Read Falam Chin ZEKHARIAH 5 Bible Online

ZEKHARIAH 5 - Falam Chin bible

ZEKHARIAH 5

¹Ka hun zoh sal ih thli lakah cazual a zam kha ka hmu.

²Vancungmi in, “Ziang so na hmuh?” tiah i sut. Kei in, “Thli lakah cazual a zammi ka hmu. Cuih cazual cu dong kul a sau ih dong hra a kau,” tiah ka ti.

³Cutikah ka hnenah, “Hi cazual parah hin hi ram ih a thleng dingmi siatserhnak an ngan a si. Hmaikhat ah hi ram ihsin rukru hmuahhmuah hlonhlo an si ding tiah an ngan; khatlam ahcun siatcam in thuphan a permi hmuahhmuah tla hlonhlo an si ding tiah an ngan.

⁴Cungnungbik BAWIPA in, cuih siatserhnak cu keimah in ka suahter ding ih rukru innsung le siatcam in thuphan a pertu innsung kipah a thleng ding, tiah a ti. Cuih siatserhnak cu an innsungah a caam ding ih cuih inn ih thing siseh lungto siseh a siatsuah ṭheh ding,” tiah i ti.

⁵Vancungmi cu a ra lang sal ih, “Zohhnik, thildang pakhat a ra thleng ding!” tiah a ti.

⁶“Ziang so a si?” tiah ka sut. Anih in, “Bawm pakhat a si ih cuih bawm cu leilung pumpuluk ih sualnak can ai a si,” tiah i ti.

⁷Cuih bawm cu sin a nei ih suan in tuahmi a si. Ka hmuhhngan ah a sin cu an ong ih a sungah cun nunau pakhat a rak to.

⁸Vancungmi in, “Hi nunau cu ṭhatlonak ai-awhtu a si,” tiah a ti. Cule cu nu cu bawm sungah cun an nam cih ih a siin a vun sin.

⁹Ka hun zoh ih nunau pahnih vaca thla vek ih a cakzet thla pawl thawn ka lam ih an ra zam kha ka hmu. Bawm cu an cawi ih an zampi hlo.

¹⁰Cutikah vancungmi cu, “Khuiah so an fehpi ding?” tiah ka sut.

¹¹Anih in, “Babilon ah an fehpi ding ih cutawkah a hrangah biakinn an sak sak ding. Cuih biakinn an sak ṭheh tikah bawm cu biak dingah cutawkah an ret ding,” tiah i sim. Guam.