Israel mi pawl cu raldo thiam vekin an cak ding ih, Sabitti in bangtuk in an lung a nuam ding. An tesinfa pawl in hi nehnak cu an cing ding ih, BAWIPA ih thiltuahmi ruangah an lung a awi ding.

⁸“Ka minung pawl ka ko ding ih Hmunkhat ah ka finkhawm ding. Ka run hai dingih a hlan vekin mi tamzet ah an cang sal ding.

⁹Miphun dang lakah ka ṭhekdarh zo hai naón, Ram hlazet khal in keimah in thei ding. Anmah le an faate pawl an nung suak ding ih, An khua le an ram ah an kir tlang ding.

¹⁰Izip ram le Assiria ram ihsin ka hruai kir ding ih, Anmah ih ram sungah hmun ka khuar sak ding. Gilead le Lebanon ram khal ah ka umter ding; Ram pumpuluk ah minung an khat ding.

¹¹Harsatnak tifinriat an tan tikah, BAWIPA keimah in tilet cu ka vuak ding ih, Nail tiva thuk cu a kang ṭheh ding, A puarthaumi Assiria ningzak in a um ding ih, A maksakmi Izip huham a nei nawn lo ding.

¹²Ka minung pawl BAWIPA ah ka cakter ding; Ka hmin in lamzin an feh ding,” a ti. BAWIPA in a sim zo.