Read Falam Chin ZEKHARIAH 4 Bible Online

ZEKHARIAH 4 - Falam Chin bible

ZEKHARIAH 4

¹Ka hnen ih a ṭong rerotu vancungmi cu a ra sal ih a itthat mi ṭhang vekin i ra ṭhang.

²“Ziang so na hmuh?” tiah i sut. Kei in, “Sui in tuahmi mei-inn tohnak ka hmu. A tlun ah meiti retnak kheng a um. Mei-inn tohnak par ahcun mei-inn pasarih an um ih mei-inn pakhat in meica thulnak ong pasarih an nei fingfing.

³Mei-inn tohnak kiangah olif thingkung pahnih, a sir veve ah an um ka hmu,” tiah ka ti.

⁴Cule vancungmi cu, “Hi thil pawl ih sullam ziangso an si, bawipa?” tiah ka sut.

⁵Amah in, “Sullam na thei lo maw?” i ti. Kei in, “Bawipa, ka thei lo,” tiah ka ti.

⁶Vancungmi cun Cungnungbik BAWIPA ih hnen ihsin a rami thu cu Zerubbabel sim dingin i fial. BAWIPA in, “Hriamnam cahnak le na thazaang cahnak in si loin ka thlarau in na hlawhtling ding.

⁷Na hmaiah khamtu tlang tia a um hmanah an hlo ṭheh ding. Biakinn cu na din sal ding ih biakinn saknak a neta bik lungto na dawl tikah misenpi pawl cu, ‘A mawizet, a mawizet,’ tiah an au ding,” tiah a ti.

⁸BAWIPA ih thu cu ka hnenah a ra thleng sal ih,

⁹“Biakinn hram cu Zerubbabel in a dawl thok zo ih a saksuak ding. Cumi a kim ngaingai tikah ka minung pawl in an hnenah nangmah a lo thlahtu keimah ka si kha an thei ding.

¹⁰An biakinn sak hnaṭuannak a sawt lo ti an theih tikah an thin a nauzet. Sikhalsehla Zerubbabel in Biakinn cu taimak zetin a sak rero ko ti kha an hmuh tikah an lung a awi ding,” tiah a ti. Vancungmi cun,[1] “Mei-inn pasarih cu leilungtlun khuazakip a hmu ṭhehtu BAWIPA ih mit pasarih tican a si,” tiah i ti.

¹¹Cule kei in, “Mei-inn tohnak sir ih a ummi olif thingkung pahnih ih tican ziangso a si?

¹²Olif hriak a rung luannak sui in tuahmi dawng[2] pahnih kiangih olif thinghnge pahnih ih tican ziangso a si?” tiah ka sut lala.

¹³Anih cun, “Atican na thei lo maw?” i ti. Kei in, “Bawipa, ka thei lo a si,” tiah ka ti.

¹⁴Cutikah anih in, “Himi pawl cu leilung pumpuluk ih Bawi a si mi Pathian in a hrilmi le hriak a culhmi minung pahnih an si,” tiah i ti.