Read Falam Chin MALAKHI 4 Bible Online

MALAKHI 4 - Falam Chin bible

MALAKHI 4

¹Ziangkimtithei BAWIPA in, “Somei bangin a lingmi meisa ling a ra thleng ding. Mi puarthau le mi ṭha lo pawl fangkung ro vekih ur an sinak ni a ra thleng cing ding. Cuih ni ah annih pawl cu meisa in ur ṭheh an si ding ih an hram le an hnge zianghman a taang lo ding.

²Sikhalsehla ka thu a ngaitu nannih pawl hrangah cun ka mi runnak huham nan parah ni bangin a tlang ding ih ni tleunak in harhdamnak a pek vek in nan parah damnak a thlengter ding. Caw faate caw inn ihsin an suahmi vekin luatzet le lungawizet in nan um ding.

³Ka cangvaih ni ahcun mi ṭha lo pawl cu nan neh dingih nan ke tangih leivut vek an si ding.

⁴“Israel mi hmuahhmuah ih thlun dingah Sinai tlang ah ka siahhlawh Moses hnen ih ka pekmi daan pawl le thukham pawl le Moses ih thuzirhmi pawl cu ciing ringring uh.

⁵“Sikhalsehla ni lian le ṭihnungza a si mi BAWIPA ih ni a ra thlen hlanah nan hnenah profet Elijah ka run thlah ding.

⁶Amah in pa le faale pawl hmunkhat ah a finkhawm sal ding; culo ahcun keimah ra in nan ram hi ka siatsuah pang ding,” tiah a ti.