Read Falam Chin ZEKHARIAH 11 Bible Online

ZEKHARIAH 11 - Falam Chin bible

ZEKHARIAH 11

¹Maw Lebanon, na sangka pawl ong aw, Na sidar thingkung pawl meisa in kaang ṭhehseh.

²Tu farthing pawl, ṭap ai rero uh, Sidar kung pawl an tlu ṭheh zo; Thing sunglawi pawl siatsuah an si ṭheh zo. Bashan ram ih ṭhil thing pawl ṭap in ai rero ko uh. A ruul zetmi tupi cu hau ṭheh a si zo!

³Uktu pawl riahsia in an ṭap an rak; An sunlawinak a cem zo. Kiosa pawl an huuk rero, ngaihnik uh! Jordan tivakap ih an inn a si mi tupi cu siatsuah ṭheh a si zo.

⁴BAWIPA ka Pathian in ka hnenah, “Thah ding a si mi tuu pawl a khaaltu [3] ih nuncan kha cawng hnik.

⁵A neitu pawl in tuu an that, asinain annih cu zohman in an mawhthluk hai lo. Tuusa zuar tahrat in, ‘BAWIPA cu thangṭhat si ko seh! Kan lian zo a si,’ an ti. Tuukhal pawl hman in an tuu pawl parah zaangfahnak an nei lo,” tiah a ti.

⁶BAWIPA in, “Leilung tlun ah zohman ka zaangfah nawn lo ding. Keimah rori in mi hmuahhmuah cu an uktu pawl ih kutsung ah ka thunlut thluh ding. Cuih uktu pawl in leilung cu an tisiat ṭheh ding, asinain an thilti theinak huham sungin zohman ka run lo ding,” a ti.

⁷Tuu a leitu pawl le a zuartu pawl in an hnaṭuantu dingah kei cu in lak ih thah ding a si mi tuu pawl khaaltu ah ka cang. Funghreu pahnih ka lak: pakhat cu, “Zaangfahnak,” ka ti ih a dang pakhat cu “Komawknak,” ka ti. Cuti cun tuurual cu ka kilkhawi.

⁸Keimah i huatu tuukhal pathum parah cun ka thin a sau thei nawn lo, ka zawi thei nawn lo ih thla khat sungah an pathum in ka dawi hlo a si.

⁹Cule tuurual hnenah cun, “A lo khaaltu ka si nawn lo ding. A thi ding cu thi ko hai seh, siatsuah ding cu siatsuah si ko seh. A taangmi cu pakhat le pakhat an sa ei-aw thluh ko hai seh,” ka ti.

¹⁰Cun, “Zaangfahnak,” timi funghreu cu ka lak ih, BAWIPA in miphun hmuahhmuah thawn a tuahmi thukamnak bal ṭheh dingah ka khiak.

¹¹Cutiin cuih ni ah thukamnak rak tuahcia mi cu bal ṭheh a si. Tuu a leitu le a zuartu pawl cun in zohhliah ringring; ka thil tuah mi hi BAWIPA ih simmi a si, ti kha an thei.

¹²An hnenah “Nan lung a kim ahcun ka nihlawh i pe uh. A kim lo ahcun a poi lo, nanmah in nei ko uh,” tiah ka ti. Curuangah ka nihlawh ah ngun tangka sawmthum in pek.

¹³BAWIPA in ka hnenah, “Hi tangka cu Biakinn tangka ah re aw,” i ti. Curuangah ngun tangka sawmthum, ka man ih an ruahmi tangka sunglawizet cu, ka lak ih Biakinn tangka retnak ah ka ret.

¹⁴Cuih hnuah a pahnihnak funghreu “Komawknak,” timi cu ka khiak lala; cutiin Judah le Israel kom awknak cu ka phiat a si.

¹⁵Cule BAWIPA in ka hnenah, “Tuih ṭum cu zianghman ih santlai lo tuukhal pa ih nuncan cawng aw.

¹⁶Ka tuurual kiltu dingah tuukhal pakhat ka ret; a sinan hlohralnak tongzikmi tuu pawl a hum duh lo; a hlomi tuu khal a hawl lo; hma a neimi tuu khal a tuamhlawm lo ih a harhdammi a taangsun tuu pawl tla rawl a pek lo. A thau bikmi tuusa a ei ih an ketin pawl tiangin a hawk ṭheh sawn a si.

¹⁷Cuih tuukhal pa cu a lamzin a pit ih a cem a si! A tuu pawl a tlansan zo. A cahnak hmuahhmuah ral in an siatsuah ṭheh ding. A baan a ro a car ding ih a vorhlam mit a caw ding,” a ti.