Read Falam Chin ZEKHARIAH 7 Bible Online

ZEKHARIAH 7 - Falam Chin bible

ZEKHARIAH 7

¹Darias in siangpahrang a ṭuannak kum linak kum, thlakua thla (Kislev thla), ni li ni ah BAWIPA ih thu cu ka hnenah a ra thleng.

²Bethel khua mi pawl in Sharezer le Regemmelek cu an milai pawl thawn Cungnungbik BAWIPA ih Biakinn ah BAWIPA ih thlawsuahnak dil dingah le,

³puithiam pawl le profet pawl thusuh dingah an thlah. An thusuh mi cu, “Biakinnpi siatsuah ṭheh a si ruangah kum tampi sung kan rak tuah zo vekin thla nga thla ah rawl ul in riahsia le lungngai in kan um hrih pei maw?” ti a si.

⁴BAWIPA thu cu ka hnenah a ra thleng ih,

⁵BAWIPA in, “Hi ram minung le puithiam pawl hi sim aw: kumpi kum sawm sarih sung, thla nga thla le thla sarih thla ah rawl an ul ih riahsia le lungngai in an um hi keimah in upat ruangah a si lo.

⁶Ti le rawl an in an ei tik khal ah anmah ih diriamnak lawnglawng ah a si,” tiah a ti.

⁷Jerusalem cu ṭhangso le neinungzet in a rak um ih minung tampi an rak um lai caanah le hi khawpi kiangkap khua tla ah mi tampi an rak um lawng si loin thlanglam ramah le nitlaknak lam tlanghram tla ih mi tampi an rak um lai caanah hi bangtuk in BAWIPA in khuahlan profet pawl hmangin a rak sim zomi a si.

⁸BAWIPA in hi thu cu Zekhariah hnenah a sim:

⁹“Khuahlan ah hi thukham pawl cu ka minung hnenah ka rak pek: Dingte in thu nan rel pei ih pakhat le pakhat parah zaangfahnak le lainatnak nan nei pei.

¹⁰Nuhmei pawl le farah pawl, nan lakih a ummi ramdangmi pawl le a hlawhsammi pawl nan namsuk lo pei. Cule pakhat le pakhat siatsuah awk nan tum lo pei, ka ti.

¹¹Sikhalsehla ka minung pawl cu mi thinlungruh pawl an si; ka thupekmi thlun duh loin an dunglam in hoisan; an hna an phit ih zianghman an ngai duh lo;

¹²an thinlung cu lungto vekin a hak a si. Kum reipi laiih ka thlarau thawn ka rak thlahmi profet pawl sungin thu ka zirhmi pawl an ngai duh lo ruangah an parah ka thin a heng ngaingai.

¹³Thu ka sim tikih an ngai duh lo ruangah annih khal thla an cam tikah ka ngai duh ve lo.

¹⁴Thlisia bangin ka semhlo hai ih an theih dah lonak ram dangdang ah ka ṭhekdarh ṭheh. Hi tluk ram ṭha cu a sungah zohman um loin ramṭhing ah a cang a si,” tiah a ti.