Read Falam Chin ZEKHARIAH 13 Bible Online

ZEKHARIAH 13 - Falam Chin bible

ZEKHARIAH 13

¹Cungnungbik BAWIPA in, “Cu tikcu a thlen tikah David tesinfa pawl le Jerusalem mi pawl an sualnak le an milem biaknak ihsin thianfaiter dingah cerhti pakhat a put ding.

²Cutikah cun hi ram milem pawl ih hmin cu ka phiathlo ṭheh ding ih zohman in an cing nawn lo ding. Profet ka si a titu hmuahhmuah cu ka hlonhlo ṭheh ding ih milem biak duhnak thinlung khal ka lak hlo ṭheh ding.

³Cule mi pakhatkhat in profet ṭong ih ṭong a tum thotho a si ahcun, a nu le a pa in, ‘BAWIPA ih hmin in thuphan na per ruangah na thi ding,’ tiah an ti ding. Cutin profet ṭong ih a ṭong tikah cun amah ih nu le pa in an sunthat ding a si.

⁴Cubangtuk tikcu a thlen tikah cun zovek profet hman langnak pakhatkhat a hmuh ruangah a uar aw lo ding, profet nun tla a cawng lo ding ih misenpi bumnak dingah profet pawl ih hruk ṭheumi, a hraam zetmi korfualpi tla a hruk lo ding.

⁵Cuhnak in anih cun ‘Kei cu profet ka si lo. Lothlo ka si; ka nunsung hmuahhmuah lothlo ka si ringring ko,’ a ti sawn ding.

⁶Cule mi pakhatkhat in ‘Na ṭaang ih tuahmawhnak hma pawl kha ziangruangah so a si?’ tiih a sut tikah ‘Ka rualpi inn ih ka ton pang mi an si,’ tiah a ti ding,” a ti.

⁷Cungnungbik BAWIPA in, “Maw, ralnam, tho awla ka hrangih hnaṭuantu tuukhal khi sat aw! That awla tuu pawl cu khuazakip ah ṭeekdarh ṭheh hai seh. Mi tenau pawl cu keimah in ka siatsuah ko hai ding;

⁸cule hi ram sung milai pawl ṭhen thum ih ṭhen hnih cu an thi ding. Ṭhen thum ih ṭhen khat lawng an luat ding.

⁹Cule a taangmi ṭhen thum ih ṭhen khat cu ka hniksak ding ih ngun cu meisa in a thianfaiter bangin ka thianfaiter ding. Sui cu hniksak a si vekin ka hniksak ding. Cule ka hnenah thla an cam ding ih ka theihsak ding. Ka minung an si kha ka sim ding ih keimah khal an Pathian ka si hi an phuang ding,” tiah a ti.